Eph 4 | KMG | STEP | No Wofuŋte kâpâcwâru ŋiczi faŋ qaŋarehuc ŋazape: Wiac fekicnere hefârec-ŋopakicne irec sâcko junšepieŋ.

‏ Ephesians 4

Mârozi qâzuc-nâpome juju guru mocjaha embeŋ

1 No Wofuŋte kâpâcwâru ŋiczi faŋ qaŋarehuc ŋazape: Wiac fekicnere hefârec-ŋopakicne irec sâcko junšepieŋ. 2 Ehuc maŋhuhuŋ â buuruc â bumâteŋ juhuc maŋjauŋko dedec ââsic enšepieŋ. 3 Erâ Mâro e wamare muczi qâzuc-ŋoparâ dâtâc-ŋopawec, i qâtâcnenšipiŋte ruc babac ehuc junšepieŋ. 4 Fâri ombâŋzi mocjaha â Mârozi mocjaha erâ wâc sambâŋ šeŋaŋ mocjahare biŋe qaŋarehuc hefârec-ŋopakicne. 5 Ine hâcne, Wofuŋzi mocjaha, mamanasiŋzi mocjaha, Miti Opâzi mocjaha. 6 Erâ Anutu e Mamac wirec-nâŋec mocjaha, eki mâmâc sasawa qâhuc-nâpokac erâ maŋnâŋec sâc tâpiri sicne-nâreekac â mâŋnâŋec sâc ŋeŋe juju eekac.

Wofuŋzi miti giere ŋic fuŋne fuŋne râec-nâpowec

7 Kristo e ŋicne ŋicne mitire kâdoc nârewec sâc bajueŋgopeneŋ. 8 Irec hâcne dâŋqâreŋ moc šiŋuc fokac:

“E faic jâmbâŋ fehuc kâpâcwâru ŋic bacjopa rawec,
e ŋic wiac tahac-jopawec.”
9 “Faic fewec”, i mâc mi mukicne, mâreŋko juwic jâmbâŋ wahaweckonec risie fewec. 10 E wahaweczia risierâ sambâŋne sambâŋne fotâcnerâ fewec, i sambâŋ â mâreŋ fusucmarâ jufâreocte fewec hâcne. 11 Erâ ekizia wâc ŋic gâcne aposolo râec-nâpowec, gâcne porofete, gâcne miti kiŋaŋ ŋic, gâcne lama guru jaŋere soŋaŋ â qaqazu, 12 i mitiŋic ŋokac bašawiec-jopapene kikefuŋte kiŋaŋ qaqa gie bapie Kristore me kike fâri ombâŋ soka sanaŋ eocte ŋic iŋuc râec-nâpowec.

Mitio gegec dodoc boc mi juzo

13 Iŋuczi iŋuc gie bakupene mamanasiŋ-nâŋec â Anutu ŋokâ-ticnere fuŋne mamana-nâŋec i niniweme maŋ mocjaha enšepeneŋ. Ehuc mitio sosoka-nâŋecte sâc mukicne i Kristore rowaŋkonec tâpiri fârehuc fua sokac eku ŋic kâcɋene erâ bâfuanšepeneŋ. 14 Nâŋâc ɋiene hati mi ee sanaŋkerâ juhapene eeatuc ŋic jaŋe sioc enârepie gibioc dâŋ â mumusifuc-jeŋicte mâŋâŋzi ba bâsoriŋ â qac qârândiŋ moc mi enârezejec. 15 Aricne, nâŋâc dâŋfâri paŋšâic bajupene maŋjauŋ-nâŋeczi fua sawec ehame qizec-nâŋec Kristo erao šuhucke sanaŋkenšepeneŋ. 16 Erao šuhuckepene ruazi ŋeturec-nâporâ bândeŋ-nâpome ɋâɋâdoc erâ me sahac-ticne eeŋgopeneŋ. Ehuc tofafâc-ticne erâ tâpiri fonâreekac sâc gie bahuc maŋjauŋko soka sawec enaŋmu.

Qâpuc juju mi juzo

17 No Wofuŋte maio ŋaza-jâmbâŋkepe: Ŋoŋe qâpuc, maŋ mamanasu-jeŋic wiac jawanere foekac, jaŋere sâc mi junšepieŋ. 18 Jaŋe maŋjeŋic dapâc ekicnere mutuc â maŋsanaŋ erâ Anuture juju râpeckembiŋ. 19 Eme maŋjeŋic šickeme nânâ qowire nâ areŋ ehuc sasec mamakâc fuŋne fuŋne takicmâc ebac eeŋgopieŋ. 20 Ŋoŋe ine juju iŋucne juniŋte Kristore fuŋne mi qazu-ŋarekicne. 21 Ŋoŋe fuŋne-ticne qazu-ŋarekicko Jesurao dâŋfâri kecšiŋuc fokac i hâcne manambiŋ: 22 Qâpuc juju râpeckerâ maŋraŋɋa-ŋeŋic burec ehuc sasecko sipirickeekac, i heunuckenšepieŋ. 23 Erâ mâro manacnepie mamanasu-ŋeŋic heɋârehame 24 maŋɋâri hepie huzejec. I hâcne Anuture hawari iŋucne tiŋne â furu jâmbâŋ bâfuakicne.

Sâqocne fuŋne fuŋne qikiŋnezo

25 Irec ŋoŋe burec beherâ dâŋ jâmbomac sasawa nazaŋ gazaŋ enšepieŋ, nâŋâc qoqomâ efâreŋgopeneŋte. 26 Kimbeŋko mi sâqorenšepieŋ. Kimbeŋ aaric mi bajuhapie šoaŋ ŋeutuckezejec. 27 Erâ Sataŋ mi mana uruecnenšepieŋ. 28 Fiuc rorozi fiuc qikiŋnerâ meticnezi gie šoɋac bahuc nânâ mafa bâfuarâ waha qaqane boki bajarezejec. 29 Dâŋ simbiŋne micŋeŋickonec mi wahazejec, dâŋ biaŋne sawa, ine dodopec eere hatane fuame mupie ŋic âgo bacjopazejec. 30 Anuture Tiri Mâro mi qaisockenšepieŋ, e hâcne roroc-nâpo dameŋko maqâreŋ-ŋeŋic eocte tahac-ŋopakicne. 31 Râsidâŋ, kimbeŋ aaric, mu ojowa, susurec, erâ wiac gâgâpâcne gâcne i ŋondeŋ-ŋeŋicko mi fuazejec. 32 Ŋoŋe ââgo erâ eehâmoc ehuc kiŋ bebehec enšepieŋ, Anutu e iŋuc jaha Kristore erâ kiŋŋeŋic behewec.