Mark 8

Yeso pa gǝrliin ɗi ɓo lum ndii lum njiri yiin

1I ɓaal tangal ɓa, bǝlǝn ɓo gywak kad a raam. Ki ya gha la gǝrma ye li ɓa, she Yeso tu’ul ɓoɓa ki bili i shappe na, 2“Shuur ɓoɓi wal ma; duk taat laya lami i bana, ki ya gha la gǝrma ye li ɓa. 3Mi la ma’am, ɓe ɓeer ma la, la nzal, ye tukon i mud njar, lakunla ɓoɓaan i ɓaal ya pur na ban ma naaɗa.”

4Ɓoɓa ki bili ɓa, kaɗan ɗi na, “Ama ban ma, ɓo gha ɓa mi, su pad burodi ma gam ɓoɓi ke?”

5Yeso ɗwa’ar ya na, “Wun la burodi sha’a?” A kaɗan ɗi na “Su gha na kyastaat.”

6I shappi ɓoɓa raam ɓa, ɓe nǝk i nzaal. Ma i ɗab burodi kyastaat ɓa, i kaak ɓi Koǝl, she i ɓun ya, la i pa ya ɓi ɓoɓa ki bili ɓe shik i dum ɓoɓa, she ɓoɓa ki bili ɓa pak wa. 7Ya gha la mbasak nji gap kwad; i kaak lakunla nji ɓa, la i shappi ɓoɓa ki bili ɓa, ɓe gǝppi ɓo. 8Ɓoɓa li, she ma gam ya. Takwad wa, ɓoɓa ki bili tar ɓa ki swab i nzaal, ɓi wal tu’ur kyastaat. 9Ɓo saam lum ndii lum njiri yiin i bana. I mak ya ɓe bwa’al, 10she yi la ɓoɓa ki bili, ko i ɓaal kurluk biin, a ɓeer i kab ɓa Dalmanuta.

11Ɓi Farisawa ɓa yu, a swabtak ban maasi la alama ma takkoǝl ɓe kumban pya’asi gha. 12Yi ghǝǝm shangmi, yi na, “Wake ki ta’a mi ɓi ɗwa’ar ban pak gǝr sheel? A shap mamiin ɗiwun, ya gha pa alama ɓi ɓa.” 13She i bwa’al shik ya, i ko ɓaal kurluk biin ma, i dal shiim ma.

Yiis la Farisawa la Hiridus

14Ɓoɓa ki bili ɓa laɓar ban yuun burodi, she burodi mwak ma ya gha la yi i ɓaal kurluk biin. 15Yeso tangas kid ti ya na, “Pak na jing, nǝk na rii la yiis la Farisawa la la Hiridus.” 16A ki shap kun mi i nzwak ya, na, “I shap wami lakunla su gha la burodi ɓa.” 17Yeso daal na gǝrma ye ki shap i nzwak ya ma, she i ɗwa’ar ya na, “Wake ki wun shap kun, i mud na, wun nga la burodi ɓa? Wun sun daalla ko wun sun pwan ɓaali kasa ɓara? Ɓi ɓaal wun giɓǝn ne? 18Wun nga la mus ama wun nga sun ban ɗa, wun nga la kid ama wun nga wakkid ta? Wun nga rangas kun ɓara? 19Ma ɓun burodi twangan ɗi ɓo lum ndii lum njiri twangan, mbasak ɓunni ɓa gab-gab ɓa, wun raam ɓi wal tu’ur sha’a?”

A kaɗan ɗi na,“Tu’ur lum ko rwap.”

20Yeso kǝr shappe na, “Ma ɓun burodi kyastaat ti lum ndii lum njiri yiin, mbasak ɓunni ɓa gab-gab ɓa, wun raam ɓi wal tu’ur sha’a?”

A kaɗan ɗi na, “Tu’ur kyastaat.”

21La i shappe na, “Pyang laa wa, wun sun pwan ɓaali ɓara?”

Ban pa ɓǝs si taap maan i Basaida

22A yu i Basaida, she ɓoɓaan yuun ɓomaan ma yi taap na ɓi Yeso. A kam Yeso ɓi dulu’i.

23She Yeso bwal ɓuk taap ma, i puruni takwad gari ma. She i ta taɗa ɓi mus, i swab ɓu’i ɓi i mud, la i ɗwa’ar ɓoma na, “U sunum gǝrmaan ne?”

24Ɓoma sun takkoǝl la i shap na, “Mi sun ɓi ɓo, ama ya wa nggun na, ɓi ki nggwan.”

25Yeso kad i zub mussi ɓoma la ɓu’i. She mus ɓoma ta, i kad i bwal ban sun ban, she i sun koyab gǝr nzaraat. 26Yeso tumi ɓi ɓeer i la, i dab ban shappi na, “Gin ko i ɓaal gari ɓa.”

Shap la Bitrus i mud Yeso

27Yeso la ɓoɓa ki bili, li dum, a ɓeer i ban ɓa kab Kaisariya Filibi. I mud njar i ɗwa’ar ya na, “Ɓi ɓo ki shap na mi yanna?”

28A kaɗan ɗi na, “Ɓaan shap na Yohana ma pak baptisma; ɓaan shap na Iliya; ɓaan waki shap na, maan na i ɓaal ɓatum la Koǝl.” 29I ɗwa’ar ya na, “Ama wun fa, mi yanna i sun lawun?”

Bitrus kaɗan ɗi na, “Wuna Kǝristi ma.”

30Yeso tangas kidte, i mud na, ɓe gin shap kun i muɗi, ɓi ɓo maan ɗa.

Yeso shap ban wu li

31She i bwal ban yi’ǝl ɓo na, Munɓo la Ɓo ɓi bungǝn, i mud bǝlǝn gǝr, ɓi ɓoji, la ɓi daatban ɓa mudkid, la ɓi ɓoɓa shik nzu ɓi ɓiin na yi. Ye wal ni ɓi wun, i takwad tangal taat kwa, yi kad lwak na ɓaal ɓawuun. 32I shap kun mi gǝli-gǝli wama ɓo ɓi daal la, la Bitrus tu’uli i gyang ban i ngang ɓi mud.

33Ama ma Yeso pilǝp i sun ɓoɓa ki bili, she i ngang ɓi Bitrus i shap na, “Kad i takwaɗa sheɗan, u sun mak ɓaalu gǝrɓa la Koǝl la, ama i gǝr ɓa la ɓi ɓo.”

34She Yeso tu’ul bǝlǝn ɓoɓa la ɓoɓa ki bili i shappe na, “Ɓoma la na yi bilin ta’a, she yi la ɓiin ma muɗi, i ɗab nggun ma zǝt ɓo li ki bila.

35Lakunla koyab ɓoma yad ban yak wuus li, yi ɓwaran ban la yi, ama koyab ɓo ma ɓwar ban la wuus li lakunlaa, la la ɓwaɗan kun, yi kumun yak wuus. 36Mana ɓwad i ban ɓoma kum munnza pyang, ama ki ɓwar ban la wuus li? 37Ko mala ɓo pa i karkun wuus li? 38La na ɓomaan ɓangam nzuuna, la ɓi kun ɓa la, i ta’a ma ɓo gha ɓang wup Koǝlla, la ban pak ɓǝsǝn kun mi, Munɓo la Ɓo ɓi ɓangan nzuuni, ma yi la yuum i ɓaal gul la tǝɗi, la ɓi muntum ɓa la Koǝl.”