2 Corinthians 2
1Au gu hagamaanadu bolo au hagalee gila adu gi godou baahi , gi dee manawa gee goodou. 2Maa au ga haga lodo huaidu goodou, malaa, koai dela ga mee dana haga tentene au? Go goodou hua ala ne hagahuaidu ko au! 3Deenei laa dagu mee ne hihi adu gi goodou dagu lede deelaa. Au nogo hagalee hiihai e hanadu gi goodou, bolo au ga lodo huaidu gi di mee i godou baahi, idimaa go goodou ala go agu gau e maanadu bolo e haga tentene au. Au e iloo bolo au ma ga manawa lamalia, gei goodou hogi e manawa lamalia. 4Deenei laa, au gu hihi adu gi goodou dagu lede i lodo dogu manawa gee, gei e dangi ogu lodo, hagalee bolo au e hagahuaidu goodou, gei bolo goodou gi longono ai godou lodo i dogu aloho i goodou.Dumaalia ang gi tangada dela gu ihala
5Malaa, maa iai tangada gu haga manawa gee dana dangada i goodou, hagalee ne hai di maa mai gi di au, geia ne bida hagahuaidu hua goodou huogodoo, be hunu goodou. (Au e helekai beenei, idimaa au e de hiihai di helekai daamaha i mee.) 6Gei dono hagaduadua dela ne kae mai godou baahi dogologo, la gu dohu hua gi mee. 7Deenei laa, goodou gi dumaalia gi hagamaamaa ina a mee, gi dee damanaiee hua ono lodo huaidu, ga hagahuaidu dono mouli. 8Au e dangidangi hagamahi adu gi goodou bolo goodou gi heia a mee gi iloo bolo goodou e aloho i deia. 9Idimaa, deenei tadinga dela ne hihi ai dagu lede, ga hagau adu gi goodou, bolo gi iloo eau be goodou gu tuu maaloo ge gu daudali agu agoago i nia madagoaa huogodoo. 10Maa goodou ga dumaalia gi tangada i dana mee dela ne hai, gei au e dumaalia labelaa gi mee. Maa au ga dumaalia, be di maa di mee i golo belee dumaalia iei au, gei au e hai di maa i mua nia golomada o Christ i goodou, 11bolo gi dee maaloo hua Satan i gidaadou, idimaa, gidaadou e iloo hua ana hagamaanadu huaidu.Paul e dee noho maalia i Troas
12I dogu dau adu gi Troas belee hana e agoago di Longo Humalia o Christ, gei au ga gidee bolo Dimaadua gu huge mai di bontai humalia belee hai agu hegau i golo. a 13Gei au e de nnoomaalia ogu lodo, i di au e de gidee au tadau duaahina go Titus i di gowaa deelaa, gei au ga hagaaloho gi digaula ga hana gi Macedonia.Gu aali mai i Christ
14Gidaadou ga danggee ang gi God, go mee dela e dagidagi gidaadou i tadau aali i baahi o Christ, ga hai gidaadou gi iloo dono maalama, gi hagadele ina ang gi nia daangada huogodoo, gi hai gadoo be di kala o di lolo kala, dela ma ga modoho dono kala gi daha ang gi nia gowaa huogodoo. 15Idimaa, gidaadou gu kala ang gi God i di kala o Christ. Di kala deenei ga modoho ang gi digau ala ga dagaloaha, mo ang gi digau ala ga kili gi daha. 16Gidaadou e hai gadoo be di bilau o tangada made ang gi digau ala ga kili gi daha, gei gidaadou e hai gadoo be di lolo kala o di mouli ang gi digau ala ga dagaloaha. Malaa, koai dela e mee di hai tegau deenei? 17Gimaua hagalee hai be digau dogologo ala e haihai nadau mee dilikai gi nnelekai a God, e halahala ai nadau hagahumalia. Gei gimaua e agoago gi donu i mua nia golomada o God dela ne hagau mai gimaua, gadoo be nia hege ni Christ.
Copyright information for
KPG