Mark 11

Yeso koma ɓaal Urshalima

1Ma a sa tuu la Urshalima ki a tuum ban i Befataji la Betani i yid Taal Zaitun, she Yeso tum ɓo rwap i ɓaal ɓoɓa ki bili, 2i shappe na, “Ɓeer na mwala gari ma dum wun, ban ko lawun, wun kumun mwala jaki ma a kuɗi bana, ɓomaan sun ki yap pi mudta. Zwad na yi, yuun na yi bǝni . 3Ɓomaan la ɗwa’ar ma wun na, ‘Wake ki wun pak wi?’ shap na ɓi na, ‘Matadla la yad, ka gan ɗa, yi kaɗan na yi bǝni.’”

4She a ɓeer a kum mwala jaki ma a kud i kun la, i jaam na tuu la njar. Ya gha mud ban swad jaki ma, 5ɓoɓaan ɓa jaam i bana ɗwa’ar na, “Mala wun pak, wun swad mwala jaki ma?” 6She a kaɗan ɗe wama Yeso ka shap gǝrma ɓe shappe gha, la ɓoɓa shik ya ɓe ɓeer. 7Ma a yuun mwala jaki ma ɓi Yeso, she a wup gǝrɓa a zub yid ya gha, a zub jaki ma gha, she i yap i muɗi. 8Bǝlǝn ɓo ki mak gǝrɓa zub yid ya i mud njar, ɓoɓaan kwad ki swap mbuk nggun ɓa a kas i sum. 9Ɓoɓa li dum la ɓoɓa bil takwad, ki ngam na,

“Pa gul ɓi Koǝl!”

“Ɓoma sambarka na ɓoma yu i ɓaal lwak Matadla!” 10“Sambarka na ban yu la ban nwang rangan la tadsu Dauda!” “Pa gul ɓi Koǝl i takkoǝl!”

11Yeso ko i ɓaal Urshalima she i ɓeer i la majiin la Koǝl. I ndwangal ban la mushi i sun koyab gǝr, ama lakunla tangal ban ko, she i pur, i ɓeer i Betani la ɓo lum ko rwap ɓa ki bili ɓa.

Yeso purun gǝr i La la Koǝl

12Ma duru kwad ki a ban shik ba’al Betani, nzal walam Yeso. 13I sun nggun kashakshi la ɓi mbu’i i ban naaɗa, she i sa tuu ɓi kum ɓil li gha. Ma i tuban, i sun kum ɓa she ɓi mbu’i, lakunla kashakshi ka ki ɓillu i mǝs ma ɓa. 14She i shappi nggun ma na, “Ɓi gus na ɓomaan suma kad shak ɓillu ɓa.” Ɓoɓa ki bili wak ma i shap wa.

15Ban tuban i Urshalima Yeso ko i ɓaal ban ɓa dwangal La la Koǝl, i swabtak ban pid ɓoɓa kur la ɓa ɓwaran gǝr. I tud tebǝr la ɓoɓa kalat wurup, la ɓungǝl la ɓoɓa ɓwaran kurkutuk, 16la i ɗak koyab ɓo, la ban kur, ko ban ɓwaran gǝr, i kun La la Koǝl. 17Ma yi yi’ǝl ya, i shappe na, “A ngywangal na:
“‘Ye tu’ul na la la,
la ma kam Koǝl ɓi nzaal pyang’

Ama wun kaɗan ma yi, ‘Mbwang ban raam la nggib ɓa ki yak gǝr la ɓo la ki’il.’”

18Ɓi daatban ɓa mudkid la ɓoɓa yi’il nzu la Musa wak wami she a bwal ban ngal njar ma wuli ɓi wu, la wuɓi ma wal ya, pyang ɓoɓa raam ɓa, gǝrma yi ki yi’il ɓo gha ma sheel ya.

19Ma kurup pak, she a puri ɓaal gari ma.

Nggun kashakshi ma yom

20I duru ma ye mud ban ɓeer, la a sun nggun kashakshi ma yom tun i ɓi nzwarangi. 21Bitrus rangas she i shappi Yeso, “Ɓo ma yi’il ɓo,sun! Nggun kashakshi ma u shap kun ɗi yomam!”

22Yeso shap na, “Gus la yak kun mamiin i mud Koǝl” 23“Mi shap mamiin ɗu, ɓomaan la shaɓam ɓi taal mi, ‘Ɓeer, kas u tuko i ɓaal shiim,’ yi la sun yak ti’i wa i ɓaali ɓa, ama i mak ɓaali na gǝrma yi la shaɓam ɓi pa’an, ɓi pa’an ɗi. 24Lakunla wa mi shappu, ko mala u maas, mak ɓaalu na u kumum, ɓi gusun lu. 25Wu la jaam ma i mud kwa’aɗu kam Koǝl, la na u waɗam gǝrmaan i mud ɓomaan i ɓaalu, zub mbuk ɓi i mud, lakunla ɓi tǝɗu ma takkoǝl, zub mbuk ɓu, i mud ɓi ɓǝsǝn kun ɓa lu.” 26[...]

A maas nyap la Yeso

27A kad a tuban i Urshalima, ki Yeso sa kwa’at i kun La la Koǝl, ɓi daatban ɓa mudkid, ɓi ɓoɓa shik nzu la ɓi ɓoji yu bǝni.

28A maasi na, “La yap nyap la wu pak gǝr ɓiɓi gha, ya la pa nyap pu ɓu pa gǝr mi?”

29Yeso kaɗan ɗe na, “Mi maas na wun kini mwak. She wun kaɗan ɗa, mi shaɓan ɗiwun la nyap la ya la mi pak gǝr ɓi gha. 30Baptisma la Yohana purun i takkoǝl ne, ko purun i ban ɓo? Shap na ɓa!”

31A shap i nzwak ya, a na, “Su la shap na, ‘Yi purr i takkoǝl,’ yi maasu na, ‘Wa ke ki wun sun yak kun li ɓa?’ 32Ama su la shaɓan na, ‘I ban ɓo,’ a paan lo.” Ye ɓang wup ɓi ɓo, i mud na koyab ɓo daal ma na Yohana muntum la Koǝl na.

33She a kaɗan ɗi Yeso na, “A sun daal la.”

Yeso shap na, “Mi ma mi gha shappi wun, la yap nyap, la mi pak gǝr ɓiɓi gha ɓa.”