Rom 4 | KMG | STEP | Eme sahackopec mimiŋne-nâŋec Abraham e wemo bâfuawec munaŋmu?

‏ Romans 4

Abraham â Dawidi jahe Anutu manasiŋkepire kiŋjekic behewec

1 Eme sahackopec mimiŋne-nâŋec Abraham e wemo bâfuawec munaŋmu? 2 E jahacne eehâmo giere erâ kiŋticne hefâsâewecko ropaŋ sâcne focnezac. Erâ Anuture maio ine arictâc. 3 Miti papiao dâŋ šiŋuc fokac i: “Abraham e Anutu manasiŋkeme irec erâ maname kiŋticne tarawec.” 4 Moc e gie bame furime râcnepene izi katucmâc rârâcne mi ekac, tofa babazucne ekac. 5 Á moc e ine eehâmo gie mi bapa, sâqocne bapa kiŋjeŋic beheekac e manasiŋkeocmu, eme Anutuzi ere hâcne mamanasiŋ-ticnere erâ maname kiŋfâsâc eocmu. 6 Dawidi e iŋuc jaha Anutuzi ŋic moc eehamo gie mi baha, akickehuc kiŋ behecneocmu ere mu šeri ehuc kecšiŋuc qâreŋkewec:

7 “Bahac-jeŋic behekicne,
â sâqocne-jeŋic bâtâmirekicne,
jaŋere manape šerine ekac;
8 ŋic moc Wofuŋzi manacneme kiŋhec mi eekac,
ere manape šerine ekac.”

Abrahamzi micne bapa-nâŋec ewec

9 Mušeri dâŋ kecši i mahec nâŋere biŋe sawa ekac me ma tâmiric jaŋere mâmâc ekac? Abrahamte šiŋuc manaeŋgopeneŋ: E Anutuzi mamanasiŋ-ticnere erâ kiŋ behecnewec. 10 Mo dameŋko behecnewec, mahec juhame me ma tâmitric juhame behecnewec? Mahec mâcne, ma tâmiric juhame behecnewec. 11 E ma tâmiric juhuc Anutu manasiŋkeme kiŋticne behecnewec irec maqâreŋ šâhec râecnewec. Eme Abraham e iŋuc ehuc ine ma tâmiric jaŋe Anutu manasiŋkehuc kiŋfâsâc eeŋgopieŋ jaŋere micne ewec. 12 Erâ mahec nâŋere micne bapa wâc ewec, erâ mahecte sawa mâcne, e ma tâmiric juhuc mamanasiŋte kike hata âtewec, hata ijaha mimiŋ qâjâpec âtehuc Abraham micne bapa-nâŋec mucnepene sâckeocmu.

13 Anutuzi Abraham â ɋâricfâc-ticne mâreŋ sâko mâreŋ biŋe qajarewec, i sâcmutâc dâŋ rereŋte erâ mâcne, mamanasiŋ-ticnere erâ kiŋticne behehuc iŋuc ecnewec. 14 Eme biŋe qajarekicne hâcne i sâcmutâc dâŋ rune jaŋere ezac muzac, ine mamanasiŋzi wiac jawane ezac â mitio biŋedâŋ feŋec-nâpokicne i fârimâc ezac. 15 Sâcmutâc dâŋzi kiŋte okacne fai-nâŋecko râeekac. Sâcmutâc dâŋ tâmiricko ine qaqatara mi fuaekac. 16 Irec hâcne wiac biŋe qanarekicne i mamanasiŋte erâ fuaocmu. Wemocte? I aki anonoczi feŋeŋ râecneme Abrahamte ɋâricfâc sasawa nâŋâcnao sanaŋkeocte. Sâcmutâc dâŋko roweckembiŋ jaŋe sawa mâcne, Abrahamzi mamanasiŋ hata âtewec ijaha âteeŋgopeneŋ nâŋâcnao mâmâc. Eki hâcne Anuture maio apa wirec-nâŋec ekac. 17 Dâŋqâreŋ šiŋuc hâcne fokac: “Noni go ŋic gurune gurune jaŋere mamac ecmurâ mugarepo.” Abraham e ine Anutu manasiŋkehuc šiŋuc manapaŋkewec: “E hâmoc qâŋɋâŋ bâɋârezo murâ bâɋâreocmu â wiac mi fokac i mume fuaocmu.”

Abraham mamanasiŋ fekicne focnewec

18 E ŋicguru bocjaha jaŋere mamac ezokac, dâŋ i mana hameŋke-bipiehuc sifu irec mamanac juwec, šiŋuc âzâcnekicnere: “Ɋâricfâcge iŋuc fuanšoŋgopieŋ.” 19 Erâ wâc e jara-ticne 100 bazukicnezi e jahacne sahac bâmuzuckekicne â Sarare sahac kereŋkekicne i hone-bipiehuc mamanasiŋ-ticne sifu mi ŋeŋgoroŋkewec. 20 Anutuzi biŋedâŋ âzâcnewec i maname fârimâc mi ewec, ehuc mamanasiŋte sanaŋkerâ Anuture maname fekicne sâko ehame šiŋuc muhuc mana utuckewec: 21 Anutu e wiac mocte biŋe qaocmu i fârine sâcne bâfuaocmu. 22 Irec Abraham e mamanasiŋ focnewecte Anutuzi ere maname kiŋfâsâc ewec.

23 Anutuzi maname kiŋfâsâc ewec, dâŋ i Abrahamte sawa mi qâreŋkekicne, nâŋâcnere wâc mâmâc. 24 Wofuŋ-nâŋec Jesu hâmockonec bâɋârewec Anutu hâcne e manasiŋkepene nâŋâcnere iŋuc jaha maname kiŋfâsâc enaŋmu. 25 Jesu hâcne kiŋbahac-nâŋecte erâ hâmocko râekicne, erâ wâc kiŋfâsâc enaŋte hâmockonec bâɋârekicne.