2Ti 3 | KMG | STEP | Go šiŋuc manazemec: Dameŋ tarazo eha sâqocnezi sawe mâririackeocmu.

‏ 2 Timothy 3

Miti bâbâsifuc ŋic jaŋere dâŋ

1 Go šiŋuc manazemec: Dameŋ tarazo eha sâqocnezi sawe mâririackeocmu. 2 Ŋic kecšiŋucne juniŋmu hâcne: Jaŋe jaŋacnere sawa manoniehuc juju, moneŋ sasec, ruruc bâbâcne, sahac mumuteŋ, musurecne, neŋgoc mamac dâŋ qaqatara, nâme nikecne, araŋ bapa tâmiric, 3 maŋjauŋ tâmiric, kiŋ babaju, micko âkechec, nâ areŋne, qicqucne, wiac biaŋne qaqaisoc, 4 docbapa, enšaŋaucne, pepecne, sasecte aŋac kâcɋene bajuhuc Anuture aŋac mi mamana, 5 sahaczi miti hawari juhuc mitio sasanaŋ tâmiric juju. Iŋucne hâcne jupie honec-joparâ râpec-jopazemec. 6 Ŋic mukopac jaŋeraonec tucnezi kamierâ ficbiri juhuc ŋokac kosane, bahac fuŋne fuŋne bâfuambiŋ â saseczi ejareme ra qa ware qa eeŋgopieŋ, iŋucnezi jaŋere eniŋte mu bâdoc ejareeŋgopieŋ” 7 ŋokac dameŋ sâc mamana gie bahuc dâŋ fâri qizecnere fuŋne mi mana taraeŋgopieŋ iŋucne hâcne. 8 Mârâc jaha Jaŋe â Jambere jahe Mosere dâŋ bawahapic, iŋuc jaha ŋic mukopac jaŋe maŋjeŋic sifuckekicnere mamanasiŋte hata kâuc bahuc mutuc eeŋgopieŋ. 9 Erâ wiac eejeŋic wemocko boc efeniŋmu. Mutuc-jeŋicte fuŋne taniŋkeme ŋic sasawa hone-fâreniŋmu, Jaŋe Jambere jaherao fuawec iŋuc.

Paulo šârâ hâriŋ ŋemâcne fuacnewec

10 Go jupe juju-nanezi ine miti mumu-nane, juju-nane, giebapa-nane, mamanasiŋ-nane, buuruc-nane, maŋjauŋ-nane, sasanaŋ-nane, 11 fific guguriŋ-nane â šârâ hâriŋ-nane, irec hatane âtehuc bâjâpecnuekic. Antiokia haeo â Ikonioŋ haeo â Listera haeo fific guguriŋ enarepie šâic serereŋ mo iŋucne manapo¡ Eme Wofuŋzi sifu wiac iŋucnaonec bataracnuwec. 12 Erâ ŋic gâcne wâc Kristo Jesurao qohotahuc miti hata âteniŋmu jaŋe mâmâc fific guguriŋ fua-jare-fâreocmu. 13 Ŋic repicne â eeatucne jaŋe ine jaŋacnao â gâcne jaŋerao eeatuc gie bafeku repire sanaŋkeniŋmu.

Tiri papia wose manac ehuc juzo

14 Go ine dâŋ qazu-garekicne â maŋge ekicne ira qohotahuc juzemec. Dâŋ moraonec romeŋ i kâuc mi bakomec. 15 Erâ go ɋieocnecteaŋ tiri papia wose manac ewefuhuc juekicte izi maŋge batamaeha Kristo Jesu manasiŋkehuc bâbâpiaŋ sâcne bâfuacmu. 16 Miti papia i Anutu Mâro-ticnere qafeŋko fua-fârewec, eme irec wose manac epene mitire fuŋne qazu-nâreekac â mu tutuc enâreekac â mu bâtiŋ enâreekac â tiŋne hata nâwotuekac. 17 Iŋuc enârehuc bašawiec-nâpokume nâŋâc Anuture ŋicfâri erâ eehâmo gie fuŋne fuŋne sâcne bâfuanaŋmu.