‏ Acts 13

Banaba â Saulo miti kiŋaŋ bâtâcnerâ rapic

1Antiokia kikefuŋ maŋnao porofete â qaqazu šiŋuc jumbiŋ: Banaba, â Simoŋ, šâŋe-ticne moc Nige, â Lukio Kirene haeonec, â Manaeŋ, e ŋicwofuŋ Herode ehec mâmâc qâqârândiŋ juhuc sokapic, erâ Saulo. 2Eme šoaŋ mocko sowa juhuc gae mitire tumaŋnehapie Tiri Mârozi dâŋ šiŋuc muwec: “Banaba â Saulo gie mujactepo i banicte bašawiec-jofaniŋ.” 3Mume sowa jurâ mejeŋic qizec-jekicko râehuc numu jambuŋ ejacterâ miti kiŋaŋ râec-jofapie rapic.

Qaŋgec bapa Elima ere dâŋ

4Tiri Mârozi iŋuc ehuc sorec-jofame jahe raku Seleukia haeo fisipic. Ira fisirâ wokeo ferâ raku Kipiro nucko fisirâ 5irec hae qizec Salami ira rarâ Judaŋic jaŋere mitificko ferâ Anuture dâŋ jazapic. Erâ Johane ª e jahehec mâmâc juhuc bafic-jofawec. 6Eme nuc fotâcne-fârerâ Pafo haeo fisimbiŋ. Ira fisirâ Judaŋic moc qaŋgec bapa â porofete burecne juwec, šâŋene Barajesu, e bâfuambiŋ. 7Ŋic e kia moc Seregio Paulo ere 390 juwec. Kia e maŋfânâŋ-ticneheczi Anuture dâŋ manaocte ecneme Banaba â Saulo hefârec-jofawec. 8Hefârec-jofame qaŋgec bapa Elima (šâŋe i qaŋgec bapare mujumbieŋ hâcne(c) eki kia miti sakarecnehuc hecke-jactewec. 9Eme Saulo, šâŋene Paulo wâc mumbiŋ, e Tiri Mârozi maŋ ba afec ecneme Elima šiŋuc âzâcnewec: 10“Sataŋte ŋic go, tiŋke biaŋte râsi sanaŋ, maŋge eeatuc â sindaŋzi fusucmakicne, go Wofuŋte hata dândâŋ imackeekic i wezimucko behecmu? 11Irec ši Wofuŋ tâpiri-ticnere fuŋne honezemec” go tiŋtuŋ erâ dameŋ ŋondeŋ moc tatamac hohone tâmiric juzemec.” Mume izia šâŋene dapâc eme tiŋtuŋ qahuc mezi bajaŋ qajaŋ erâ menao roniŋte muwec. 12Wiac i fuame kiazi honerâ Wofuŋte mitire maname bipinehec eme mana šakiewec.

Paulozi Antiokia hae wasene ira Judaŋic miti jazawec

13Paulo â ŋicfâcne jaŋe Pafo hae beherâ wokeo mocwâc ferâ raku Pamfilia mâreŋko Perege haeo fisimbiŋ. Ira Johanezi behec-joparâ Jerusalem haeo risiewec. 14Eme jaŋe Perege haeonec raku Pisidia mâreŋko Antiokia hae wasene ira fisimbiŋ. Ira juhapie sabata hombaŋ maickeme Judaŋic jaŋere mitificko ferâ ŋembiŋ. 15Eme soŋaŋ jaŋe sâcmutâc dâŋqâhâcte â porofete jaŋere dâŋqâreŋ gâcne wose tararâ šiŋuc jazambiŋ: “Âgo bureŋ, dâŋmiti moc maŋkeŋgopieŋko mupie mananaŋ.” 16Eme Paulozi faharerâ niniŋkeniŋte mezi bâuruŋ-joparâ šiŋuc jazawec: “Israe ŋicbureŋ ŋoŋe, â gâcne Anutu araŋ bacneeŋgopieŋ, mâmâc ŋazape mananiŋ: 17Israe ŋic nâŋâcne Anutu eki mimi apafâc-nâŋec rowosâec-joparâ Aigita mâreŋko juhapie basawec-jopawec. Erâ tâpiri sanaŋ-ticnezi irecnec jowac-jopa warerâ 18mâreŋ burocnao gume qataŋ ejarehuc juhame jara 40 ewec. 19Erâ Kanaaŋ mâreŋko ŋicguru 7 bâsirowec-joparâ mume apafâc-nâŋec jaŋe mâreŋ i bâtâc barâ ru sâc erâ jumbiŋ. Ehame jara 450 tarawec. 20Eme Kanaaŋ mâreŋko juhapie mumutiŋ ŋic bâfua-jareme jurakupie porofete Samue fuawec. 21Eme ŋicwofuŋte mupie Anutuzi Benjamiŋte ɋâricfâc jaŋeraonec Kisi ŋokâ-ticne Saulo âkendâŋne-jareme jara 40 micne bajarehuc juwec. 22Eme e bârârierâ Dawidi ŋicwofuŋ-jeŋic âkendâŋnewec. Erâ ere dâŋ šiŋuc muwec: `No Isaire ŋokâ Dawidi ere maŋnane sâckeme hone wosâepo, eki hâcne mupe rereŋ-nane juocmu. Ž 23Eme Dawidi ɋâricfâc-ticne jaŋeraonec Israe ŋic nâŋâcne bâbâpiaŋ moc fuaocte biŋedâŋ mukicne i fârinehec eocte Anutuzi mume Jesu hâcne fuawec. 24Erâ ŋicŋondeŋko fua tâcneocte qanaŋ Johanezi Israe ŋic sasawa maŋjeŋic bârisierâ Miti Opâ ruaniŋte jazawec. 25Erâ Johane e hata mucnekicne i âte tarahuc ŋic šiŋuc jazawec: `E muhuc munareeŋgopieŋ ŋic e no aricne. E jahacne šâhec warehuc jukac” e sâko no iŋucnezi mafahe-ticne decnepe mi sâckeocmu.'

26“Qomâfâc-nane Abrahamte ɋâricfâc ŋoŋe, erâ gâcne Anutu araŋ bacneeŋgopieŋ, mupe mananiŋ: Bâbâpiaŋ irec dâŋ i nâŋâcnao râekicne. 27Jerusalem ŋic fekicne wahakicne jaŋe Jesu mi šâŋitahuc šikao feocte mutaracnembiŋ. Jaŋe iŋuc epie porofete jaŋere findaŋdâŋ sabata hombaŋ sâc wose manac eeŋgopeneŋ i deŋkewec. 28Jaŋe Jesure kiŋ basa-bipiehuc sifu Pilato qizec qacnepie qâhâmowec. 29Eme mitio mukicne sâc etaracnerâ maripoŋkonec batararâ šâŋeruŋ hawecko râembiŋ. 30Eme Anutuzi hâmockonec bâɋâreme faharewec. 31Erâ ehec Galilaia mâreŋkonec Jerusalem haeo mâmâc rambiŋ jaŋe šoaŋ gie bapa bocjaha fua-jarewec. Fua-jareme honembiŋ jaŋe ine biŋe mumufâc-ticne embiŋ Juŋgopieŋ. 32Eme mimiŋnefâc-nâŋec wiac biŋe qajarekicne 33i Anutuzi Jesu bâɋâreme ɋâricfâc-jeŋic nâŋâcnao fârinehec ewec, eme irec bubiaŋ dâŋ ŋazaeŋgopeneŋ. Irec hâcne Miti Mânec namba 2 ira dâŋ šiŋuc qâreŋkekicne fokac:

`Go hâcne Ŋokâ-nane,
no miŋecgac bâfuacgukopac.'
34Jesu bâɋâreme faharewec e šâhec hâhâmo i mocwâc mi bâfuaocmu, irec Anutuzi dâŋ kecšiŋuc muwec:

`No Dawidi biŋe qacnepo irec fârine fofo sanaŋ
i hâcne tahacke-ŋarepemu.'
35Erâ Miti Mânec mocko dâŋ šiŋuc fokac: `Go Tiriŋicge mi behetec gârecke šaŋ eocmu. Ž 36Dawidire manaeŋgopeneŋ, e Anutuzi gie mucnewec i ŋicfâc-ticne jaŋerao batararâ hâmowec. Hâmome mimi apafâc-ticne jaŋerao râepie gârecke šaŋ ewec. 37Á Anutuzi bâɋârewec e ine gârecke šaŋticne tâmiric.

38“Qomâfâc-nane, ŋazape mananiŋ. Sâqocne bâbâtâmire i ŋic eki hâcne bâfuawecte irec dâŋzi maic-ŋopakac. 39Mosere sâcmutâc dâŋzi kiŋŋeŋic guriŋkeocte eipiewec, Jesurao siŋkepie ine sâcne bârârie-ŋareocmu. 40Porofete jaŋerao dâŋ šiŋuc fokac i ŋoŋerao sanaŋkezacte uŋ ŋazakopac:

41`Oi, miti qiqikiŋ, ŋoŋe wareckerâ omaenšepieŋ;
no ŋoŋerao gie fuŋmoc bapemu;
biŋene manarâ manapie mi bapane eocmu. Ž ”
42Eme Paulo â Banaba jahe mitifickonec wahapire ŋic jaŋe sabata hombaŋ mocko dâŋ irecteaŋ jazanicte mumbiŋ. 43Eme tutumaŋkonec waharâ Judaŋic bocjaha â qâpuc Judaŋic jaŋere bâjâpecne gâcne jaŋe mâmâc Paulo â Banaba bâjâpec-jofahapie Anuture jauŋko aimuŋ juniŋte mu sawaŋ ejarepic. 44Eme sabata hombaŋ-jeŋic mocwâc maickeme hae irec ŋic Anuture dâŋ mananiŋte mâretec fisimbiŋ. 45Fisipie Judaŋic jaŋe honec-joparâ mana sâqore-jarerâ Paulo dâŋticne mu surec ehuc bawahambiŋ.

Paulo e Judaŋic râpec-joparâ qâpuc sawa miti jazawec

46Iŋuc epie Paulo â Banaba jahe mai qanšaŋ dâŋ šiŋuc muhuc jazapic: “Judaŋic ŋoŋe Anuture dâŋ qanaŋ ŋaŋazare mukicne. Ʒi ine ŋaŋac qikiŋnehuc juju sanaŋte biŋe eniŋte mi muŋgopieŋte behec-ŋoparâ qâpuc jaŋerao ranacmu. 47Wofuŋ e irec hâcne kecšiŋuc munârewec:

`Noni go ŋic qâpuc jaŋere šoctamac râecgupore
bâbâpiaŋ-jeŋic juraku mâreŋ qaŋeŋnao jutarazemec. Ž ”
48Iŋuc mupire qâpuc jaŋe manarâ bujeŋic biaŋkeme Wofuŋte dâŋ muac baafec ecnembiŋ. Eme juju sanaŋte biŋe eniŋte mana wosâc ejarekicne sâc jaŋe miti mana šakiembiŋ. 49Eme mâreŋ ira Wofuŋte dâŋzi haŋ barawec.

Hae mâreŋ sakare-jactembiŋ

50Hae irec ŋic fekicne jaŋere ŋonâŋfâc gâcne Judaŋic jaŋere bâjâpecne jumbiŋ, jaŋe Judaŋiczi qafeŋ-jopahuc hae soŋaŋ mâmâc maŋ bâiŋ ejarembiŋ. Eme babafic erâ Paulo â Banaba râsi ejactehuc hae mâreŋ-jeŋic sakare-jacterâ jâpec-jofapie rapic. 51Rahuc kike-jekickonec gâc wândoc-jeŋic âteickepire wahahame suŋgiŋ-jopahuc Ikonioŋ haeo rapic. 52Rahapire miti mamana jaŋere maŋko šeri bubiaŋ â Tiri Mâro fua babaraŋ fuawec.