Rom 11 | KMG | STEP | Eme wiokopac: Anutuzi ŋicfâc-ticne behec-jopawec me? Aricne, iŋuc mi ewec. Noni Israe ŋic jaha wâc, Abrahamte ɋâric, Benjamiŋte guruonec

‏ Romans 11

Israe ŋic gâcne sâko maŋsanaŋ ehapie Anutuzi afecne rowosâec-jopawec

1 Eme wiokopac: Anutuzi ŋicfâc-ticne behec-jopawec me? Aricne, iŋuc mi ewec. Noni Israe ŋic jaha wâc, Abrahamte ɋâric, Benjamiŋte guruonec 2 Anutuzi qanaŋ manac-jopawec ŋic i mi behec jopawec. Me ŋoŋe Eliare binaŋ miti papiao i wose manac mi eeŋgopieŋ me? 3 E Israe ŋic jaŋere dâŋ muhuc Anutu šiŋuc âzâcnewec: “Wofuŋ, jaŋe porofetefâcge jopa-fârehuc alatage henšaŋnembiŋ, eme ši buc juhape no wâc nuniŋte muŋgopieŋ.” 4 Iŋuc mume Anutuzi dâŋ weniŋuc bâtikiecnewec? “No ŋic 7000 sakarec-jopape Baali nemu mi dapecnembiŋ.” 5 Eme dameŋ ši iŋuc jaha Anutuzi aki anonoc-ticnere erâ ŋic tiwâne rowosâec-jopawec juŋgopieŋ. 6 I aki anonoc-ticnere iŋuc ejarewecko juju bapa-jeŋicte mi ejarewec. Iŋuc mi eme muzac, ine aki anonoc fârine mi ezac.

7 Eme weniŋuc? Israe ŋic jaŋe wiac fârine bâfuazo mumbiŋ i mi bâfuambiŋ” rowosâec-jopakicne jaŋe sawa bâfuambiŋ, gâcne sâko ine maŋsanaŋ embiŋ. 8 Irec šiŋuc hâcne qâreŋkekicne fokac:

“Anutu e maŋjeŋic bâsifuckewec,
šâŋe-jeŋic bâhâpowec â hazec-jeŋic qâzic qawec.
Iŋuc ejareha jumbiŋzi jueŋgopieŋ.”
9 Á Dawidizi mu qâreŋ ewec:

“Jaŋe nânâ nahapie râsi fisipie fâfâc-jopazejec,
Mâreŋko jopaha okacne fisi-jarezejec.
10 Go šâŋe-jeŋic bâhâpotec tiŋtuŋ qanšepieŋ,
â râpe-jeŋic bahasicketec miŋgeŋ miŋgeŋ junšepieŋ sanaŋ.”

Oliwa jâcnao tieŋne jabane râe šuhuc ekicne

11 Eme wiokopac: Israe ŋic jaŋe fâfâc-jopawec i waha qâhâmoc-jopaocte iŋuc fuawec me? Iŋuc aricne, jaŋe bâbâpiaŋ râpeckepie qâpuc jaŋere biŋe ewec, ine qâpuc jaŋe manapie Israe ŋic jaŋe honec-joparâ iiŋguuŋ ejareniŋte iŋuc fuawec. 12 Eme miti qiqikiŋ-jeŋiczi mâreŋ sâc ŋic jaŋerao miti mâriri bâfuawecko, â dodocke-jeŋiczi ŋic qâpuc jaŋerao miti šâkâŋ bâfuawecko, opoŋ, juku furu jaha maŋjeŋic bârisiepie fârine mo iŋucne fuazokac!

13 Qâpuckonec opâ ruac ŋoŋe dâŋ ši ŋazape mananiŋ: No qâpuc ŋoŋere aposolo juekopaczi gie-nane baericko bašihuc baekopac, 14 i soctofafâc-nane âkeriŋ-jopape gâcnezi bâjâpecnuhuc biaŋkeniŋte. 15 Anutuzi Israe ŋic behec-jopame mâreŋ sâc miti fuawec, izi juku rocjopame mi hâmockonec ɋâɋârezi fuazokac me? 16 Nânâ hata qaqasune jambuŋkepene nânâ mâmâc sâcke-fâreekac, â jâc gâtânezi furu fome tieŋne iŋuc jaha furu foocmu. 17 Eme Anutuzi tieŋne gâcne hetâcne behec ehuc irec dodoma tacko oliwa kâteo fuakicne irec tieŋne go râe šuhuc egarewec. Eme oliwa gâtânere ŋiŋic wokemaŋzi gume hesiwiŋ egarehame, 18 go tieŋne raŋɋane mi mana pitiwac-jopahuc maŋfefe mi ezemec. Iŋuc ezicte šiŋuc manac: Go gâtâ gume hesiwiŋ mi ecnekomec, gâtâzi go egareekac. 19 Mupe go ŋifecne šiŋuc mecne mucmu: “Anutuzi no hâcne râe šuhuc enareocte tieŋne raŋɋane hetâcne behec ejarewec.” 20 I mukic mac. Jaŋe miti qiqikiŋ-jeŋicte hetâcne behec ejarekicne â go ine mamanasiŋgere dodomatac-jeŋicko domakomec. Irec go sahacge mi bafehuc rumerâ juzemec. 21 Anutu e oliwa e jahacne tieŋne mi akickewecko go iŋuc jaha mi akicguocmu. 22 Irec go buuruc-ticnere mecne â fâro-ticnere mecne mi nikecguzejec. Fâro-ticnere fârine i miti râpeckembiŋ jaŋerao fuawec, â buuruc-ticnere fârine i gorao fuawec. Eme go erao qohotahuc jutec fârine i sâcne fogareocmu. Iŋuc mi etec ine go wâc hetâcne behec egareocmu. 23 Erâ wâc tieŋne raŋɋane jaŋe maŋsanaŋ-jeŋic beheniŋmuo Anutuzi mocwâc râe šuhuc ejarezo murâ sâcne ejareocmu. 24 Eme kâteonec oliwa rocgurâ hae oliwa jâcnao râe šuhuc egareweczi hae oliwa e jahacne tieŋfâc mocwâc šuhuc-jopazo murâ mi quŋkeocmu, i onšoŋ jaha šuhuc-jopaocmu.

Judaŋic jaŋe juku mitimaŋko raši-fâreniŋmu

25 Âgofâc-nane, ŋoŋe, kâuc bahuc ŋaŋacne mamanao roweckerâ mana sifuckenšipiŋte dâŋ soŋne ši mufua-ŋarepe. Israe ŋic tucne jaŋe maŋsanaŋ erâ juhapie qâpuc sâko jaŋe mitire maŋko rašiniŋmu. 26 Rašihapie šâhec Israe ŋicguru qâqâhâc biaŋke-fâreniŋmu. Ʒiŋuc hâcne qâreŋkekicne fokac:

“Zioŋ haeonec Bâbâpiaŋ moc fuarâ
Jakoborao jawa âsu gârec ofaŋneme raocmu.
27 Iŋuc eme no sâqocne-jeŋic šurerâ
jaŋehec mocwâc šâšâfic epemu.”
28 Israe ŋic jaŋe qâpuc ŋoŋere erâ Biŋebiaŋte râsi juŋgopieŋ â rowosâec-jopakicnere ine mimiŋnefâc-jeŋic jaŋere erâ Anuture jorocfâc juŋgopieŋ. 29 Anutu e âgo šâšâfic dâŋsaric-ticne â hehefâre dâŋticne mi dockeocmu. 30 Qâpuc ŋoŋe mârâc jaha maŋsanaŋ erâ jumbiŋ, eme šâhec Israe ŋic jaŋe maŋsanaŋ ehapie Anutuzi buuruc-ticnao râec-ŋopawec. 31 Iŋuc jaha jaŋe maŋsanaŋ juhapie Anutuzi buuruc-ticnao ŋec-ŋopawec, i jaŋe wâc buuruc ejareocte iŋuc ewec. 32 Anutu e ŋic sasawa bâturec-jopahuc qaqatarao basanaŋ-jopawec, i mâmâc sasawa buuruc-ticnao ŋec-jopaocte iŋuc ewec.

Anutu e mâsi-ticnere â miti-ticnere muteŋkezo

33 Opoŋ, Anutu e mitire mâriri â maŋɋârâŋ â mamana saric-ticne irec šâkâŋne mo iŋucne fokac¡ Mumutara-ticnere fuŋne i ŋiczi mi mamanane gie bapa-ticnere hata i ŋiczi mi hohonene.

34 “Wofuŋte maŋko dâŋ fokac i mo ŋiczi manawec,
me dâŋ muhame mozi bafickerâ muwec?”
35 “Me mo ŋiczi e qanaŋ wiac moc qikiŋnecnewecko
tofane bazucneocmu?”
36 Wiac sasawa eraonec wareekac â erao siŋkerâ foekac â erao rafâreekac. Mumuteŋzi mumuteŋ i erao šuhuckeme šuhuc forašihuc juzejec sanaŋ. Jâmbomac.