‏ Acts 10

Aŋelo moczi Konelio fuacnewec

1Kaisarea haeo ŋic moc juwec, šâŋene Konelio, e Italia mâreŋkonec momori jaŋere soŋaŋ juwec. 2Erâ e jahacne â wiacfâc-ticne jaŋe Anutu araŋ bacnehuc rumerâ jujumbieŋ. Ehuc ŋic ŋokac bâmec bocjaha bajarewec, erâ Anuturao gâbâ numu jujec. 3Konelio e iŋuc ekume šoaŋ mocko owâ gieo Anuture aŋelo moczi maŋko fuac ecneme honeha šâŋene wiracnehuc muwec: “Konelio.” 4Wiracneme hone dendeŋnehuc fâfârerâ muwec, “Wofuŋ, wemo wiacte?” Eme eki muwec, “Nunumu â bâmecge Anuturao hefâme mana biaŋkewec. 5Irec go Jope haeo kiŋaŋ sorec-jopatec ra ŋic moc šâŋene Simoŋ, šâŋe-ticne moc Petoro, jowa warenšepieŋ, 6e wase-ticne Simoŋ, becsahac bapa, ere ficko ŋeŋe juju ekac” fic i hâwecmecko ŋekac.” 7Aŋelo e dâŋ i âzâcnerâ rame kiŋaŋ motec jajahec â momorifâc-ticne jaŋeraonec mitine moc hefârec-joparâ 8dâŋ binaŋ jaza-fârerâ Jope haeo sorec-jopame rambiŋ.

Wofuŋzi Petoro maŋko fuac ecnerâ wiac moc jâutuwec

9Ŋic jaŋe raku hatao fombiŋ. Hae fureme mocwâc raku hae bâmbeŋkezo ehapie šoaŋ šâšâŋiŋko Petorozi numuocte fic maŋne mocko fewec. 10Numuku nânâre hâmorâ mume rike bâmoc ecnehapie Wofuŋzi maŋko fuac ecneme wiac šiŋuc honewec: 11Sambâŋ aŋkeme wiac moc racsâko tinac tofane 4 ira basanaŋkehuc mâreŋko âkesuepie wahawec. 12Maŋnao qowi â homa wiac â wipe fuŋne fuŋne fowec. 13Ehame dâŋ moc šiŋuc fuawec: “Ajoc Petoro, hezu nâc ec.” 14Eme Petorozi muwec, “Wofuŋ, misac, no wiac hecke-nârekicne â mamakâcne moc mi nâekopac.” 15Mume dâŋ harierâ šiŋuc fuawec: “Anutuzi mušurekac i goki mi surec.” 16Wiac i fuame jahec â moc eme izia racnehec fârepie sambâŋko risie fewec.

17Eme Petoro e wiac šâŋe furu honewec irec maŋ kukumbuc ecnehame Konelio ŋicfâc-ticne jaŋe haeo fisirâ Simoŋ ficticnere wio wio raku bâfuarâ motâcko domahuc 18wiracne basac ehuc mumbiŋ, “Simoŋ, šâŋene moc Petoro, e fic šira jukac me?” 19Eme Petoro e wiac šâŋe furu-ticnere manatâc qâtâc ehuc jaha juhame Mârozi šiŋuc âzâcnewec: “Manakic, ŋic jahec â moc fisirâ go basacguŋgopieŋ, 20irec go hurâ jaŋehec racmurâ maŋ bahac mi ezemec, ŋic i noni mupe warembieŋ.” 21Eme Petorozi jaŋerao hurâ muwec, “Basacnuŋgopieŋ no hâcne ši, wemo wiacte wareŋgopieŋ?” 22Mume ŋic jaŋe šiŋuc âzâcnembiŋ: “Momori soŋaŋ Konelio, e Anutu araŋ bacnehuc tiŋne juekac, â Judaŋic jaŋe ere manapie sâckeekac, e hâcne tiri aŋelo moczi fuacnerâ go ficticnao hefârecgurâ micgaonec dâŋ manaocte âzâcnewec.” 23Iŋuc mupie Petorozi hezu hewâneŋ ejarewec. Fohapie hae fureme e â Jope haeonec opâ ruac gâcne mâmâc ŋic jaŋehec rambiŋ.

Petorozi Koneliore ficko ferâ ŋic qâpuc iqic-jopawec

24Jaŋe hatao ŋafe moc forâ raku Kaisarea haeo fisimbiŋ. Konelio e wiacfâcne â âgo qomâfâc-ticne hetumaŋ-jopame woŋec juhapie fisimbiŋ. 25Fisirâ Petorozi ficko fezo ehame Koneliozi ware maŋfuŋnao fodaperâ muac baafec ecnewec. 26Ecneme Petorozi ro bafaharehuc šiŋuc âzâcnewec: “Faharec, no ŋic jaha wâc.” 27Eme muc manac ehuc ficmaŋko ferâ ŋic tumaŋnerâ ŋepie honec-joparâ šiŋuc jazawec: 28“Ŋoŋe Judaŋic nâŋere fuŋne manaŋgopieŋ, nâŋe ŋic furune ŋoŋehec ââgo â iiqic mi enaŋte aka henârekicne. No ine ŋoŋe wâwânâŋhec â hone suŋgiŋne mi muŋarepemurâ Anutuzi fuŋne naza nowatuc ewec. 29Irec hâcne hefârecnupie warepemurâ mi quŋkepo. Eme ši hefârecnumbiŋ irec mupie manape.” 30Iŋuc mume Koneliozi šiŋuc âzâcnewec: “No wiac šâŋe furu honerâ juwarehape miŋecgac šoaŋ gie bapa jahec â jahec ekac irec dâŋ binaŋ egarepe. No owâ gieo numuhape ŋic moc ŋaqi-ticne tatamacnehec norao fuarâ 31šiŋuc nazawec: Konelio, Anutuzi nunumuge manarâ bâmecgere mana biaŋkewec. 32Irec go Jope haeo ŋic sorec-jopatec Simoŋ, šâŋe-ticne moc Petoro, jowa warenšepieŋ. Eki wase-ticne Simoŋ, becsahac bapa, ere ficko ŋeŋe juju ekac” ficticne hâwecmecko ŋekac. 33Eme no irec hâcne ŋic sorec-jopape gorao fâmbiŋ. Eme go dâŋnane manarâ warekicte bunane biaŋkekac. Eme ši Wofuŋzi dâŋ gazawec i mutec mananaŋte Anuture maio tumaŋnerâ ŋefâreŋgopeneŋ hâcne.”

Petorozi Konelio â wiacfâcne miti jazawec

34Eme Petoro e micafec erâ šiŋuc jazawec: “Anutu e ŋic nâŋâcne sahac-nâŋeckopec maname feriŋ wahariŋ mi eekac i mana-jâmbâŋkekopac ši. 35Ŋic gurune gurune jaŋeraonec gâcnezi e araŋ bacnehuc aimuŋ jupie jaŋere maname mitio rorocjopane eekac. 36Anutu e Israe ŋic nâŋerao dâŋ fârine bâfuawec, irec biŋe ŋoŋe manaeŋgopieŋ” e Jesu Kristo, ŋic sasawa nâŋâcne Wofuŋ hâcne, soreme wamadâŋ biaŋ nâzâ-fârewec. 37Erâ Judaia mâreŋko wiac fuawec, irec biŋe wâc šiŋuc manaeŋgopieŋ: Johane e ŋic Miti Opâre dâŋ jazahame gie qanaŋ Galilaia mâreŋkonec domarâ rawec” 38Jesu Nazarete haeonec e ine Anutuzi tâpiri â Tiri Mâro tahackecneme mâreŋ rârecke rac warec ehuc ŋic jauŋ bacjopawec â Sataŋzi bâumbeŋ-jopawec jaŋe bâpiaŋ-jopa-fârewec. Anutuzi dopeckehame gie i hâcne bawec. 39Eme Judaŋic nâŋere mâreŋko â Jerusalem haeo wiac muwec bawec i nâŋe hone manac efârembeŋ. Ehame juku maripoŋko qapie hâmowec. 40Hâmorâ fohame šoaŋ jahec â moc eme Anutuzi bâɋârewec. Bâɋârerâ râeme fua sipuac ewec. 41Erâ ŋic kosa jaŋerao mâcne, ŋic biŋe mumufâc-ticne, Anutuzi mârâc rowosâec-nâpowec, nâŋerao sawa fuawec. Nâŋe hâcne hâmockonec fahareme ehec nâ gugumec â mumac qamanac embeŋ. 42Erâ Anutuzi e ŋic ɋâricne â hâmokicne mumutara-nâŋec âkendâŋnewec, irec biŋedâŋ ŋic guru sâc mutaniŋkerâ jazanaŋte munârewec. 43Eme e manasiŋkeniŋmu jaŋe šâŋe biŋe-ticnere erâ sâqocne tâmire-jareocmu, i porofete jaŋe mufua-fârembiŋ.”

Tiri Mârozi qâpuc jaŋerao wahawec

44Petoro e dâŋ iŋuc muhuc domahame, manahuc ŋembiŋ jaŋerao Tiri Mâro wahawec. 45Eme Judaŋiczi opâ ruac, Petorohec rambiŋ, jaŋe Anutuzi ŋic qâpuc Tiri Mâro tahacke-jareme bipic tatara ejarewec. 46Ŋic qâpuc jaŋe dâŋmarac furune dâŋehuc Anutu musokapie manambiŋ hâcne. Eme Petorozi šiŋuc muwec: 47“Nâŋâc Tiri Mârohec embeŋ, ŋic kecši jaŋe iŋuc jaha fua-jareme Miti Opâ wemocko sakare-jarezo.” 48Iŋuc murâ mume ŋicfâcne jaŋe Jesu Kristo ere šâŋeo šuhuc-jopahuc opâ rua-jarembiŋ. Eme jaŋe Miti Opâ ruarâ Petoro sakarepie šoaŋ gie bapa gâcne jaŋehec ŋeŋe juju ewec.