Heb 7 | KMG | STEP | Melikisede e hâcne Salem haere ŋicwofuŋ â Anutu femicne sâko ere taha bapa juwec. Eki hâcne Abrahamzi ŋicwofuŋ râsifâc-ticne joparâ risiehame ra hatao bâfuarâ jambuŋkewec.

‏ Hebrews 7

Melikisedere fuŋne

1 Melikisede e hâcne Salem haere ŋicwofuŋ â Anutu femicne sâko ere taha bapa juwec. Eki hâcne Abrahamzi ŋicwofuŋ râsifâc-ticne joparâ risiehame ra hatao bâfuarâ jambuŋkewec. 2 Erâ e hâcne Abrahamzi mafa mateŋ bâtâc barâ teŋkonec wâŋ irec sâc râcnewec. Melikisede šâŋe-ticne nâŋâcne dâŋko “Tiŋne ŋicwofuŋ”, â Salem ŋicwofuŋ ine “Wama ŋicwofuŋ”. 3 Melikisede e neŋgoc mamac tâmiric, apa ŋosa fuŋne-ticne qahuc mi mufuakicne, e juju-ticne fufuŋke tâmiric â tatara tâmiric. E Anuture ŋokâ ere sâsâc eocte mukicnezi taha bapa juju hati ewec.

Melikisede e šâhec taha bapa gâcne Jumbiŋ Jaŋere sâc aricne

4 Ʒi honeniŋ, e ŋic fekicne mo iŋucne irec mimiŋne-nâŋec Abrahamzi mafa mateŋ biaŋne sasawa bâwosâerâ teŋkonec wâŋ irec sâc râcnewec 5 Lewi-e ɋâricfâc gâcne taha gie baniŋte mujarekicne jaŋe ŋic ŋokac âgofâc-jeŋic Abrahamte tofafâc jaha sifu mafa wiac teŋkonec wâŋ irec sâc jowac roniŋte sâcmutâc dâŋqâhâcko mutâcne-jarekicne. 6 Á Melikisede e jaŋere guruonec mi fuakicnezi ine Abrahamtaonec teŋkonec wâŋ rowec Ehuc miti biŋe qacnekicne e jambuŋkewec. 7 Á fekicnezi wahakicne jambuŋkeekac i mozi mickeocmu? 8 Dameŋ ši ŋic sisirowenezi teŋkonec wâŋ roeŋgopieŋ” ira ine juju hati mucnekicnezi rowec. 9 No manape šiŋuc ekac, Lewi e teŋkonec wâŋ roekaczi Abrahamte bifuŋko fohuc wiac i Melikisede râcnewec” 10 e mamac-ticnere bifuŋko fohame Melikisedehec bâbâfuac epicte Abrahamzi râcneme Lewizi mâmâc râcnewec ekac.

Taha bapa raŋɋane gie-jeŋic mi sâcke-hâmowec

11 Lewire ɋâricfâc jaŋere taha bapa gie sâcke-hâmozac muzac, wemocko šâhec taha bapa moc Melikisede ere sâcko fuazac â Aroŋte sâcko aricne? Taha bapa giere erâ ŋic ŋokac sâcmutâc dâŋ jarekicne. 12 Eme taha bapa gie raŋɋane rârieha ɋâricne moc fuame, raŋɋanere sâcmutâc dâŋ iŋuc jaha râriehame ɋâricne moc fuaocmu. 13 Findaŋdâŋzi ŋic rokac e taha ufuŋko gie mujarekicne jaŋere guruonec mi fuawec, e guru mockonec. 14 Wofuŋ-nâŋec e Judare tofafâc jaŋeraonec fuawec, i mana-fâreŋgopeneŋ. Eme ŋicguru i jaŋe taha gie baniŋte Mosezi moc mi muwec. 15 Erâ irec fuŋne moc taniŋke-hâmokac wâc. Taha bapa moc Melikisedere sâcko fuaocte mukicne, 16 e sahaczi fuakicnere sâcmutâc râekicne irec sâcko mâcne, juju fofo sanaŋte tâpirio taha bapa erâ juwec jukac. 17 Ere hâcne dâŋ šiŋuc mutaniŋkekicne:

“Goki Melikisede ere sâcko
taha bapa jurašihuc jucmu sanaŋ.”

Jesu e šâšâfic fârine irec jâcne

18 Ine hâcne sâcmutâc dâŋ mârâc mukicne i tâpirimâc â fâri tâmiric ewecte bârâriekicne. 19 Sâcmutâc dâŋzi wiac moc mi emataucke-fârewec” eme irec okacne woworic fârine bâfuakicne, izi fârec-nâpome Anutu sâcne maickeeŋgopeneŋ. 20 Ɋâricne fuawec i mumupaŋ dâŋsanaŋ tâmiric mi fuawec raŋɋane jaŋe mumupaŋ tâmiricko taha bapa erâ jumbiŋ. 21 Ɋâricne ši ine mumupaŋ faio taha bapa ewec jukac. Ere dâŋqâreŋ šiŋuc fokac:

“Wofuŋzi mumupaŋ dâŋ muwec i mi beheocmu:
`Goki taha bapa jurašihuc jucmu sanaŋ'.”
22 Fuŋne iŋucte šâšâfic fârinere jâcne ewec, Jesu hâcne. 23 Raŋɋane jaŋe hâmohuc tuczi tuc juwarembiŋte bocjaha juwarembiŋ. 24 Ɋâricne e ine juju sanaŋ jukacte taha bapa gie-ticne šušuhuc focnehuc juocmu sanaŋ. 25 Irec ere ŋesiŋko Anutu maickeeŋgopieŋ jaŋe sâcne bâbâpiaŋko râe basanaŋ ejareekac, e juju sanaŋ jukaczi hâcne dameŋ sâc roroŋ sasape ejareekac.

Jesu e taha bapa sâko fârine jâmbâŋ

26 Taha bapa sâko-nâŋec hâcne e furu, bahacmâc, ɋaɋacne, sâqocne bapa jaŋere sâcko mi juhuc qâtâcnerâ pectâc jujune, erâ sambâŋ hucke-fârewec jukac. Iŋucnezi hâcne junâreme sâcke-hâmokac. 27 E taha bapa raŋɋane jaŋe iŋucne mâcne, e sindaŋ tâmiriczi wemocko šoaŋne šoaŋne qanaŋ e jahacne sindaŋte erâ taha bâzi rikerâ šâhec ŋic jaŋere rikezac, e jahacne maŋ sahac i taha bâzi-nâŋec mocjaha hâcne râeme tarawec. 28 Sâcmutâc dâŋko ŋic maŋjeŋiczi dodocne jaŋe taha bapa sâko juniŋte mukicne. Eme šâhec ine sâcmutâc dâŋ faicnao mumupaŋ dâŋsanaŋzi Ŋokâ âkendâŋnewec. Eki hâcne maŋfuru jaha jurašihuc juocmu sanaŋ.