2 Corinthians 13
Bahacdâŋ mumu fuaocmu
1Ʒi ŋoŋerao mocwâc fâpe jahec â moc eocmu. Fâ fisipe ŋic jajahec me jahec â moczi mocte bahacte fuŋne mupie dâŋticne munaŋmu. 2Ŋic bahachec â gâcne ŋoŋe mâmâc arecne 2 fâpo ira uŋ ŋazapo ijaha wiwicko juhuc mukopac, ši šâhec mocwâc fârâ mi akic-ŋopapemu. 3Nore maŋko dâŋ râeme muekopac Kristo hâcne, ere tâpiri fuame honezo mueŋgopieŋte honenšepieŋ. Kristo e ŋoŋerao gie-ticne rorokacne mâcne, tâpirihec baekac. 4Mârâc jâmbomac rokaweme maripoŋko qambiŋ, ši ine Anuture tâpirihec faharewec jukac. Nâŋe iŋuc jaha ere erâ rokaweeŋgopeneŋ irec ere erâ wâc Anuture tâpirio ŋesiŋnehuc jujure fuŋne ŋoŋerao bajaŋgeŋkenaŋmu.Uŋsawaŋ dâŋ
5Ŋoŋe mamanasiŋhec jueŋgopieŋ me mâcne, irec maŋŋeŋic esâicke honehuc fuŋne bataniŋkenšepieŋ. Me Jesu Kristozi maŋŋeŋicko juekac irec fârine basaeŋgopieŋ? Iŋuc eeŋgopieŋko sahaczi mitiŋic muŋarezo. 6Nâŋe ine sahaczi mitiŋic mi jueŋgopeneŋ, iŋuc hone tarac-nâponiŋte worickekopac. 7Anutuzi soŋaŋ-ŋopame bahac mi bâfuaniŋte numucnehuc jueŋgopeneŋ. Nâŋe honec-nâpopie mitiŋic fârine enaŋmu me mâcne, irec mi mueŋgopeneŋ, ŋoŋe mitidâŋ reŋkepie fârinehec eocte mocjaha mueŋgopeneŋ. 8Nâŋe iŋucnezi wemocko dâŋfâri râsi ecnenaŋmu, âgo ecnenaŋmu sawa fokac. 9Nâŋe tâpiri basahuc juhapene ŋoŋe tâpirihec juniŋmu i bunâŋec biaŋkeocmu. Erâ maŋŋeŋiczi soka sanaŋ eocte Wofuŋ numucneeŋgopeneŋ. 10No ŋoŋerao fârâ šâire-ŋarezipore qanaŋ šoricko juhuc uŋdâŋ qâreŋke-ŋarekopac. Wofuŋzi tâpiri narewec, izi imac-ŋopapemurâ mâcne, hume keteŋ eŋarepemurâ narewec.Jambuŋdâŋ
11Erâ dâŋ mutarahuc kecšiŋuc mupe: Ŋoŋe bubiaŋko junšepieŋ, erâ uŋsawaŋ dâŋ manarâ maŋŋeŋic ba emasaŋ enšepieŋ. Ŋoŋe maŋ mocjaha efârerâ wamao junšepieŋ. Eme Anutu e maŋjauŋ â wama runezi ŋoŋehec juocmu. 12Ŋoŋe mitio meo babac efârenšepieŋ. širec mitiŋiczi manasuc-ŋopa-fâreŋgopieŋ. 13Wofuŋ Jesu Kristore aki anonoc â Anuture maŋjauŋ â Tiri Mârore miriŋ i ŋoŋerao fohuc juzejec.
Copyright information for
KMG