‏ Acts 27

Paulo Roma haeo baraniŋte wokeo râembiŋ

1Italia mâreŋko ranaŋte dameŋ maickeme kiazi mume Roma momori jaŋere soŋaŋ moc šâŋene Julio, eki Paulo â kâpâcwâru ŋic gâcne rocjopame wokeo fembiŋ. 2Woke i Adramiteŋ haeonec, erâ Asia masunao hae biri ŋerawec ira raši-fâreocte mucnekicne. Woke ira hâcne ferâ Makedonia ŋic moc šâŋene Aristako, Tesalonike haeonec, ehec mâmâc rambeŋ. 3Hae fureme woke Sidoŋ haeo rašime Juliozi Paulo âgo ecnehuc manacneme haeo raferâ âgofâcne iqic-jopame hata nâsiŋ wiac râcnembiŋ: 4Eme mâŋâŋ rambeŋkonec warewecte ine Kipiro nuc â Asia mâreŋ ŋondeŋ-jekicko rambeŋ. 5Ehuc Kilikia â Pamfilia mâreŋ hecne hecne raku Mira haeo Likia mâreŋko fisimbeŋ. 6Ira Alesandria haeonec woke moc ŋewec. Izi Italia mâreŋko razo ewecte momori soŋaŋzi rocnâpome ira fembeŋ. 7Ferâ uneŋ uneŋ ŋe qatarac raku Kinido hae ŋeweckopec fisimbeŋ. Eme mâŋâŋzi bârisiec-nâpome hae i râpeckerâ Kreta nuckopec rambeŋ. 8Raku nuc irec masune moc šâŋene Salimone i qatararâ Lasaia hae ramicnao hâwec motec moc fowec, šâŋene Woke Haebiaŋ, ira neneŋ gie baku rašimbeŋ.

Paulore uŋdâŋ mana-bipiehuc rambiŋ

9Hâwecko dameŋ šora rahuc jumbeŋ erâ wâc hoemaŋ biac maickewec, irec Paulozi uŋdâŋ jazarâ muwec, 10“Ŋicbureŋ, ši mocwâc ranaŋmu i manape fâsâcne rarane mi ekac, woke herickeme mafa sawa mâcne, ŋic mâmâc hâwecko hunšipeŋte manabâc erâ mukopac.” 11Iŋuc mume momori soŋaŋ eki Paulore dâŋ mana takirehuc kapiteŋ â woke rune jahere dâŋ manawec. 12Eme hâwec motec honepie wokezi ira hoemaŋko sâcne ŋeŋene mi ewec. Irec Kreta nuc irec hâwec motec moc fowec šâŋene Foiniki, ira raširâ ŋehapie hoemaŋ taraocte mumbiŋ. Hâwec motec irec masunezi mula â jowarec mâmâc sâoc-jofawec.

Hâwecko huzo embiŋ

13Eme râpefuŋ-nâŋeckonec mâŋâŋ burec burec mac qame wokeŋic raniŋte murâ aŋga fârepie wefume Kreta nuc heririŋkerâ rambeŋ. 14Raha rahapene nuckonec mâŋâŋ hâhâwicne šâŋene kagu, 15izi qahuc woke qâtuŋkeme bâipieku behepie qâso bâsoriewec. 16Eku nuc piticne moc šâŋene Kauda, irec ŋifecnao rahapene woke gombazi hâwecko huzo eme 17gie sâko baku fârepene woke faio fewec. Erâ woke fâuckezacte repazi rowaŋauckehuc bândeŋnembeŋ. Eme haroŋaŋ moc šâŋene Siriti, ira fenšipeŋte rac fârepie wahame mâŋâŋzi qâsoriec-nâpome rambeŋ. 18Eme mâŋâŋ tâpirinehec qahuc fowecte hae fureme mafa gâcne hâwecko behepie huwec. 19Eme hae mocwâc fureme wokere wâcwiac gâcne iŋuc jaha ropie huwec. 20Ŋafe šoaŋ gâcnao mâŋâŋ hâhâwicnehec qahuc domahame šoaŋ me bâpiŋ moc mi fuame honerâ maŋ mamanasu-nâŋec šickeme ši ine mi junaŋmu mumbeŋ.

Paulozi ŋic bufahac qajarewec

21Eme ŋic jaŋe nânâ qikiŋne-fârerâ juhapie Paulozi ra ŋondeŋ-jeŋicko domahuc šiŋuc jazawec: “Ŋicbureŋ, ŋoŋe dâŋnane manapie muzac, ine Kreta nucko junšapeŋ. Eme wiac hâhâwicne â mafa sisipiric ine mi fua-nârezac. 22Ʒi ine sifu hâhâwic qamaseniŋ, ŋiczi mi sipirickenaŋmu, wokezi ine jâmbomac sipirickeocmu. 23Jacne ŋafeo runane Anutu eki kiŋaŋ qaqa-ticne norao aŋelo moc soreme fua-narerâ 24šiŋuc nazajec: `Paulo go mi hâwicguoc, go Roma ŋicwofuŋtao fisi-jâmbâŋkecmu, erâ manakic, Anutuzi go ŋezicguhuc ŋic gohec wokeo juŋgopieŋ jaŋe mâmâc gore erâ ŋezic-jopa-fâreocmu. Ž 25Irec, âgofâc-nane, ŋoŋe buŋeŋic biaŋkezejec. No Anuture maŋ jahec mi ekopac, dâŋ nazajec i sanaŋkeocmu. 26Wokezi ine nuc mocko ferâ henšaŋneocmu.”

27Eme Adria hâwecko qac qâsoric ehuc juhapene ŋafe šoaŋ 14 eme wokeŋic jaŋe manapie mâreŋ bâqiŋkeŋgopeneŋ tinac ewec. 28Iŋuc manahuc sâc behepie hume 30 meta ewec. Erâ ipec rarâ sâc mocwâc râepie hume 22 meta sawa ewec. 29Eme haroŋaŋko fenšipeŋ muhuc hâwic-jopame woke šâhecnao aŋga 4 behepie hume hae fureocte hejâpehuc ŋembiŋ. 30Ŋeku wokeŋic jaŋe woke beherâ wiseniŋte manasuhuc woke gomba râepie hume burec ehuc kecšiŋuc mumbiŋ: “Nâŋe woke masunao aŋga moc behepene huocmu.” 31Iŋuc epie Paulozi momori soŋaŋ â ŋicfâc-ticne šiŋuc jazawec: “Wokeŋic jaŋe wisepie ŋoŋe hâwecko hufâreniŋmu.” 32Jazame momori jaŋe woke gombare niŋgiŋ hetâcnepie gomba hâwecko hume behembiŋ. 33Eme hae fureocte woŋec juhuc Paulozi ŋic mâmâc sasawa šiŋuc jazawec: “Ŋoŋe maŋ sahac-ŋeŋic soka fâkic eme nânâ mi nâhuc mâc juhapie miŋecgac šoaŋ 14 ekac. 34Irec ši nânâ nâniŋte ŋazape mi qataraniŋ. Nânâ nâqiŋnerâ sâcne tiŋko ferâ juniŋmu. Qizec susuc-ŋeŋic moc mi waharâ sifuckeocmu.” 35Iŋuc murâ hone-fârehapie poroŋ moc rorâ Anutu daŋge âzâcnehuc bazurâ nâwec. 36Nâme honerâ maŋjeŋic firieme iŋuc jaha nâfârembiŋ. 37Ŋic wokeo jumbeŋ šare-nâŋec 276. 38Nânâ nâ gapec erâ wokemaŋkonec padi hâwecko behepie hume woke afeckerâ wefuwec.

Wokezi nuc masunao ferâ herickewec

39Hae fure-fâreme mâreŋ šâŋitaniŋte hone-bipiembiŋ. Ehuc hâwec kenšuŋne moc haroŋaŋ tâmiric honerâ wokezi ira raširâ moŋgeŋko feocte 40ŋic jaŋe aŋga niŋgiŋne hetâcnepie hâwecko hume rac fârepie feme guriŋ goroŋkerâ moŋgeŋkopec ma bahuc rambiŋ. 41Guriŋ bâipiehapie woke mâreŋ masunao fewec. Ehuc woke masune kindeŋnerâ sanaŋkehame hâwec siri sâkozi woke šâhecne qanšaŋnewec. 42Woke šaŋkeme kâpâcwâru ŋic jaŋe fifia bahuc wisenšipiŋte momori jaŋe qâhâmoc-jopazo mumbiŋ. 43Soŋaŋ-jeŋiczi ine Paulore erâ qatara-jarewec. Erâ mume fifia bapa jaŋe qanaŋ hâwecko rucnerâ fifia bahuc tiŋko fembiŋ, 44â gâcne jaŋe palaŋ faio â wokere dâkâ faio ferâ rambiŋ. Iŋuczi iŋuc ehuc furu jaha tiŋko fefârembiŋ.