‏ John 5

Jesu e Betesida riqicko ŋic moc ɋiɋicne bawec

1Juku Judaŋic jaŋere hombaŋ sâko moc maickeme Jesu e Jerusalem haeo rafewec. 2Eme Jerusalem haeo Lama Motâcko riqic moc ŋewec šâŋene Betesida Ere mecnao fic memoc ŋerawec. 3Fic ira ŋic huchec â tiŋtuŋ â šeke puriŋ â soc kekereŋhec bocjaha fombiŋ, [ehuc opâ qiriŋ qaocte woŋeckembiŋ” 4Wofuŋte aŋelo moczi dameŋ ocŋondeŋ sâc riqicko waharâ opâ qâuawec” qâuahame moczi bâbâni opâo huwec e huc ecnewec i niniŋkecneme ɋiɋic qawec.Ý 5Eme moc fowec e puriŋ ecnehuc juhame jara 38 ewec. 6Eme Jesuzi ŋic e honerâ dameŋ šora fohuc jukac, iŋuc manarâ wiocnerâ muwec: “Go ɋiɋic qacmurâ egarekac me?” 7Eme puriŋzi muwec, “Bomboŋ, mo ŋic mo junarekaczi opâ qiriŋ qaha riqicko râecnuzac? Á no nahac huzo mupe ine moczi biac âkehocnurâ huekac.” 8Mume Jesuzi šiŋuc âzâcnewec: “Go faharerâ fofoge rorâ rac.” 9Mume izia sahac-ticne biaŋkeme faharerâ fofo-ticne ameckerâ rawec. Ʒoaŋ ira ine sabata hombaŋ ŋembiŋ.

10Irec Judaŋic jaŋe ŋic ɋiɋic qawec e šiŋuc âzâcnembiŋ: “Miŋecgac hombaŋko fofoge hâpokomec i mi eene.” 11Mupie šiŋuc jazawec: “Bâpiaŋnukaczi šiŋuc naza sorec ekac: `Fofoge rorâ rac. Ž ” 12Mume wiocnerâ mumbiŋ, “Fofoge rorâ rac gazajec ŋic e šâŋene mo?” 13Mupie ŋic biaŋkeweczi kâuc bawec. Jesu e ŋicguru ira domambiŋ jaŋere ŋondeŋko kamierâ rawec. 14Izi šâhec Jesuzi ŋic e taha ufuŋko bâfuarâ uŋ šiŋuc âzâcnewec: “Go sahacge biaŋkejec, eme wiac ŋemâc bâmâcne jâmbâŋ fua-garezacte sâqocne mocwâc mi bazemec.” 15Eme ŋic e Jesu hone tararâ ra Judaŋic šiŋuc jazawec: “Ŋic bâpiaŋnukac šâŋene Jesu.” 16Jesu e sabata hombaŋko gie iŋucne bawecte Judaŋic jaŋe râsi ecnembiŋ. 17Epie Jesuzi šiŋuc jazawec: “Mamac-nane e gie šušuhuc jaha baekac, eme noni iŋuc jaha wâc eekopac.” 18Eme Jesu e sabata hombaŋ hesifuckewec â Anuture Mamac-nane muhuc Anuture sâcko šuhuckewec, Judaŋic jaŋe wiac jajahec irec erâ mana gâpârerâ qaniŋte mumbiŋ.

Jesu e bâɋârec-nâporâ okacnere dâŋ mutara-nâreocmu

19Eme Jesuzi dâŋ šiŋuc jazawec: “No jâmbomac jâmbâŋ ŋazape mananiŋ, Ŋokâzi maŋticnere sâcne gie mi baekac, Mamaczi bame sâc honehuc baekac. Eki baekac ijaha Ŋokâzi baekac. 20Mamac e Ŋokâ honebâckeekacte gie baekac sâc jâutu-fâreekac, erâ gie ši honeŋgopieŋ sawa mâcne, fekicne sâko jâutume ŋoŋe honerâ wareckeniŋmu. 21Mamac e hâmokicne wiwic-joparâ bâɋârec-jopaekac, iŋuc jaha Ŋokâzi e me e bâɋârezo murâ bâɋâreocmu. 22Erâ Mamac e ŋic okacnere dâŋ mi mutara-jareekac, gie i Ŋokâre meo râewec. 23Eme ŋic jaŋe Mamac sâseeŋgopieŋ iŋuc jaha Ŋokâ sâsenšepieŋ. Moc e Ŋokâ mi sâseocmuzi, Ŋokâ sorewec, Mamac hâcne, e iŋuc jaha mi sâseocmu. 24No jâmbomac jâmbâŋ ŋazape mananiŋ: Moczi nore dâŋ mana maŋ ehuc, sorecnuwec e manasiŋkeocmu, ŋic e šiŋuczia juju sanaŋhec ekac. E okacnere biŋe mi ee hâmoc râpeckerâ jujuo rašiwec jukac hâcne. 25No jâmbomac jâmbâŋ ŋazape mananiŋ: Dameŋ moc maickeocmu, erâ ši biac maickekac hâcne, ira hâmokicnezi Anutu Ŋokâ-ticne ere dâŋ manarâ ɋârerâ juniŋmu. 26Mamac e jujure fuŋqizecne, eme Ŋokâ e iŋuc jaha jujure fuŋqizecne eocte qikiŋnecnewec 27Erâ e Ŋic Fâri Wâtuŋne jukacte ŋic,okacnere dâŋ mutara-jareocte mucnewec. 28Dâŋ irec manapie mi quŋkezejec. Dameŋ moc bakicne fokac i maickeme šâŋeruŋko foeŋgopieŋ jaŋe ere dâŋ wiwira manarâ wefunšoŋgopieŋ. 29Ehuc juju biaŋne jumbiŋzi juju sanaŋte faharenšoŋgopieŋ, â juju sâqocne jumbiŋzi kiŋte okacne roniŋte faharenšoŋgopieŋ. 30No nahacne maŋte gie i bapane mi fokac, Mamac-nanere micsâcko sawa okacnere dâŋ mutara-jareekopac. Iŋuc ehuc okacnere gie bape sâckoa eocmu. I no nahacne dâŋ mâcne, sorecnuwec ere dâŋ šaeckeekopac.

Anutuzi Ŋokâ-ticnere fuŋne bataniŋkeekac

31“No nahac fuŋne-nane mutaniŋkepe fârimâc eocmu. 32Fuŋne-nane i moczi mutaniŋkeocmu, erâ no manakopac, fuŋne-nane mutaniŋkeme fârine eocmu. 33Ŋoŋe Johane mu indiŋ ecnepie dâŋ fâri qizecne mutaniŋkewec. 34Erâ ŋiczi fuŋne-nane mutaniŋkeniŋte ine mi muekopac, ŋoŋe fuŋne-nane manarâ jujure hata âteniŋte irec mâc ŋaŋacnere muekopac. 35Johane e jâmbomac lambe sâko erâ tamae-ŋarewec. Ehame ŋoŋe mâc šâziriŋne nacbembeŋ hone aŋac ehuc jumbiŋ sawa.

36“Á nore fuŋne mutaniŋkeekac, e Johane iŋucne mâcne, e sâc moc. Mamac gie munarewec, gie irec fârine bâfuape ine Mamaczi sorecnume wahapo irec fuŋne taniŋkeekac. 37Mamac sorecnuwec eki hâcne fuŋne-nane mutaniŋkewec. Ŋoŋe ine e jahacne mickonec dâŋ mi manambiŋ â hawarine wâc mi honembiŋ. 38Erâ ŋoŋe dâŋticne maŋŋeŋicko sâcne mi râepie fohuc juekac. Ŋic sorewec ere dâŋ qikiŋnehuc wemocko iŋuc eniŋmu. 39Ŋoŋe miti papiao kecšiŋuc muhuc wose gufuc eeŋgopieŋ: Juju sanaŋ ira hâcne soŋkekicne. Erâ izi hâcne nore fuŋne mufuaekac. 40Eme ŋoŋe norao juhuc juju sanaŋhec ee i sifu qikiŋneeŋgopieŋ.

Judaŋic jaŋe Moserao maŋgâŋ roweckembiŋ

41“No ŋiczi sahac mumuteŋ wiac enareniŋte irec mi muekopac. 42Ŋoŋere fuŋne ine jâmbomac manaekopac, maŋŋeŋic Anuturea mi domaekac. 43No Mamac-nanere micte ŋoŋerao wahapo, eme ŋoŋe sifu âgo mi enareeŋgopieŋ. Juku ŋic moc e e jahacne maŋte fisime ine âgo ecneniŋmu. 44Ŋoŋe ŋaŋaczia mumuteŋ eec ehuc Anutu qâqâhâc sâko ere mumuteŋte mi eŋareekaczi wemocko mamanasiŋhec eniŋmu? 45Ŋoŋe nore šiŋuc mi munšepieŋ: Eki Mamactao dâŋnâŋec mugâpâre-nâreocmu. Iŋuc mâcne, ŋoŋe ŋic moctao roweckeeŋgopieŋ, Mose hâcne, eki mugâpâre-ŋareocmu. 46Mose e dâŋ qâreŋkewec i nore qâreŋkewec. Eme ŋoŋe ere dâŋ mana šakierâ muzac nore mâmâc mana šakienšapiŋ. 47Mosere dâŋqâreŋ qikiŋnehuc nore dâŋ wemocko mana šakieniŋmu?”