2Cor 13 | KPG | STEP | Deenei tolu holongo ga hanadu iei au gi godou baahi. Di Beebaa Dabu e helekai boloo, “Nia mee huogodoo e hai gi haga modongoohia gi donu mai i baahi nia daangada dogolua be dogodolu.”

a 13.1:Deut 17.6, 19.15

‏ 2 Corinthians 13

Nia bule mo nnagaaloho hagamuliagina

1 Deenei tolu holongo ga hanadu iei au gi godou baahi. Di Beebaa Dabu e helekai boloo, “Nia mee huogodoo e hai gi haga modongoohia gi donu mai i baahi nia daangada dogolua be dogodolu.” ^a 2 Au gu hai adu gi goodou nia mee aanei i mua i dogu lua holongo ne hanadu iei au gi godou baahi. Gei au e haga langahia labelaa adu gi goodou i dogu madagoaa dela e de igolo i godou baahi, bolo dogu madagoaa dela ma ga hanadu labelaa gi godou baahi, deai tangada i digau ala ne hai nadau ihala i mua e mee di tanga gi daha mo di hagaduadua ai. 3 Goodou ga iloo bolo Christ le e helekai mai i di au, geia hagalee bagege dono hai hegau i godou baahi, geia e hagi aga ono mahi adu gi goodou. 4 Mee ne daudau i di loobuu i dono bagege, gei mee gu mouli i nia mogobuna o God. Gimaua hogi e paagege madalia a mee, gei gimaua hogi e mouli madalia a mee i nia mogobuna o God i di mau hai hegau adu gi goodou. 5 Hagadina ina goodou be goodou digau e noho i di mouli hagadonu. Goodou gu iloo bolo Christ le e noho i godou lodo? Maa goodou ga de iloo goodou, e hai be di mee goodou gu magedaa di hagadina goodou. 6 Gei au e hagadagadagagee huoloo bolo goodou e iloo hua bolo gimaua hagalee kili gi daha mau hagadonu. 7 Gimaua e dangi ang gi God bolo goodou gi hudee heia nia mee huaidu, gei hagalee bolo gi humalia gimaua i mua nia daangada, gei bolo goodou gi heia nia mee ala e donu, maeaha e hai bolo gimaua e huaidu. 8 Idimaa, gimaua e deemee di hai mau mee ala e hai baahi gi di tonu, e mee hua di hai mau mee ang gi di tonu. 9 Gimaua e tentene huoloo i di mau paagege, gei goodou e maaloo! Gei deenei di mau mee e tangi ai gi God bolo gi heia goodou gi odi anga. 10 Au e hihi adu nia mee aanei i dogu madagoaa dela e mogowaa i goodou, bolo di madagoaa dela ma ga dau adu iei au gi godou baahi, gei au gi dee leelee maaloo adu gi goodou i dogu hai hegau au i nia mogobuna o Tagi ala ne dugu mai gi di au. Malaa, nia mogobuna ala e hagahumalia adu gi goodou, hagalee nia mogobuna e hagahuaidu ai goodou.

Nia hagaaloho hagaodi

11 Ogu duaahina nei, au e hai dagu hagaaloho adu gi goodou. Goodou gi hagamahi huoloo. Goodou hagalongo gi agu mee aanei ala ne hagi adu gi goodou. Goodou gi buni di manawa e dahi, noho i di aumaalia, gei di aloho mo di noho i di aumaalia o God ga noho i godou baahi.

12 Goodou gi hagadau hagaaloho i godou mehanga gi di hagaaloho o nia dama a Christ.

Nia dama a God huogodoo e hai di nadau hagaaloho adu gi goodou.

13 Tumaalia o tadau Dagi go Jesus Christ, mo di aloho o God, mo di hagadaubuni o di Hagataalunga Dabu gi madalia goodou huogodoo.