Gal 5 | KMG | STEP | Niŋgiŋ tâmiric junaŋte Kristozi goroŋ-nâpowec. Irec gâcnezi niŋgiŋko râec-ŋoparâ kiŋaŋ qaqa eniŋte muŋarepie qikiŋnenšepieŋ.

‏ Galatians 5

Firuec-nâpokicnezi niŋgiŋko mocwâc mi fezo

1 Niŋgiŋ tâmiric junaŋte Kristozi goroŋ-nâpowec. Irec gâcnezi niŋgiŋko râec-ŋoparâ kiŋaŋ qaqa eniŋte muŋarepie qikiŋnenšepieŋ. 2 No Paulozi ŋazape mananiŋ, ŋoŋe sahac-ŋeŋicko ma bapie Kristozi ŋoŋerao wiac omane tinac eocmu. 3 Mocwâc harierâ ŋaza-jâmbâŋkepe, moc e sahac-ticnao ma baocmuzi sâcmutâc dâŋ gâcne sâko mâmâc hâpo-fâreme sâckeocmu. 4 Sâcmutâc dâŋ reŋkehuc kiŋfâsâc ezo mueŋgopieŋ ŋoŋe Kristohec šâšâfic embiŋ i tâcnekac â aki anonoczi ŋoŋerao fârimâc ekac. 5 Nâŋe ine Mârorao ŋesiŋnehuc mamanasiŋte erâ kiŋfâsâc ee bâfuanaŋte irec mamanac jueŋgopeneŋ. 6 Kristo Jesurao fisirâ mahec juju â ma tâmiric juju irec mâmâc jaha fârimâc muzo, mamanasiŋte qâreŋ maŋko fuame irec mocjaha fârine muzo.

Mumusifuc ŋic jaŋere hâhâtâzi mitire sicko mi huzejec

7 Ŋoŋe mitire hata sâcne fuŋkerâ âtembiŋ. Âtehapie mozi aka heŋareme dâŋ fâri qizecne râpeckeŋgopieŋ? 8 Hefârec-ŋopawec eki irec esoc qafeŋ mi eŋarekac. 9 Qowi hâhâtâcne pitic siŋgaŋ gaucnezi nânâ sicko hurâ mâmâc sâcke-fâreocmu. 10 Erâ ŋoŋe nore dâŋ mi qikiŋneniŋmu, i Wofuŋte erâ manabâc tâmiric mukopac. Á ŋic izi me izi maŋ bâsifuc eŋareocmu, e kiŋ irec okacne fisicneocmu. 11 Âgofâc, no ine mahec eniŋte ŋic jazazapo muzac, wemocko fific guguriŋ moc enarenšapiŋ? Iŋuc jazazapoo maripoŋte mamana gâpâre i mâmâc omaezac. 12 Maŋqaqa eŋareeŋgopieŋ ŋic iŋucnezi sahac-jeŋic hetâc qâtâcnenšapiŋ me!

Niŋgiŋ tâmiric juhuc wiac kosa mi ezo

13 Âgofâc-nane, ŋoŋe niŋgiŋ tâmiric juniŋte hefârec-ŋopakicne, erâ niŋgiŋ tâmiric jujuzi âki eha sahacte dâŋ reŋkeniŋte mâcne, maŋjauŋko kiŋaŋ qaqac eniŋte irec hefârec-ŋopakicne. 14 Irec hâcne sâcmutâc dâŋte qâqâhâc šiŋuc mukicne: “Gahacnere egareekac, sâc ijaha âgogere egarezejec.” 15 Ŋoŋe ine miczi nânâc ehuc kikic qaqac boc erâ oomaec enšipiŋte uŋ ŋazakopac.

Kosa Jujure fârine â Mârore fârine

16 Erâ ine šiŋuc mukopac: Ŋoŋe Mârore tâpirio siŋkerâ junšepieŋ, iŋuc ehuc maŋraŋɋare sasec gie mi baniŋmu. 17 Maŋraŋɋare aŋaczi hâcne Mâro kisueekac â Mârozi maŋraŋɋa kisueekac, eme jahe hâcne rârâsi epire ŋoŋe wiac ezo mueŋgopieŋ i sâcne mi afeckerâ eeŋgopieŋ. 18 Mârozi jowa baafec eŋareme ine sâcmutâc dâŋzi ŋicbomboŋ mi eŋareocmu. 19 Maŋraŋɋare gie i soŋsoŋko mi foekac, i šiŋuc fuaekac: Boe sau, mamakâc, nâ areŋ, 20 nemu araŋ babajare, hafec qaŋgec, rârâsi, sosopec, iiŋguuŋ, kimbeŋ, hehefaric, fâfâuc, rârâwiŋ, 21 mu kâroŋ, opâ momori me bec qowi âmbâŋ nânâ, erâ wiac gâcne. Wiac iŋucnere mârâc jaha ŋazapo erâ ši mocwâc ŋazape: Sâqocne i baniŋmuzi Anuture uucmaŋko mi rašiniŋmu. 22 Mârore fârine ine kecšiŋuc fuaekac: Maŋjauŋ, bubiaŋ, wama, bumâteŋ, buafec, buuruc, ââgo sanaŋ, 23 ruaine, maŋzi sowa juju. Mârore fârine hâcne irec aka mi fokac. 24 Kristo Jesure biŋe jueŋgopieŋ jaŋe juju raŋɋa-jeŋic sasec â sâqocnere andachec i maripoŋko qapie omaewec. 25 Mârore tâpirire jueŋgopeneŋko Mârore hata jaha âtenšepeneŋ. 26 Sahaczi fecko fec ehuc hehesuac mi enšepeneŋ, erâ wâc iiŋguuŋ mi eec enšepeneŋ.