Act 28 | KMG | STEP | Tiŋko fefârerâ nuc šâŋene Melite mupie manambeŋ.

‏ Acts 28

Ŋic jaŋe furu jaha Melite nucko fefârembiŋ

1 Tiŋko fefârerâ nuc šâŋene Melite mupie manambeŋ. 2 Eme nuc irec rune jaŋe âgo jauŋ bocjaha enârembiŋ. Ehuc hoe mâmâteŋte šocsâko ruqe-nârepie šame ruambeŋ.

3 Eme Paulozi nâŋ gagate wiac qânusuckerâ šocko râeme hume irec maŋnaonec homa moc andaŋ mandaŋte wefurâ Paulo menao kiŋ qaŋatie domawec. 4 Ehame mâreŋ rune jaŋe menao homa domame honerâ nazaŋ gazaŋ erâ mumbiŋ, “Ŋic e šika qaqa jâmbâŋ, hâwecko mi hurâ hâmojecte šira tiŋko wefume okacne fisicnekac.” 5 Eme Paulozi homa qatatiŋkeme šocko hume homazi mi kiwec tinac fâsâcne domawec. 6 Domahame jaŋe sisiwiŋ fuacneocmu me onšoŋ jaha hâmorâ rândiŋkeocmu muhuc woŋec ŋembiŋ. Ŋekuhapie iŋuc me iŋuc mi ecneme honerâ mumbiŋ, “Ŋic e nemu. “

Paulozi huchec ɋiɋicne bacjopawec

7 Jumbeŋ irec bembeŋnao ŋicbomboŋ-jeŋic šâŋene Popilio ere hae mâreŋ fowec. Eme ŋic eki hâcne hezu hewâneŋ enâreme ere ficko šoaŋ jahec â moc ŋeŋe juju embeŋ. 8 Juhapene Popilio mamac-ticne huc fuacneme woke socnehec qawec. Eme Paulozi manarâ ficticnao ferâ mene qizecnao râerâ numuhuc bâpiaŋkewec. 9 Iŋuc eme biŋene manarâ nuc irec ŋic gâcne huc šâic-jeŋichec fisipie iŋuc jaha ɋiɋicne bacjopawec. 10 Eme irec okacne ŋic jaŋe bubiaŋ mana-nârehuc uruc jauŋ fekicne enârembiŋ. Erâ rara dameŋ maickeme hata nâsiŋ wiac wokeo râe-nârembiŋ wâc.

Paulozi woke furunao raku Roma haeo fisiwec

11 Nuc ira hâcne juhapene mosa jahec â moc tarame woke furunao fembeŋ. Woke i Alesandria haeonec, qoruc-ticnao nemu hahac ɋa jahere hawari bakicne. Nâŋe jumbeŋko ijaha woke i ŋehuc juhame hoemaŋ tarame ira hâcne ferâ rambeŋ. 12 Raku Siraku haeo fisirâ raširâ šoaŋ jahec â moc jumbeŋ. 13 Irecnec mâŋâŋ hecnehuc bac bâŋoric raku Regioŋ haeo fisimbeŋ. Eme hae fureme râpefuŋ-nâŋecko mula qahuc ficne suec-nâpome ŋafe šoaŋ jajahec sawa raku Puteoli haeo fisimbeŋ. 14 Fisipene hae irec miti mamanazi hefârec-nâpopie šoaŋ 7 jaŋehec ŋeŋe juju embeŋ. Eme irecnec mocwâc raku Roma haeo fisimbeŋ. 15 Eme hae irec miti mamanazi biŋe-nâŋec biac manambiŋte gâcnezi wareku Apio haeo bâfuac-nâpombiŋ â gâcnezi Tetrabeŋ haeo bâfuac-nâpombiŋ. Eme Paulozi honec-joparâ Anutu daŋge âzâcnerâ bubiaŋ manawec.

Paulo e Judaŋic hefârec-joparâ dâŋ jazawec

16 Roma haeo fisipene kiazi mume Paulo kâpâcwâru ficko mi râembiŋ, momori moczi soŋaŋkeha fic omane mocko ŋec juc ewec. 17 Juhame šoaŋ jahec â moc eme Judaŋic jaŋere micne hefârec-jopame fisipie dâŋ šiŋuc jazawec: “Âgo bureŋ, no Judaŋic âgofâc-nâŋec mi kisuec-jopapo â mimiŋnefâc-nâŋec jaŋere dâŋ mi qâsuapo. Eme jaŋe sifu Romaŋic jaŋerao qikiŋnupie Jerusalem haeo kâpâcwâru bacnumbiŋ. 18 Eme Romaŋic jaŋe fuŋne-nane mu rituc ehuc nuniŋte kiŋnane basarâ firuecnuniŋte mumbiŋ. 19 Ehame Judaŋic jaŋe sanaŋne qatarapie Roma ŋicwofuŋzi dâŋnane mutaraocte mupo, Judaŋic âgofâc-nâŋec jaŋere dâŋ šira bawarerâ mupemurâ ine mi warepo. 20 Eme no irec hâcne honec-ŋoparâ ŋoŋehec muc manac enaŋte hefârec-ŋopape fisimbieŋ. No ine Israe ŋic woworic-nâŋec ewec ere erâ kâpâcwâru ŋic epo jukopac ši.” 21 Iŋuc muhuc jazame mumbiŋ, “Ocna Judaŋic mâreŋfuŋ-nâŋecko jueŋgopieŋ jaŋe gore dâŋ mi qâreŋke-nârembiŋ me ŋicjeŋic moc mi sorepie ware gore bahacdâŋ mume manambeŋ. 22 Irec dâŋ bajuekic i go gahac mutec mananaŋte muŋgopeneŋ. Á opâ ruakicne jaŋere šiŋuc manaeŋgopeneŋ: Mâreŋ sâc ŋiczi mu supaic ejareeŋgopieŋ.”

23 Iŋuc murâ šâfo babac embiŋ. Eme i maickeme Judaŋic bocjahazi Paulore ficko tumaŋnembiŋ. Eme Anuture uucmaŋte dâŋ binaŋ uupicte fuŋkerâ jazahuc juhame hae ŋafewec, ehuc Mosere sâcmutâc dâŋqâhâcko â porofete jaŋerao biŋedâŋ qâreŋkekicne fokac i Jesurao fâri fideteŋ ewec, irec fuŋne muhuc maŋuruc qajarewec. 24 Ejareme ŋic gâcne jaŋe dâŋticne âgo bambiŋ â gâcnezi ine qaisockembiŋ. 25 Ehuc mu qaqatarac epie Paulozi dâŋ mocjaha šiŋuc jazawec: “Tiri Mârozi porofete Jesaja ecneme mimiŋnefâc-ŋeŋic sowine dâŋ kecšiŋuc jazawec:

26 `Go rarâ ŋicguru keci šiŋuc jazac:
Hazeczi mamana i mananiŋmu,
maŋzi mamana tara ine mi eniŋmu.
Ʒâŋezi fifi finiŋmu,
wiac hohone tara ine mi eniŋmu.
27 Ŋicguru ši jaŋe maŋjeŋic sanaŋkekicne,
â hazec-jeŋic bâzickekicne,
â šâŋe-jeŋic hâmonšambiŋ.
Irec šâŋe-jeŋiczi wiac mi hone taraeŋgopieŋ,
â hazec-jeŋiczi wiac mi mana taraeŋgopieŋ,
â maŋjeŋiczi wiac mi manasu-hâmoeŋgopieŋ,
ehuc maŋjeŋic mi bârisiepie no wemocko bâpiaŋ-jopazapo.'
28 Irec no ŋazape mananiŋ, Anutuzi bâbâpiaŋ hata bâfuawec i qâpuc jaŋere biŋe ekac, jaŋe sâcne mana aŋac eniŋmu.” [ 29 Iŋuc muhuc jazame Judaŋic jaŋe jaŋackoaŋ mu wioc bocjaha eec ehuc rambiŋ.]

Paulo e Roma haeo jara 2 juwec

30 Eme Paulozi jara 2 Roma haeo fic omanao juhame ŋic jaŋe iqickehuc jumbiŋ. 31 Iqickepie Anuture uucmaŋte dâŋ binaŋ ejarehuc Wofuŋ Jesu Kristo ere fuŋne hâwicmâc jaha muhezuc tâmiricko jaza qazuc ehuc juwec.