2Cor 11 | KMG | STEP | Ŋoŋe manahapie mutucdâŋ piticne ŋazape. Sifu mac mananšepieŋ.

‏ 2 Corinthians 11

Miti furune moc mi fokac

1 Ŋoŋe manahapie mutucdâŋ piticne ŋazape. Sifu mac mananšepieŋ. 2 No ŋoŋere erâ qizec qaekopac, erâ qizec qaqa dâŋnane i Anuturaonec. Noni ŋoŋe Kristore biŋefâc erâ pectâc juniŋte ŋic mocjaha ehec bâturec-ŋopapo. 3 Ʒi ine homazi Ewa sioc ecnehuc bâdockewec iŋuc jaha ŋoŋe ŋic gâcnezi eatuc-ŋopapie maŋŋeŋic fâuckeme Kristo râŋgeŋ rocnenšipiŋte manabâc ekopac. 4 Ŋoŋerao ŋic moczi fisirâ Jesure fuŋne nâŋe ŋazaeŋgopeneŋ ijaha mâcne, hawarine moc ŋazaocmu, â Mâro nâŋeraonec rombiŋ i mâcne, furune moc ŋareocmu, â Biŋebiaŋ nâŋeraonec manambiŋ i mâcne, maracne moc ŋazaocmu, i ŋoŋe mi qatarahuc mâc manapie sâckeekac. 5 No nahacnere manape norao wiac i me i basahuc aposolo fekicne sâko jaŋere jujuwicnao jukopac mi eekac. 6 No miti muminširiŋkerâ mumu i mi mecne fonarekac, â mitire fuŋne mamana ine manaekopac, erâ irec fuŋne baratie-fârehuc mâmâc-ŋeŋic bataniŋke-ŋarepo.

Miti gie bapa burecne

7 Me nahac wahamicne juhuc ŋoŋe ikisiŋ-ŋopahuc Anuture Biŋebiaŋ katucmâc ŋazapo i sâqorewec me? 8 Ŋoŋerao miti gie bapemurâ kikefuŋ gâcne jaŋe jâmbomac moneŋ mafa jowac ropo. 9 Ŋoŋerao ine wiac basac bahameŋ juhuc mubâre mi eŋarepo. No batac qatac juhape Makedonia mâreŋkonec âgofâc-nane fisirâ wiac nare gumec embiŋ. Á ŋoŋerao ine mâc juhape nore šâic mi manambiŋ â jufehuc wâc mi mananiŋte mukopac 10 Kristore dâŋfâri maŋnaneo foha mukopac: šeridâŋ inane Akaia mâreŋko moc mi bawaha-narezo. 11 Muŋgopieŋ,ŋoŋere mi enarehame iŋuc eekopac? Iŋuc aricne,i Anutuzi manakac. 12 Wiac eekopac i ehuc jupemu, erâ i mâc mâcne, ŋic gâcne jaŋe Paulore sâcko juŋgopeneŋ muhuc maŋjeŋic bafenšipiŋte siŋ qatara-jareekopac 13 Ŋic iŋucnezi aposolo burecne â miti gie bapa siochec juhuc Kristore aposolofâc nâŋere sahac hawari sawa eeŋgopieŋ. 14 Erâ i wiac furune mi eeŋgopieŋ, Sataŋ e jahacne wâc aŋelo tatamachec jaŋere hawari tinac eekac, 15 eme irec gie bapa ŋicfâc-ticne jaŋe iŋuc jaha tiŋnere kiŋaŋ qaqa jaŋere hawari rojueŋgopieŋ.

Korinti ŋic jaŋe gieŋic burecne mi bâsuec-jopambiŋ

16 Mupac i mocwâc mupe, nore manapie ŋic mutucne mi ezejec. Erâ sifu muzo murâ muniŋ, ehuc mana-narehapie sahac-nane piticne muteŋkepe 17 No ši dâŋ mupemu i Wofuŋte micsâcko mi mupemu, mâc mumuteŋ dâŋ fuŋkekicnere sifu mutuc erâ mupemu. 18 Ŋic gâcnezi sahackopec wiacte mumumbiaŋ dâŋ mueŋgopieŋte no iŋuc jaha epemu. 19 Oi, fuŋne mamana ŋoŋe, gâcnezi mutucdâŋ ŋazapie manapie sâckeekac hâcne. 20 Á kiŋaŋ qaqafâc-jeŋic bacŋopapie iŋuc jaha manapie sâckeekac, â ŋowac ro nâc eŋareniŋmu me eatuc-ŋopaniŋmu me ŋicbomboŋ eŋareniŋmu me imac-ŋopaniŋmu, i ŋoŋe manapie sâcke-fâreocmu hâcne. 21 Nâŋe gegec dodocnezi iŋuc sâko wemocko eŋarenšapeŋ, i mana sâqorehuc mukopac. Moc e wiac irec me irec penaroŋ eocmu, i no ezo murâ sâcne epemu. Dâŋ i mutucne, i mana-bipiehuc mukopac.

Paulozi šârâ šâpâo mâretec fehuc juwec

22 Jaŋacnere Judaŋic mueŋgopieŋ, no wâc ijaha. Jaŋacnere Israe ŋic mueŋgopieŋ, no wâc ijaha. Jaŋacnere Abrahamte ɋâric mueŋgopieŋ, no wâc ijaha. 23 Jaŋacnere Kristore gieŋic mueŋgopieŋ, no ši sifu maŋmutuc dâŋ mupe, no Kristore gieŋic sâc moc. No giere šâic manaekopac i sâc moc, â kâpâcwâru ficko feekopac i sâc moc, â šika kiekopac i sâc moc, â sipirickezo eekopac i sâc moc. 24 Judaŋic jaŋe dameŋ memoc repazi 39 numbiŋ, 25 dameŋ jahec â moc kâcbiŋzi nukicne, moc i qânâzi hehâmocnumbiŋ, dameŋ jahec â moc woke hericke fâuc eme hâwecko hurâ hu epo, ŋafe šoaŋ moc woke sâqoreme hâwecko qac qâsoriehuc jupo. 26 Erâ sopâc kâte hârâc tiki fotâcne qâqâwiric bazu bâfeŋ ehuc jupo, opâ rumio šârâ šâpâ faio fehuc jupo, râsi ŋondeŋko šârâ šâpâ faio fepo, Judaŋic ŋondeŋko šârâ šâpâ faio fepo, qâpuc ŋondeŋko šârâ šâpâ faio fepo, ŋic jujuo šârâ šâpâ faio fepo, tuhuo šârâ šâpâ faio fepo, hâwecko šârâ šâpâ faio fepo, mitiŋic burecne jaŋere ŋondeŋko šârâ šâpâ faio fepo. 27 Iŋuczi iŋuc ehuc hume serereŋ â huacbuc qâbucne juwarepo, ehuc ŋafeo guŋɋâri juju,nânâ opâre hâhâmo, hoe mâmâteŋte ɋarac ɋarac qaqa, ŋaqi bilaŋke babasa, iŋuc ehuc juekopac. 28 Erâ i sawa mâcne, šoaŋne šoaŋne kiŋaŋ fisihuc fâro âkefec enarepie hae sâc kikefuŋ jaŋere mana mezac ehuc juekopac. 29 Wemocko hae moczi qau bititicne juhapie âke uruerâ sâcne jupemu? Wemocko hae moczi qâsoriehapie sâcne ŋemâteŋkepemu? 30 Eme no irec wemo-nane musokapemu? Gegec dodoc-nane mocjaha musokape sâckeocmu. 31 Wofuŋ Jesu ere Anutu â Mamac, e mumuteŋ hatizi dâŋ jâmbomac mukopac i manakac. 32 Damasko haeo juhape ŋicwofuŋ Areta ere kiazi kâpâcwâru bacnuocte hae upeo somâ râewec. 33 Eme irec âgofâc-nane jaŋe kâdocko ŋihecnurâ sacrâpeo âke suecnupie hurâ wisepo.