Act 17 | KMG | STEP | Eme Paulo â Sila jahe Amfipoli â Apolonia hae fotâc-jofarâ Tesalonike haeo fisipic. Ira Judaŋic jaŋere mitific moc ŋewec.

‏ Acts 17

Paulo â Sila jahe Tesalonike haeo rapic

1 Eme Paulo â Sila jahe Amfipoli â Apolonia hae fotâc-jofarâ Tesalonike haeo fisipic. Ira Judaŋic jaŋere mitific moc ŋewec. 2 Eme Paulo e ejujec iŋuc erâ sabata hombaŋ jahec â moc mitific-jeŋicko ferâ jaŋehec mitire muc manac ewec. Ehuc miti dâŋqâreŋ gâcne irec fuŋne jaza mutâc ehuc šiŋuc muwec: 3 “Kristo e hâmorâ fahareocte mitio mukicne hâcne. Eme Jesure šâŋe biŋe ŋazaekopac e Kristo jâmbâŋ hâcne.” 4 Eme tucne jaŋe dâŋ i mana šakierâ Paulo â Sila jaherao qohotambiŋ. Erâ Grikŋic Anutu araŋ bacnehuc jumbiŋzi bocjaha jaŋerao wâc šuhuckembiŋ, erâ ŋokac fekicne afecne mâcne. 5 Eme ŋic bocjahazi miti manapie Judaŋic jaŋe mana sâqorerâ ŋic otec ɋeticne â râŋgeŋne henusuc-joparâ mu ojowa sâko erâ Jasoŋte ficko Paulo â Sila ŋepicko tumaŋne-fârembiŋ. Tumaŋne-fârerâ ŋicjahec hâcne rocjofarâ ŋichofao râec-jofazo mumbiŋ. 6 Erâ basac-jofarâ Jasoŋ â miti mamana gâcne rocjoparâ hae soŋaŋ jaŋerao fârec-jopa rambiŋ. Ehuc šiŋuc muhuc owac owacke rambiŋ: “Mâreŋne mâreŋne maŋbâiŋ ejareeŋgopieŋ ŋic izi hâcne nâŋerao wâc fisipie 7 Jasoŋzi hezu hewâneŋ ejarekac. Jaŋe Roma ŋicwofuŋte dâŋ qâsuahuc ŋicwofuŋ furune moc Jesu ere biŋe mupie haŋ baekac.” 8 Dâŋ iŋuc muhuc haeŋic â soŋaŋ mu qafeŋ ejarembiŋ. 9 Eme soŋaŋ jaŋe Jasoŋ â âgofâcne ejarepie sahac taha-jeŋic qikiŋne-jarepie râec-jopapie rambiŋ.

Paulo e Berea haeo miti muwec

10 Eme miti mamana jaŋe Paulo â Sila ŋafeoa ejactepie Berea haeo rapic. Ira fisirâ Judaŋic jaŋere mitificko ferâ miti mupic. 11 Eme hae irec Judaŋic jaŋe urucne, Tesalonike haeonec jaŋe iŋucne mâcne, irec miti maŋafec jaha manambiŋ. Erâ dâŋjekic jâmbomac me burec muhuc šoaŋne šoaŋne gufu koparic ehuc miti papia wose manac embiŋ. 12 Eme jaŋeraonec bocjahazi Jesure kikefuŋ embiŋ, erâ Grikŋic â ŋokac fekicne gâcne sâkozi jaŋerao šuhuckembiŋ wâc. 13 Paulozi Anuture dâŋ Berea haeo muromackeme biŋe Tesalonike haeo rame irec Judaŋiczi manambiŋ. Manarâ Berea haeo warerâ hae rune mu heinšaŋ ejarehuc maŋjeŋic bâiŋnembiŋ. 14 Iŋuc epie miti mamana jaŋe Paulo ecnepie hae i beherâ raku hâwecko fisiwec. Sila â Timoteo jahe ine ijaha jupic. 15 Eme ŋic jaŋe Paulo jowa raku Ateŋ haeo râepie šiŋuc jazawec: “Ŋoŋe risierâ mupie Sila â Timoteo jahe biac warezepirec.” Eme ŋic jaŋe risiembiŋ.

Ŋic jaŋe Paulore dâŋ surembiŋ

16 Eme Paulo e Ateŋ haeo jahere woŋec juhuc ɋâŋ qâqâtâc mâretec ŋerame honerâ maŋne šoc šawec. 17 Erâ Judaŋic jaŋere mitificko ferâ Judaŋic jaŋacne â Grikŋic gâcne Judaŋic jaŋere qâjâpecne jumbiŋ jaŋehec mâmâc mitire muc manac embiŋ. Erâ wâc šoaŋne šoaŋne hae šoŋao ŋic bâfuac-joparâ iŋuc jaha miti jazawec. 18 Eme hae ira mamana ŋic jumbiŋ, šâŋe-jeŋic Epikue ŋic â Stoike ŋic. Eme ŋic jaŋe hâcne Paulohec dâŋ mu bâtikic eec embiŋ. Ehuc gâcnezi Paulore šiŋuc mumbiŋ: “Ŋic keci mâc pacgoroŋ enârekac.” Á tucnezi šiŋuc mumbiŋ: “E nemu furunere biŋe mukac tinac i.” Paulo e Jesure biŋe â hâmockonec fafahare irec dâŋ mume Jaŋe iŋuc mumbiŋ. 19 Iŋuc murâ mâreŋ facne moc šâŋene Areo ira jowa ferâ mumbiŋ: “Go dâŋ furune mukomec i weniŋucte mukic, 20 dâŋ i hazec furu-nâŋec, irec fuŋnehec mutec mananaŋ.” 21 Ateŋ haeonec ŋic, mafa â hae fâri, jaŋe dâŋ biŋe furune manarâ dâŋ ijaha qame qoŋgiŋ ehuc mu binaŋ mâretec ejumbieŋ.

Wofuŋ furunere fuŋne jazawec

22 Eme Paulo e Areo dâŋtomao ra domahuc ŋic šiŋuc jazawec: “Ateŋ haeonec ŋicbureŋ, no fuŋne-ŋeŋic šiŋuc honekopac, ŋoŋe nemu bocjaha jaŋere araŋ baeŋgopieŋ. 23 No hae-ŋeŋicko rac warec ehuc nemuɋâŋfâc-ŋeŋic honec-jopaku alata mocko qâreŋ šiŋuc fome wosepac: `Kecši nemu furune mocte biŋe. Ž Eme nemu furune, mi manahuc kiŋaŋ qacneeŋgopieŋ, Anutu hâcne, ere fuŋne ŋazape mananiŋ. 24 Anutu e mâreŋ bâfuarâ fainao wiac sasawa râe-fârewec, eki hâcne sambâŋ â mâreŋ irec rune. 25 E ufuŋ ŋicmezi bakicne ira ŋeŋe juju mi eekac, erâ wâc wiac moc basame ŋiczi gie bacnehuc wiac bâbâfuacne mi fokac. I aricne, ekizia ŋic nâŋâc juju â mâro â wiac sasawa nâre-fâreekac. 26 Erâ ŋic ukicne mocjaha bâfuarâ mume eraonec mâreŋ sâc ŋic gurune gurune fua rambeŋ. Erâ fuarâ juranaŋte dameŋ â gaŋ rukec i ekizia munârewec. 27 Erâ i maŋnâŋeczi basac qasac eraku Anutu e jahacne bâfuanaŋte manasuhuc iŋuc ewec. E šoricko mâcne, ŋondeŋ-nâŋecko ŋic sâcnâporâ juekac.

28 `Nâŋâc ere jujumaŋko juhuc
wiac ebac eeŋgopeneŋ.'
Ŋoŋere mamana ŋic gâcnezi wâc šiŋuc mumbiŋ:

`Nâŋâc Anuturaonec fuakicne.'
29 Eme ŋic jaŋe maŋjeŋicte erâ goì me siliwa me qânâzi ɋâŋ qâqâtâc ba eric eeŋgopieŋ, ine Anuturaonec fuakicne nâŋâc Anuture manapene irec sâc mi ezejec. 30 Qâpuc juwefuhapie hone akic eŋare warehuc juwec, irec dameŋ tarawec. ši ine mâreŋ sâc ŋic mâmâc sasawa maŋjeŋic bârisieniŋte mujarekac. 31 E dameŋ bawec fokac, ira mâreŋne mâreŋne ŋic fuŋne-nâŋec bataniŋkerâ okacne sâckoa nâreocmu. Erâ ŋic moc e gie i hâcne baocte âkendâŋnewec, erâ mâreŋŋic sasawa e manapaŋkenaŋte hâmockonec bâɋârewec jukac.”

32 Paulo e hâmockonec fafahare irec dâŋ mume gâcnezi mu surec embiŋ, â gâcnezi mumbiŋ, “Dâŋ i dameŋ mocte wâc mutec mananšepeneŋ.” 33 Iŋuc epie Paulozi behec-joparâ rawec. 34 Ŋic gâcnezi ine Paulorao qohotahuc Jesure biŋe embiŋ. Jaŋeraonec mumutara ŋic sâko moc šâŋene Dionisio, erâ ŋokac moc šâŋene Damari, erâ gâcne.