Joh 21 | KMG | STEP | Juku motec jaŋe Tiberia riqicko juhapie fua-jarewec. Kecšiŋuc ehapie fua-jarewec:

‏ John 21

Motec gâcne riqicko juhapie Jesuzi fua-jarewec

1 Juku motec jaŋe Tiberia riqicko juhapie fua-jarewec. Kecšiŋuc ehapie fua-jarewec: 2 Jumbiŋ ine Simoŋ Petoro, Toma, šâŋene moc Didimo, Natanae e Galilaia mâreŋko Kana hae ŋewec irecnec, erâ Ʒebedaio ŋokâ jahec-ticne â motecfâcne jaŋeraonec jajahec mocwâc, ŋic iŋuczi jumbiŋ. 3 Ehuc Simoŋ Petorozi šiŋuc jazawec: “No qowi rozo rakopac.” Mume mumbiŋ, “Nâŋe gohec mâmâc ranaŋ.” Iŋuc murâ wokeo ferâ rambiŋ. Ra juhuc ŋafe ira qowi mi rombiŋ. 4 Eme riqicko juhapie hae fufurecte Jesuzi moŋgeŋko domawec. Domame Jesu hawarine mi hone tarambiŋ. 5 Eme Jesuzi wio-jarerâ muwec, “Motec, qowi-ŋeŋic moc fokac me?” Eme jaŋe mumbiŋ: “Aricne.” 6 Mupie šiŋuc jazawec: “Woke fâreopec wasaŋ behepie qowi jowaocmu.” Mume wasaŋ behepie qowi mâretec jâmbâŋ jowa susuckeme fâre-bipiembiŋ. 7 Eme Jesu motec bufuŋ-ticnezi Petoro šiŋuc âzâcnewec: “I Wofuŋ ine hâcne.” Mume Wofuŋ šâŋe manarâ Simoŋ Petoro e kambaŋ sawa qajuwecte ŋaqi-ticne faine heme hume riqicko rucnewec. 8 Jaŋe moŋgeŋ heririŋ (100 meta irec sâc(c) jumbiŋte motec gâcne jaŋe woke foickehuc wasaŋ qowihec fâre fâre rambiŋ. 9 Eme moŋgeŋko ferâ tiŋko wiac šiŋuc honembiŋ: Ʒoc uucko opâ qowi â nânâ šegoc šahuc fowec. 10 Ra fisipie Jesuzi šiŋuc jazawec: “Qowi rombieŋ i tucne bareniŋ.” 11 Mume Simoŋ Petorozi wokeo ferâ wasaŋ tiŋko fâreme fewec. Maŋnao qowi kâcɋene 153 fowec, eme sifu mi tâcnewec. 12 Eme Jesuzi šiŋuc jazawec: “Ware furic nânâ nâniŋ.” Mume motec jaŋe wemocko šiŋuc wionšapiŋ: “Go mo?” Jaŋe Wofuŋ ine hâcne i mana-fârembiŋ. 13 Eme Jesuzi warerâ nânâ qowi bâtâc bahuc jarewec. 14 I Jesu e hâmockonec faharerâ motecfâcne fua-jareme jahec â moc ewec.

Jesuzi Petoro jahec â moc wiocnewec

15 Furic nânâ nâpie Jesuzi Simoŋ Petoro šiŋuc muhuc wiocnewec: “Simoŋ Johanere ŋokâ, âgofâcge jaŋe no maŋzi šâficnueŋgopieŋ, go jowarurâ sâc moc šâficnuekic me?” Eme Petorozi muwec, “Wofuŋ, no gore enarekac i manakomec.” Eme Jesuzi muwec: “Go lamafâc-mae soŋaŋ-jopazemec. 16 Iŋuc murâ mocwâc wiocnewec: “Simoŋ Johanere ŋokâ, go jâmbomac šâficnuekic?” Eme Petorozi muwec: “Wofuŋ, no gore enarekac i manakomec.” Mume Jesuzi muwec: “Go lamafâc-nane jaŋere soŋaŋ juzemec.” 17 Iŋuc murâ harierâ wiocnewec: “Simoŋ Johanere ŋokâ, go jâmbomac nore egarekac me?” Ʒâšâficte wiocneme jahec â moc eme Petoro e bune sâqoreme muwec: “Wofuŋ, go wiac sasawa mana-fâreekic, no gore enarekac i wâc manakomec.” Mume Jesuzi muwec: “Go lamafâc-nane soŋaŋ-jopazemec. 18 Jâmbomac jâmbâŋ gazape: Go ŋicmotec juhuc becsahacge jomarâ hata ira me ira razo egareme rajumec. Izi juku ŋicqizec erâ mege bâfeŋnetec ŋic moczi becsahac joma-garerâ mi razo mucmu ira bacgu raocmu.” 19 Jesu e iŋuc muhuc Petoro hâmoc-ticnere dâŋ suŋsuŋne âzâcnewec. Hâmoc-ticne fuŋmoczi Anutu muteŋkeocte manasuhuc muwec hâcne. Dâŋ iŋuc murâ šiŋuc âzâcnewec: “Ware bâjâpecnuc.”

20 Eme Petoro e fotikierâ Jesu motec bufuŋ-ticnezi râpefuŋnao rame honewec. Motec e aakic lama nâmbiŋko qizec-ticne Jesure amecko fohorerâ wiocnerâ muwec: “Wofuŋ, mozi doc bacguocmu?” 21 Eme motec hâcne šâhec rame Petorozi honerâ Jesu wiocnerâ muwec: “Wofuŋ, motec kecšizi ine weniŋuc eocmu?” 22 Wiocneme Jesuzi šiŋuc âzâcnewec: “E juhame no risiepemurâ manacnepe fokacko ere dâŋ wemocte mukomec? Go mâc bâjâpecnuc.” 23 Eme miti mamana gâcne jaŋe šâhec Johanere šiŋuc musifuckembiŋ: “Motec e mi hâmoocmu.” Jesu e ine ere šiŋuc mi muwec: “E mi hâmoocmu.” Dâŋ šiŋuc sawa âzâcnewec: “E juhame no risiepemurâ manacnepe fokacko ere dâŋ wemocte mukomec.”

24 Motec eki hâcne wiac ši hone mana tarac eku mutaniŋkehuc papia ši qâreŋkewec. Eme nâŋe ere manaeŋgopeneŋ, dâŋticne fârine jâmbâŋ. 25 Eme Jesuzi wiac gâcne gâcne ewec bawec, i wemocko papiao qâreŋke-fârezo. I papiao fofâreme muzac, no manape ŋiczi wowose tarane mi ezac.