1Ti 5 | KMG | STEP | Ŋicqizec moc dâŋ âzâcnemurâ fâfâcnehec mi ecnezemec, mamac-nane muhuc urucko mu tutuc ecnezemec, ŋicmotec hahac ɋafâc-nane muhuc sâcjeŋicko jaza bâtiŋ ejarezemec.

‏ 1 Timothy 5

Mu tutuc â mu bâtiŋ irec dâŋ

1 Ŋicqizec moc dâŋ âzâcnemurâ fâfâcnehec mi ecnezemec, mamac-nane muhuc urucko mu tutuc ecnezemec, ŋicmotec hahac ɋafâc-nane muhuc sâcjeŋicko jaza bâtiŋ ejarezemec. 2 Ŋokac qizec neŋgocfâc-nane muhuc iŋuc jaha uruc jauŋdâŋ jazazemec, ŋokac sahac ɋâri seŋfâc-nane muhuc rucge bahuc dâŋ wiac jazazemec.

Hozec bâmec bajarezo

3 Hozec sâsec-jopahuc dâŋjeŋic dopeckezemec, hozec jâmbâŋ jaŋere mukopac. 4 Hozec moc naru motec me ŋosafâcne juniŋmu, ine jaŋe qanaŋ jaŋacne ficko miti gie bahuc ŋic ŋokac qizefâc-jeŋic jauŋ-jopanšepieŋ, ehuc juwicnao wiac ejarekicne irec tofa bazunšepieŋ. Anutu e irec maname sâckeocmu. 5 Hozec fârine ine e jahackoaŋ juhuc Anuturao roweckeekac, ehuc ŋafe furec nunumu wâwâsic ecneekac. 6 Á hozec moc sasec gie baocmu ere ine ɋâricnezi hâmocne mucnezo. 7 Dâŋ i wâc jaza sanaŋketec manarâ bahacmâc junšepieŋ. 8 Moc e wiacfâcne â soctofafâcne hone jauŋ kime dopec mi ejareocmu e miti beherâ qâpuc sanaŋ ewec mucnezo.

Hozec fuŋne-jeŋic manazo

9 Hozec moc jara-ticne 60 bazuwec, erâ ŋic mocjahahec juwec, iŋucne sawa šâŋe-ticne bâmec papiao râezo. 10 Erâ eehâmo gie bawec me mâcne, irec fuŋne taniŋkeocte kecšiŋuc mu wioc ezo: Naru motec rocjoparâ gume jowac ejarewec me mâcne? Erao ŋic furune fisipie hezu hewâneŋ ejarewec me mâcne? Mitiŋic bâmec bajarewec me aricne? Jauŋ gie fuŋne fuŋne bawec me mâcne? Fuŋne-jeŋic iŋuc hâcne manazo. 11 Hozec sahac ɋâri jaŋe šâŋe-jeŋic bâmec papiao feocte mupie ine qatara-jarezemec. Iŋucne jaŋe sasecte ejareme Kristo qâoma ecnerâ ŋicte sahac bapa eeŋgopieŋ. 12 Erâ mârâc dâŋ mupaŋkembiŋ i qâsuapie bahacnehec eekac.

13 Erâ wâc gie tâmiricte ficbiri juhuc oma qâoma erâ jueŋgopieŋ, erâ i sawa mâcne, dâŋ jawane â simbiŋne kosa wosepie feekac. 14 Irec no šiŋuc mukopac: Hozec sahac ɋâri jaŋe ŋic mocwâc rorâ naru motec rocjoparâ dete mamac â ro rikec qâ rikec enšepieŋ. Iŋuc ehuc jupie kisâ jaŋe sâqocnere ojowa baniŋmurâ dâŋ basarâ behenšepieŋ. 15 Hozec gâcne jaŋe ine biac hata qâsoriembiŋ Sataŋ bâjâpeeŋgopieŋ. 16 Hozec moc e miti ŋokac mocte ficko juhuc gie bafickeme ine eki bâmec bacnezejec, â qâqâhâc-jeŋickonec mi rozejec, qâqâhâc-jeŋic i hozec waha qaqane jaŋere ezejec.

Soŋaŋ jaŋere dâŋ

17 Soŋaŋzi gie-jeŋic bapie biaŋkeme wiac bafehuc ehâmo-jarezo, ine miti mumu â qaqazu gie paŋšâic baeŋgopieŋ jaŋe hâcne iŋuc ejarezo. 18 Miti papiao dâŋqâreŋ šiŋuc hâcne fokac: “Bulimakaozi gi bagarehuc sopâc kecɋaŋ nâzo mume mi sakarecnezemec.” Erâ moc šiŋuc: “Gie bapa ŋic e furi fuacneme sâckeocmu.” 19 Ŋic mocjahazi soŋaŋ moc dâŋko râezo mume mi manacnezemec, ŋic 2 me 3 jaŋe mupie ine manarâ giene bazemec. 20 Moczi bahac bâfuame âgo guru jaŋere maio mu bâtiŋ ecnetec gâcne jaŋe manahuc hâwic-jopazejec wâc. 21 No Anutu â Jesu Kristo ere maio â aŋelo bufuŋfâc-ticne jaŋere maio kecšiŋuc mupaŋke-garekopac: Dâŋ gaza qâmoc ekopac i aimuŋ soŋaŋkehaŋ moc mi wahazejec, ehuc maŋgere ŋic ŋokac wiac sâctiri moc mi ejarezemec. 22 Go ŋic miti giere fâro ehuc biac mi jambuŋ-jopazemec, jaŋere kiŋzi gore faio fezacte. Gahacne maŋ sahac soŋaŋketec ɋaɋacnea fozejec.

Hucte dâŋ â sâqocne fufuare dâŋ

23 Go bukiki â huc šâic gâbâ egareekacte opâ sawa mi nâzemec, waiŋ opâ afecne mac nâzemec wâc. 24 Ŋic tucne jaŋere sâqocne i fuŋne babataniŋ dameŋ mi maickeha qanaŋ fua taniŋkeekac, tucne jaŋere soŋsoŋ foku šâhec fuaocmu. 25 Eme eehâmo gie i iŋuc jaha fua taniŋkeekac, â iŋuc mi eekacko soŋsoŋ foku šâhec fua taniŋkeocmu.