Act 24 | KMG | STEP | Ʒoaŋ gie bapa 5 tarame taha bapa sâko Anania e â soŋaŋ gâcne â dâŋŋic moc šâŋene Teatulo jaŋe Kaisarea haeo hurâ kiarao Paulore dâŋ muniŋte fuambiŋ.

‏ Acts 24

Judaŋic Kaisarea haeo rarâ Paulo qorickembiŋ

1 Ʒoaŋ gie bapa 5 tarame taha bapa sâko Anania e â soŋaŋ gâcne â dâŋŋic moc šâŋene Teatulo jaŋe Kaisarea haeo hurâ kiarao Paulore dâŋ muniŋte fuambiŋ. 2 Eme kiazi mume Paulo fisime Teatulozi e qorickehuc kia dâŋ šiŋuc âzâcnewec: “Kia biaŋ-nâŋec Feliki, go sâcne soŋaŋ-nâpotec wamaoa jueŋgopeneŋ, erâ ŋicguru ši nâŋere manabâc ehuc bafic-nâpotec 3 nâŋerao hae sâc wiac sasawa biaŋkeekacte gore manapene sâcke-hâmoekac. 4 Erâ dâŋ mupe šorazacte go uruerâ mana-nâretec dâŋ bembeŋne mac gazape. 5 Ŋic kecirec manapene boc sâqorekac, e sopa sâwec-ticnehec, Judaŋic mâreŋ sâc juraŋgopieŋ jaŋe maŋbâiŋ ejareekac, erâ Nazarete rune repicnefâc-ticne jaŋere qizec eki hâcne. 6 Eme taha ufuŋ-nâŋec gâc hecnezo ehame rombeŋ, [erâ nâŋe sâcmutâc dâŋnâŋecte sâcko wiac ecnenšapeŋ. 7 Ehame ine kapiteŋ sâko Lisia eki fisi šocnehec nâwoc rowec. 8 Ehuc dâŋko râembiŋ ŋic i jaŋe gorao fisi fuaniŋte mujarewec.Ý Eme nâŋe dâŋ gazaŋgopeneŋ i go gahac mu esâic ecnehuc fuŋne sâcne bataniŋkecmu.” 9 Dâŋ iŋuc mume Judaŋic jaŋe e bafickehuc dâŋticne dopeckembiŋ.

Paulozi kiare maio dâŋ ŋifecne muwec

10 Eme kiazi Paulo mezi sâsâc ecneme dâŋ šiŋuc muwec: “Go mâreŋ šira jara bocjaha kia juekic i manasuhuc dâŋnane manabâc tâmiric mupemu. 11 No Jerusalem haeo Anutu mai ecnepemurâ ferâ juwarekupe šoaŋ gie bapa 12 sawa ekac, go dâŋ irec maŋjahec erâ ŋic esâic-jopatec gazaniŋmu. 12 No taha ufuŋko me mitific gâcnao me miti haeo ŋic jaŋehec mitire mu qaqatarac me ŋic maŋbâiŋ eejare i moc mi epe honecnumbiŋ. 13 Ŋic šizi qoricnuhuc dâŋ gazaŋgopieŋ, irec fârine wemocko gowatuniŋmu. 14 Erâ moc mufua-garepe manac: Hata ɋâri sureeŋgopieŋ i âteekopac mueŋgopieŋ, ine jâmbomac eekopac. Erâ jaŋere dâŋmiti bajuhuc sâcmutâc dâŋqâhâcko miti qâreŋkekicne fokac â porofete mu qâreŋ embiŋ i manape fârine ehame mimiŋnefâc-nâŋec jaŋere Anutu kiŋaŋ qacneekopac. 15 Erâ juku ŋic biaŋne â sâqocne hâmockonec fafahare maickeocmu, irec ŋic keci jaŋe â no mâmâc mamanac jueŋgopeneŋ. 16 Iŋuc ehuc Anuture maio â ŋicmaio bahacmâc jupemurâ rucnane bahuc jaha juekopac.

17 “Eme no jara bocjaha mâreŋ wiwicko juhuc mitire moneŋ qânusuckeku Jerusalem haeo ŋic âgofâc-nâŋec jaŋerao warepo. 18 Erâ bâzi ririkere bašawierâ taha ufuŋko ferâ juhape bâfuacnumbiŋ. Ira ŋicguruo juju me dâŋfânâŋ sâkohec juju ine arictac. 19 Asia mâreŋkonec Judaŋic gâcne jaŋe ine iŋuc embiŋ. Jaŋe hâcne nore bahac moc manaŋgopieŋko gorao fisirâ mutaniŋkenšapiŋ. 20 Me micne bapa tutumaŋko domahape nore bahac moc bâfuambiŋko ŋic domaŋgopieŋ šizi gazaniŋ. 21 Jaŋe no dâŋ mocjaha sawa ŋondeŋ-jeŋicko domahuc mupe manapie mi mecne sâckewec, ine hahaŋne bahuc kecšiŋuc jazapo: `Hâmockonec fafahare fokac, dâŋ i dopeckeekopacte gâcnezi dâŋko râecnupie mai-ŋeŋicko domakopac ši. Ž ”

22 Kia Feliki e Paulore dâŋ i mi mutarahuc mâc râeme fowec. E miti ɋâricnere biŋe mana-hâmowecte šiŋuc sawa jazawec: “Momori soŋaŋ Lisiazi Jerusalem haeonec wahame dâŋŋeŋic mutarapemu.” 23 Iŋuc murâ momori micne šiŋuc âzâcnewec: “Ŋoŋe Paulo soŋaŋkehuc râsi šâŋe mi ecnenšepieŋ, â âgofâcne fisirâ jauŋ bazo mupie mi qatara-jarenšepieŋ.”

Paulo jara 2 kâpâcwâru ficko ŋeme kiazi beherâ rawec

24 Ʒoaŋ gie bapa tucne jurâ Feliki e Juda guruonec ŋonâŋ-ticne Drusila ehec mâmâc ŋehuc Paulo ecneme hefârâ Kristo Jesu manasiŋkembiŋ irec fuŋne jasawec. 25 Ehuc tiŋke biaŋ eere â sasecte sowa jujure â okac dameŋte mume Felikizi weaŋkerâ Paulo šiŋuc âzâcnewec: “Sâcne rac, juku nacnere dameŋ sawane moc fua-nareme mocwâc hefârecgupemu.” 26 Kia e Paulozi moneŋ narezejec muhuc dameŋ sâc hefârerâ ehec dâŋ muc manac ejujec. 27 Ehame jara jajahec tarame kia moc šâŋene Porkio Festo eki Feliki âkehockewec. Eme Feliki e Judaŋic bubiaŋ qajarehuc Paulo kâpâcwâru ficko ŋehame beherâ rawec.