Revelation of John 2
Ya꞉suti Epesese Sose Tawakaluba꞉tamo Tabo Doemiya꞉
1Ba꞉bene Kodawate tabo gala natamo na꞉kagoi, “Wadiyala ama꞉ Epesese sose nopodawatamo tabo ba꞉ma ka꞉na noema꞉.- Na ba꞉ sa꞉ba꞉ni oloki tu hapu kokotamo uwatedawala, ba꞉gala na ba꞉ sa꞉ba꞉ni golodo alo ipuwalo pata꞉dawala, ba꞉bema꞉ nale la꞉ Epesese hibima꞉ midipa꞉tamo tabo ba꞉ma ka꞉na olamagitamo. a
- Na huiyatiya la꞉godolo ba꞉moe kapiya modoboha꞉ komo buminamo, la꞉le dopamo tetelo etate eta malemalelo konomamo keba ka꞉na kemalagidolonakuima, la꞉ ba꞉be komo a꞉miya꞉puimata.
- Huiyatiya numa꞉la꞉, kapiya komote la꞉godolo modobolo ditana ba꞉be komo ba꞉ ba꞉ma ka꞉nala, puya꞉te Nikolayasiko ta꞉matapima꞉ deda꞉hana, la꞉le ba꞉bi kuba ododilipino komo ubiha꞉ma꞉ konomamo eda꞉hanamata, nale ibino komo ubiha꞉ma꞉ keba ka꞉na keda꞉namo ba꞉ba ka꞉na.
- Ba꞉bema꞉ galagodawa, Godokono Gobogobote sose tawakaluba꞉tamo dolamagita, wadiyala ama꞉ ba꞉be tabo nulia꞉! Ba꞉ hibila, puya꞉te ibino hibima꞉ midi ipuwalo wato kikipo da꞉lawemena꞉, nale iba꞉tamo modobo tabo kogoema꞉nemo, iba꞉te Godokono Pali ipuwalo da꞉la꞉na ba꞉be kehoeno wiboha꞉ ka꞉ka꞉ gao konahama꞉.” d
Ya꞉suti Samena Sose Tawakaluba꞉tamo Tabo Doemiya꞉
8Ba꞉bene Kodawate tabo gala natamo na꞉kagoi, “Wadiyala ama꞉ Samena sose nopodawatamo tabo ba꞉ma ka꞉na noema꞉.- Na ba꞉ Mabula ba꞉gala na ba꞉ Kuititila. Nale da꞉hoiya꞉mo ka꞉ka꞉ gala a꞉kalawiya꞉mo, ba꞉bema꞉ nale la꞉ Samena hibima꞉ midipa꞉tamo tabo ba꞉ma ka꞉na olamagitamo.
- Ba꞉bema꞉ galagodawa, Godokono Gobogobote sose tawakaluba꞉tamo dolamagita, wadiyala ama꞉ ba꞉be tabo nulia꞉! Ba꞉ hibila, puya꞉te ibino hibima꞉ midi ipuwalo wato kikipo da꞉lawemena꞉, iba꞉te Koe Haboeno hoe temeteme a꞉kiya꞉tawahamena꞉, ba꞉be habalo hibima꞉ midiha꞉pino ha꞉laha gobogobate hoe temeteme ipuwamo gala kakanogomoma꞉na꞉.” g
Ya꞉suti Pegamama Sose Tawakaluba꞉tamo Tabo Doemiya꞉
12Ba꞉bene Kodawate tabo gala natamo na꞉kagoi, “Wadiyala ama꞉ Pegamama sose nopodawatamo tabo ba꞉ma ka꞉na noema꞉.- Na ba꞉ giha kiyokiyo gila꞉go dawala, ba꞉bema꞉ nale la꞉ Pegamama hibima꞉ midipa꞉tamo tabo ba꞉ma ka꞉na olamagitamo.
- Na huiyatiya la꞉godolo kapiyakapiya modoboha꞉ komo bulamenamo. Dopo komo ba꞉ ba꞉ma ka꞉nala, la꞉eno hibima꞉ midi kapiyuimi ipuwalo komopa꞉te kuba ododidawa Ba꞉ilamakono iya꞉tulame gabodo ebe beta꞉matana. Iyo, Isalaelanapino iniwali tetelo ba꞉be dawate Ko Gawadalagi Balakako biya꞉tumiya꞉, ebete naeno tawakaluba꞉go ba alaholoho ibi Saitanakono gubi ipuwamo komagatalema꞉. Ba꞉bema꞉ Balakate ibi ba꞉ma ka꞉na kubahilamiya꞉, ebete ibi kuba gabamo emogabuilamelo hibima꞉ midiha꞉pa꞉te ida꞉da꞉lino gobogobo ba adikulame hawa꞉goeno ilina iba꞉tamo dikalamiya꞉, naeno tawakaluba꞉te ba꞉be katene ba꞉bo nahuya꞉. Ba꞉be atu tetelo iba꞉te ibino kuba ubi komamo ba papamila꞉ha, bohelemele pilo komo ba꞉gala kamenakamena pilo komo ba꞉bo ododiliya꞉. h
- Ba꞉gala la꞉eno eta kuba komo ba꞉ma ka꞉nala, komo la꞉ Nikolayasikono kuba iya꞉tulame gabodo wapata꞉lamenamata.
- Ba꞉bema꞉ galagodawa, Godokono Gobogobote sose tawakaluba꞉tamo dolamagita, wadiyala ama꞉ ba꞉be tabo nulia꞉! Ba꞉ hibila, puya꞉te ibino hibima꞉ midi ipuwalo wato kikipo da꞉lawemena꞉, nale Godokono awalela ipuwalo ditana ba꞉be baa꞉ iba꞉tamo kikalamema꞉nemo, ba꞉be ka꞉ka꞉ baeno eta mahilo ba꞉ ma꞉nala, ba꞉gala nale ibi hiliyonomatamo keyakeya nakola hegehege ibino uliuli mahilagoeno kikalamema꞉nemo. Ba꞉ba tetelo ibi ipuwalo komopa꞉te iya꞉tawahaheno, etate ebeno mahilagoeno nakola kalawe, etate ebeno mahilagoeno nakola kalawe, iba꞉te ba꞉ba ka꞉na ba ewagele ibino hido huiya nagodone ba꞉bo kuwatema꞉na꞉.” j
Ya꞉suti Tayataila Sose Tawakaluba꞉tamo Tabo Doemiya꞉
18Ba꞉bene Kodawate tabo gala natamo na꞉kagoi, “Wadiyala ama꞉ Tayataila sose nopodawatamo tabo ba꞉ma ka꞉na noema꞉.- Na ba꞉ Godokono Gudula, naeno baiditi koe powamo wamotenamena ba꞉gala naeno natote alonomoma꞉ eda꞉hanamena, iyo, okodawate hiya꞉nomo auli ilinoeno dalowa꞉ koa꞉mo demadolamemene, ba꞉bene kalikamo metetehote a꞉la꞉minanomoma꞉ da꞉midinako, naeno natoeno a꞉la꞉minale komo ba꞉ ba꞉ba ka꞉nala. Ba꞉bema꞉ nale la꞉ Tayataila hibima꞉ midipa꞉tamo tabo ba꞉ma ka꞉na olamagitamo. k
- Na huiyatiya la꞉godolo kapiya modoboha꞉ komo buminamo, la꞉le kuba Ko Gawadalagi Kamena Yesebelakono kuba ododili komo dito ulama꞉tepalemenakomata. Ebe ha꞉kiya ebe Godokono ukui hawakalimidawama꞉ ha꞉da amiho gabodo goena, ba꞉bema꞉ ebete ba꞉ ba꞉ba ka꞉na naeno komo huiyaha꞉ okopi kuba gabamo emogabuilamena. Iyo, komo iba꞉te ebeno iya꞉tulame komamo ba papamila꞉ha bohelemele pilo komo ba꞉gala kamenakamena pilo komo ba꞉bo ododilinaka, ba꞉gala hibima꞉ midiha꞉pa꞉te ida꞉da꞉lino gobogobo adikulamelo hawa꞉goeno ilina dikalamenaka, komo iba꞉te ba꞉be katene dito nahanaka. l
- Huiyatiya kalakala konomola, komo la꞉ Tayataila hibima꞉ midipa꞉te Yesebelakono ha꞉da amiho iya꞉tulame komamo kapapamila꞉hanaha꞉, ba꞉bema꞉ ebeno ta꞉matapa꞉te kebe iya꞉tawa komokomo Saitanakono ugumuili komoma꞉ da꞉ga꞉lana, la꞉le ba꞉bi kuba komokomo la꞉eno ukuia꞉mo iba꞉godone kuwatenaha꞉. Ba꞉be mabuma꞉ naeno kalakalate la꞉tamo hibilo ba itana, ba꞉moe tutumu tabo kapiyanomo la꞉tamo ikalamemata,
- Ba꞉bema꞉ galagodawa, Godokono Gobogobote sose tawakaluba꞉tamo dolamagita, wadiyala ama꞉ ba꞉be tabo nulia꞉!”
Copyright information for
KNVARAMIA