‏ Luke 1

Luka na Vali Namana etaloato Teofilo gena

1Vele talimamu Teofilo, goi atalo-venimuna. Taunilimalima vogo na Iesu na ekalarato kalara ita vepakarai gaura valira warau getalorato. 2Tovotovonai taunilimalima matara na gegitarato gaura e gevopatagirato valira gelegelerai gevega-riparato. 3Gaura pakurai au maki atugamagina, namana evetaina, Vele o, rakagau rakagau gewalato gaura veavugara patavu gitagitara, gaurai gewalato gelegelerai ama talorana goi gemu. 4Gaurai ewagumona pono ripa, gevega-ripamuto kilara votaunatauna vegata.

Ioane Bapatiso gena wala gekilagi-matagaiato

5Heroda, Iudea tanoparana evele-agiawai laganinai, Rupu Veaga velena ta etaluwai arana Sakaria, Abia gena kwalu talimana. Garawana arana Elisapeta. Ia maki Aarona kalakalana, Rupu Veaga velena geria kwalu garena. 6Ira ruala maki kala rorirori talimara Palagu wailanai. Velekou gena rova e vevega-nagi maparaparara gegapi-ragerawai maaora maparara na maki. 7Na ira ruala vou ati naturia, kwalana Elisapeta maki egaerato, e ira ruala maki warauna gevelepara e logeapara-vagito.

8Toma ta Sakaria gena rupu inagulura ekalarawai Palagu wailanai Rupu Veaga aonai, kwalana gena kwalu geria toma pakunai. 9Gaurai Rupu Veaga velera geria kala gelegelenai Sakaria gevirigiato, mulamula maponana namana pene kapua. Gaurai elaka-togato Velekou gena Rupu Veaga aonai, 10taunilimalima maparara mulimuli ai gerapaliwai aonai mulamula ekapuato.

11Aonai Velekou gena aneru ta ia genai ematagaito, mulamula kovuna maponana patapatana veagana ripana kavanai eruga-tagowai. 12Sakaria na egitaato aonai nugana epara-vagito e ekalito. 13Na aneru na evaikilaato, netiwato, “Sakaria, ragai pono kali, kwalana gemu rapali Palagu na pekamonagia. Garawamu Elisapeta na natumu ta pene gapia, pono araa, arana Ioane. 14Goi pono verere, mapono verere, taunilimalima vogona na maki ia gena wala pia verere-agia. 15Kwalana Velekou wailanai ia maki vele kamu iwavaginai pene mia. Ia maki vine nanuna ati pene niua e niuniu gaura gaokara maki aikina vagi. Ia tinana tinagenai roe voa, Veaga Palaguna na pene vonu. 16Ia na Isaraela talimara vogona pene vaiwaikulera Velekou, ira geria Palagu, genai. 17Velekou wailanai pene laka Elia peroveta talimana gena kwalimu e gena tiavu vetaina. Tama manatura ia na mapene vega-tanu-koukoura. Karoverave talimarai maki pene vega-tanu-kulera, kala rorirori talimara pia kilagira; ne ia na Velekou gena taunilimalima pene kala maavura.”

18Sakaria na aneru evaikilaato, netiwato, “Au raka pana ripa-tiwa? Au velepara vagi, garawaku maki logeapara vagi.”

19Aneru na evega-geleato, netiwato, “Au Gaberiela, Palagu wailanai arugana. Palagu na au petuguku, pana vaikilamu evali namana ea pana varamu. 20Na au geku kila ati ovega-taunataunaana gaurai, goi murumu pene kapu, ati pono kilakila, pene ago ekila ganina peneve wala tomanai. Akilagirana gaura geria lagani taunataunarai pia wala.”

21Ekala ewalawai gaurai, taunilimalima gevealo-kavato geveroliveroliwai rakagau gaurai Sakaria Rupu Veaga aonai warigi ekwaipo-gitato. 22Elakatito aonai, ira ati evega-vegupurato, gaurai geripato, ia epoe-karaleto, rakagau kwauta egitaato Rupu Veaga aonai. Gaurai ia gimanaimo ira evega-riparato, ati ekilakilato, kwalana ia muruna ekaputo.

23Sakaria gena votoma inagulura Rupu Veaga aonai gaura evega-aikirato mulinai, ewaikuleto gena vanugai. 24Voia mulinai ia garawana Elisapeta warauna ekuviato, gaurai uve imaima numai etalu-veavugato. 25Ekilato, “Velekou na penugagivitiku, evetaina au geku ai pekalagia. Geku nugarage taunilimalima wailarai pegapi-pakaa.”

Iesu gena wala aneru na ekilagiato

26Elisapeta matinagena uve taula toitoi aonai, Palagu na aneru ta arana Gaberiela etuguato vanuga ta Galileia aonai arana Nasareta. 27Vavine ta vonai. Ia mataogavuna arana Iosepa, Davida gena kwalu. Vovavine arana Maria. 28Aneru ia genai eagoto, evaikilaato, “Maino goi gemu ai, Velekou goi goti e gena vega-nama para goi gemu ai.”

29Maria na ekila ekamonagiato aona warigi evekwalavi-gitato, etugamagito evega-nama ganina eerakagau. 30Aonai aneru na maevaikilaato, netiwato, “Maria, ragai pono kali, Palagu gena vega-nama goi atamu ai petaoa. 31Goi pono kuvia melo ta pono gapia, pono araa, arana Iesu. 32Ia arana peneve rage e pia kilagia Goloka Iwavagi Palaguna Natuna. Palagu talutalu na king ai pene vega-agoa, ia kalakalana Davida vetaina. 33Ia Vele Taputapu ai pene ago, vele talutalu Iakobo petena geria, gena Basileia ati pene aiki.”

34Maria na aneru evaikilaato, netiwato, “Eeraka pene wala-tiwa? Au tau ta goti rogoti gara genokou.”

35Aneru na evega-geleato, netiwato, “Veaga Palaguna goi atamu ai pene kwara, Palagu tiavuna na pene porogimu. Vovetainai goi gemu na pene wala melona maveagana Palagu Natunai pia kilagia. 36Pono ripa, goi vavine kavamu Elisapeta, warauna pelogeapara vagi, na matinagena. Ripamu, taunilimalima na gekilagiawai, ia kapakovago garena negetiiwai, na etoma ia gena uve taula toitoi ea. 37Kwalana Palagu gau maparara kalakalara ripana.”

38Maria ekilato, “Au Velekou gena vetugunagi vavineku, pe pokilagia vetainai geku ai pene wala.” Ne aneru na eraokwaniato, elakato.

Maria Elisapeta genai eagoto

39Oranaimo Maria ekuliitito, Iudea golo vanugana gautai elakato. 40Vonai Sakaria gena numai everageto, Elisapeta evega-namaato. 41Elisapeta na Maria gena vega-nama kilana ekamonagiato natuna ia tinagenai ekalavo-kalavoto, aonai Elisapeta Veaga Palaguna na evega-vonuato, mamina egapiato. 42Ne ekila-kamukamuto, netiwato, “Vavine maparara aorai Palagu gena vega-nama goi atamu ai kamu iwavagi, e pono gapia melona atanai maki! 43Na au geku nama rakagau gaurai Velekou tinana au geku ai pevogomai? 44Gemu vega-nama kilana pakamonagia aonai, natuku tinageku ai evererena gaurai ekalavona. 45Goi overerena, kwalana ovega-taunataunato, Velekou gena kila pene vuvuka notiwato.”

Maria gena verere marina

46Ne Maria ekilato,

“Au aoku na Velekou evega-rageana.
47Au palaguku na maki au evega-magulikuna
Palaguna everere-veniana,
48kwalana au, gena vetugunagi vavinena,
geku talu lealeai roe tugamagi-tagokuna!
Ewagumona, pene ago, gulu maparara
Palagu gena vega-nama au ataku ai nepiatiwa,
49kwalana kala kamu iwavagira
Tiavu Palaguna na au geku ai pekalara.
Ia arana veaga.
50Gena vetuga ia kalina na gekalina
talimara atarai pene taoa,
pene ago gulu maparara aorai.
51Ia gimana egapi-itirato tiavuna na
veagi talimara eako-lovolovorato.
52Ia na vele kamura geria tanutanu
kapura na eroli-piarigorato,
na ati gevega-agirana talimara egapi-itirato.
53Vito talimara maki gau namara na evega-vonurato,
na rinaga talimara ia na gimara kovagora etugu-waikulerato.
54Gena kilagavu ita tupura e gatara Isaraela talimara
geriai ati etugamagi-lekwalekwarato,
e ia evogomaito gena vetugunagi talimara
Isaraela pene veakavara ulanana,
55kalakalara ekilagavu-venirato gelegelena.
Aperaamo makalakalana
pene vetuga-vanagivanagira, netiwato.”
56Maria vonai Elisapeta goti uve toitoi getalu-agirato. Mulinai gena vanugai ewaikule-waito.

Ioane Bapatiso ewalato

57Elisapeta gena gapi tomana warau ekwarato gaurai, melo ta egapiato. 58Ne lagana talimara e gena talimana valina gekamonagiato ia ria geverere-koukouto, kwalana Velekou gena vetuga kamu ia genai ewalato gaurai.

59Toma vega-taula vativatinai melo tauniparana kopina kiata pia voro-vagia ulanana getanu-kouto. Votoma maki arana pia keaa Sakaria, tamana arana pia kea-vanagia negetiwato. 60Na tinana ati eririwato gaurai ekilato, “Aikina! Ia arana Ioane.” 61Ira gekilato, “Na goi na pamili aonai neara aikina!” 62Aonai irana melo tamana gimaraimo gerenagiato, melo arana rai nepiatiwa. 63Sakaria na talotalo gauna eririwaato, ekilagiato, geveniato, gaunai evetaina etaloato, “Ia arana Ioane.” Aonai maparara gevevega-kalito. 64Vonai vou muruna evekala-pakato, maena maki evelugato, ne ekilakilato Palagu evega-namaato.

65Aonai lagana talimara maparara gevevega-kalito vokala valina Iudea golo vanugara maparara aorai eraka-lovolovoto. 66Valina gekamonagiato talimara maparara na getugamagiato, gekilato, “Emelo rakavetaina?” Kwalana Velekou gimana tiavuna ia atanai.

Sakaria gena mari

67Ioane tamana Sakaria Veaga Palaguna na evega-vonuato, gaurai Palagu gena kila evega-matagaiato, netiwato,

68“Velekou, Isaraela talimara
geria Palagu, ita vega-namaa,
kwalana ia gena kwalu talimara evogomai-veniarato
pene voi-waikulera e pene vega-magulira ularana.
69Vevega-maguli talimana matiavuna goti etuguato ita gera,
ia gena vetugunagi talimana Davida kalakalana.
70Ekilagavu ia gena peroveta talimara veagara na
rauvagi gekilagi-matagaiato:
71Ita ia na ekilagi-gavurato,
gevekuku-venirana e geparu-venirana talimara
gimara na pene vega-magulira netiwato.
72Ekilato maki, ita tupura gatara pene vetugara,
e gena kilagavu veagana ati pene tugamagi-lekwalekwaa.
73Ia na ita kalakalara Aperaamo ekilagavu-veniato,
74netiwato, gevekuku-venirana talimara
gimara na pene vaimagulira.
Gaurai vetugunagina pita ago-venia, ati kalira.
75Wailanai pita laka maveagara e marorirorira maki
gera maguli tomara mapararai.
76Natuku o, goi maki Goloka Iwavagi Palaguna
gena peroveta talimanai pia kilagimu,
kwalana pono laka-kune Velekou gena raupara
pono kala-maavua ulanana.
77Gena kwalu talimara pono vega-ripara,
ia na geria rakava pene tugamagi-piatogara
e pene vega-magulira.
78Kwalana ita gera Palagu gena vetuga kamu ita gerai.
Garo eragena maekana vetaina vevega-maguli ita atarai pene mia.
79Ne mukunai e kwarega aonai getaluna talimara
maeka na pene rala-talira,
maino rauparanai pene vaira.”
80Ioane ekamuto mapalaguna e matiligana. Tanoleanai etaluwai, pene ago Isaraela talimara geriai ematagaito tomana.