‏ Mark 13

Yesuye Godeeyo tei moso tegei oso tokenee palai goo taka

(Mat 24:1-2, Luka 21:5-6)

1Beeame omapoo Yesu tei moso tegei pogoloso dimeleeno, o hamamee dili odoo heeso sibileso yimapoo egeesee takaso, “Eligili odoo, ibada tei moso yoso tegei medee tekepo hagee, no ege, osoloso yo toowa medee tekepo, no ege,” diso.

2Eseme Yesuye to nei yimapoo egeesee takaso, “Tei moso tekepo tegei epedee no hagee ogo, hamamee guobigileiso, eseega yo hedepeso yo hee ma topudoo malaime,” diso.

3Osoloso Yesu Olipi mubi dokodoo tei moso tegei ma hodiokoo bolone badoboome, Pita, Yemes, Yonee, osoloso Endulu diayo dibusomo sibileso yimapoo woosaso, 4“Nayo imapoo takee, goo susuga hagoso kopolone ka peledobalaiyo? Osoloso goo susuga hagoso sibilei koola topooga iyo goo mudu opusomodi kasi ogoloso ka gooleedalaiyo?” diso.

5Eseme Yesuye dimapoo to nei egeesee takaso, “Niba obeeamo, odoo heeso nimapoo gamenee takeeyaga. 6Odoo bei oso sibileso ‘A Kelisoso’, dee takalaiso. Diayo egeesee takooga, odoo susuga peegoo gilimado dileiso. 7Osoloso nee mosobia koola mapoo ha to osoloso, mosobia eli sage mapoo ha to dee taka duga, niba haga na ebige. Goo susuga peledabalaiso, esino hoo poogoo ogosonee. 8Osoloso mosobia heeso mosobia hee mapoo nei ha to nei ha to dalaiso, osoloso mipoo toowa hamapoo mosobia opusomo opusomodi mapoo mibia toowa sibileiso. Osoloso nei me pagalaiso. Esino goo susuga hagoso peledobooga, soboso holo soomagalame si dadala masi si dadalaiso, bei dala beeame mimooloogoo oso.

9Esiga goo susuga hagoso peledobooga, niba obeeamo. Edebeeyo niba goo palabalai mapoo iyado dileso, howo gisili moso tegei ma kulodu niba wologolaiso. Osoloso amapoo tei too maga niba wiligi toowa tebisa odoo dibada mudu giyopoo gilimado peleso mo goo dimapoo takalaiso. 10Mi hoo pagalai hoogoo mologa, mo tekepo hagee daga edebeeyo mi susuga mapoo takomo dileso, odoo susuga duloso tebia mapoo. 11Osoloso edebeeyo niba goo palabalai mi mapoo ido duga, niyo takalai goo haga na koude. Bei niyo takalai googoolee tekepo nimapoo Godeeye tenelaiso. Esino niba nibusomo to takalaime, Dio Tei oso nibulo toboloso to ka takalai.

12Omeiye omolo teli mapoo ido dilame tiasalaiso. Osoloso omaye owolo sabolo teli mapoo ido dilame tiasalaiso. Osoloso holaisoso mesilega pogoloso, oma dio owee dio teli mapoo gilimado dileiso. 13Bei niyo amapoo tei too maga odoo susugaso niba hegileiso. Esino odoo agayo o tei too kalawoloso dalaso dileso hoo poogoo mapoo ka peledobooga, yo gie badeli talaiso.

14(Hesigeli odoo, no goo hageeyo bei medee gooleede.) Tei moso mapoo Godee hegili bi tokenee mudu opusomodi bi oso melega pagalai mi mapoo molo ogoga, Yudiya mi omapoo debeli odoo mubi dokodoo saga kukulo pele. (Bi tokenee hagoso Godeeyo howo woola tei moso tokenee palaiso, esiga Yu odoo oso tei moso kulodu gasibileso Godeeyo hu dokodoo poudalame sibilame goomogalaime.) 15Osoloso odoo moso hau mapoo badoga, bi talame moso kulodu na gadi. 16Osoloso odoo homolee mapoo nei howo sogomo siloga, o mosopoo gidei na tadi. 17Esiga sooloo dolo, sobo koowasi moodooga sabolo osoloso sobo holowee too neli sabolo beeame omapoo kukulei beeame tekepo agalaime. 18Esiga Godee mapoo toodagee. Bei goo hagoso wau beeame mapoo sibilega pagalame. 19Bei beeame omapoo dala goo toowa sibileiso. Esiga mi toowa bei mimooloogoo omaga simi, dala toowa hageesi edebeeyo egele. Esiga dala hagoso dileso hoo poogooga, hamamee dala goo hageesi see agalaime. 20Esiga Godeeye dala beeame deiyepo moodoolaiso. Esino yayo beeame sage magoo diepi, odoo susuga gie badele pegeli. Esino dala ma kulodu Godeeye hesiga odoo abo gooleepugulone dala beeame see deiyepo moodoolaiso. 21Beeame omapoo edebeeyo nimapoo sibileso, ‘Ege! Keliso hagoso,’ o ‘Yo koo badoso,’ dee takooga, niyo dimapoo tei na te. 22Bei gamenee Keliso sabolo osoloso gamenee Godeeyo to tosili odoo oso sibileso Godeeye hesiga odoo wulo gilimilame goo toowa mudu opusomo opusomodi moodoolaiso.” 23Esiga Yesuye dimapoo egeesee takaso, “Niba obeeamo! Goo hagee sibilei molome, ayo goo susuga nimapoo takaso.”

Yesuye see sibilei goo

(Mat 24:29-44, Luka 21:25-33)

24“Beeame omapoo dala goo toowa me pogoloso, hamamee,

‘osoko neligidi pigileiso, osoloso a sabolo gadee pigileime. 25Osoloso giwo keima dokodooga tikedibileiso, osoloso kitulugu bi toowa keima dokodoo egee molo Godeeye halabileiso.’
26Beeame omapoo odoo susuga oso Odoo Holo, a kolobo ma kuloduga gadeepugu sabolo kitulugu sabolo siboga agalaiso. 27Osoloso ayo sibileso, mo momaiye susuga diye dalaiso, Godeeye hesiga odoo mi toowa mapoo egee do iyadalame.

28Esiga niba sokai (homo) maga goo goolee medee te. O du sisigaloso mouloso see pisigaga, mi kibilei koola tooboo dee goolee. 29Egeeseega ayo nimapoo taka goo oso peledaba ogoga, Odoo Holo, a sibilei dia koola tooboo dee goolee. 30Ayo tei goo nimapoo taka, epedee beeame hamapoo odoo hagee do wedilega doga, goo susuga hagoso peledobalaiso. 31Kei sabolo mi sabolo mauwe pagalaiso. Esino mo to kookaiyo moloso osee malaiso.”

32Osoloso Yesuye egeesee takaso, “Odoo susuga goo hagoso sibilei beeame sabolo osoko howo sabolo gooleedele. Osoloso momaiye keimi ma dokodoo egee do sabolo, Godeeyo owolo abolo gooleedele. Esino hedepe ma Godeeye gooleedoo. 33Osoloso beeame oso sibilei nibolo gooleedele, esiga niba moodoo doloso bolone ka deebee. 34Odoo Holo, ayo sibilei egesi moloso, edebeeyo mi hee mapoo dulone, o tou teli odoo mapoo moso hagee gibamelee, dee takoloso dileiso. Osoloso yo tou teli odoo mapoo moso egee gibadalai maga tou opusomo opusomodi pileiso. Osoloso osulu gibalai odoo mapoo yayo see wedi sibilei maga egeesee takalaiso, ‘Medee be!’

35Esiga mosowo oma masi aso. Esiga niyo medee be! Bei ayo sibilei beeame niba gooleedele. Habe sibumobelee, o gesi domo sibumobelee, o kudi takooga sibumobelee, o gesikolodee sibumobelee. 36Osoloso ayo saga sibileso ogoga, niba tiesa molo agalai tekeponee. 37Ayo nimapoo to taka see odoo susuga mapoo takooso, niba moodoo doloso, bolone ka deebee,” diso.