Rom 3 | KMG | STEP | Hâc, eme Judaŋic jaŋe qâpuc jaŋehec sâc mocjaha eŋgopieŋ, â sahacko ma i wiac racne me?

‏ Romans 3

Hehesic-nâŋeczi Anuture dâŋ mi bawahaocmu

1 Hâc, eme Judaŋic jaŋe qâpuc jaŋehec sâc mocjaha eŋgopieŋ, â sahacko ma i wiac racne me? 2 Iŋuc aricne. Judaŋic jaŋe wiac bocjaha tahac-jopakicne. Jaŋe hâcne Anutuzi biŋedâŋ fuŋne fuŋne jazame irec rune embiŋ. 3 Eme weniŋuc? Judaŋic gâcne jaŋe dâŋte woŋec juku pârâckembiŋte šiŋuc muzo me? “Dodocke-jeŋiczi Anutu mume sasanaŋ-ticne bawahaocmu.” 4 I aric kereŋne¡ Anutu e buc mume sasanaŋ â ŋic ine mumu dodocne, iŋuc muzo. Miti qâreŋ moc šiŋuc hâcne fokac: “Go mumutiŋgezi dâŋfâri eocmu, â mumutaragezi ɋaɋacne eocmu.” 5 Eme hehesic-nâŋeczi Anutu tiŋne-ticnere fuŋne bajaŋgeŋkekacte weniŋuc muzo? šiŋuc muzo me? “Fuŋne iŋuc fokacte Anutuzi irec okacne nâreme mi sâckeocmu.” (Dâŋ i ŋic mamanare sâcko mukopac.(c) 6 I aric kereŋne¡ Anutu e hehesic-nâŋecte okacne nâreme sâckeocmu. Mâc muzac wemocko mâreŋŋic šeŋgoma dâŋnâŋec sâcne mutarazac. 7 Eme ŋifec ine burecdâŋ-nanezi Anuture dâŋfâri dopeckeme šâŋe biŋe-ticne irec erâ fekacko wemocte sifu no wâc sâqocne bapa munarehuc okacne nareekac? 8 Erâ wemocte šiŋuc mi mueŋgopeneŋ: “Sâqocne bapene ŋerisierâ fârine biaŋne fuaoc me.” Nâŋe iŋuc mueŋgopeneŋ munârehuc micko âkec enâreeŋgopieŋ hâcne. Dâŋ iŋucne muhuc hata i âteeŋgopieŋ jaŋe okacne fua-jareme sâckeocmu.

Ŋic mâmâc sasawa qâsoriekicne

9 Eme weniŋuc? Judaŋiczi ŋic gâcne jowarurâ sâc moc juŋgopeneŋ me? I aricne jâmbâŋ. Biac mumbeneŋ, Judaŋic â Grikŋic nânâc mâmâc sâqocnere kiŋaŋ qaeŋgopeneŋ. 10 Dâŋqâreŋ moc šiŋuc hâcne fokac:

“Ŋic moczi tiŋne moc mi jukac, aric ɋaɋacne;
11 moczi mamanahec moc mi jukac,
moczi Anutu wira basac mi ecneekac.
12 Jaŋe qâsoriekicne sasawa,
šeŋgoma repirembiŋ;
moczi moc wiac biaŋne mi eekac,
arictac jâmbâŋ.
13 Marac-jeŋic i hâmoc qâŋɋâŋ bâbâfua,
nameŋ-jeŋic forisieme eatuc dâŋ wefuekac,
qotâ marasiŋ kisoŋnerâ jueŋgopieŋ.
14 Bipic-jeŋic sâwec â aaric dâŋte gegerockeekac.
15 Ʒikare kike afec jueŋgopieŋ.
16 Ima samaki bahuc tuhu bâfuaeŋgopieŋ.
17 Wamare hata ine kâuc baeŋgopieŋ.
18 Á šâŋe mai-jeŋicko Anuture hâhâwic mi fokac.”
19 Nâŋâc šiŋuc manaeŋgopeneŋ: Sâcmutâc dâŋ i dâŋ rune nâŋe nazakicne. I ŋic sasawa fuŋne-nâŋec rituhuc micnâŋec ɋâtâocte ekicne. Eme ŋic mâmâc sasawa kiŋnâŋec Anuturao fua-fârekac. 20 Sâcmutâc dâŋte erâ kiŋ nânâwoc ro i Anuturao moc mi fokac. Sâcmutâc dâŋzi sindaŋ-nâŋec bataniŋkeekac hâcne.

Jesu taha-nâŋec bawecte e manasiŋkehuc kiŋ tâmiric ezo

21 Eme irec sâcmutâc dâŋ fohame Anutuzi tiŋne-ticne fua taniŋkeocte hatane moc bâfuawec fokac, hata i sâcmutâc dâŋqâhâcko â porofete jaŋerao wâc biŋedâŋ-ticne mu qâreŋ ekicne. 22 Jesu Kristo manasiŋkehuc kiŋfâsâc erâ juju, hata i hâcne mamanasiŋhec sasawa jaŋere biŋe ekac. Fuŋne-nâŋec bârâwiŋ mi fokac, 23 Nâŋâc mâmâc sasawa sâqorembeŋte Anuture eri tatamacko fifisinere sâc mi eŋgopeneŋ. 24 Ehame Kristo Jesu e kiwiric-nâŋec rowecte Anutuzi aki anonoc-ticnere erâ kiŋfâsâc bacnâpoekac. 25 Eki mume Jesu e socticnezi sâqocne-nâŋecte erâ taha bawec, eme e manasiŋkeniŋmuzi taha i biŋeckeniŋmu. Sâqocne ewarehuc jukicne irec kiŋ i Anutuzi buuruc-ticnere râeme fowarehuc juwecte Jesu hâmocko râewecko tiŋnere fuŋne bataniŋkewec. 26 E tiŋnere rune juekac, â Jesu manasiŋkeniŋmu jaŋe kiŋfâsâc bacjopaekac, irec fuŋne dameŋ šiŋuczia taniŋkeocte iŋuc hâcne ewec.

Mamanasiŋte erâ kiŋfâsâc fuazo

27 Eme mumuteŋ-nâŋec moc fokac me? Aricne, mumuteŋ-nâŋec hetâtiekicne. Wemozi hetâtiewec? Eehâmo giere hatazi me? Aricne, mamanasiŋte hatazi. 28 Irec dâŋ šiŋuc manapene fozejec: Ŋic nâŋâc sâcmutâc dâŋ rereŋkere mâcne, mamanasiŋte erâ kiŋfâsâc fuaeŋgopeneŋ. 29 Me Anutu e Judaŋic nâŋere Anutu sawa, qâpuc jaŋere aricne? Iŋuc mâcne, e qâpuc jaŋere Anutu jaha wâc. 30 E Anutu-nâŋec mocjaha jukaczi hâcne Judaŋic â qâpuc mâmâc mamanasiŋ-nâŋecte erâ kiŋfâsâc bacnâpoekac. 31 Eme iŋuc muhuc mamanasiŋte erâ sâcmutâc dâŋ hetâtieŋgopeneŋ me? Aric kereŋne, sâcmutâc dâŋ hešakieŋgopeneŋ.