2 Corinthians 3
Digau hai hegau o di hagababa hoou
1Malaa e hai behee, gimaua gu hai be digau e bida hagaamu gimaua? Be gimaua gu hai be digau ala i golo ala e hiihai gi di lede haga modongoohia adu gi goodou, be di lede mai godou baahi? 2Ma go goodou ala go mau lede haga modongoohia, ala gu hihi gi lodo mau manawa, gu iloo ge gu mee di dau go nia daangada huogodoo. 3Ma gu modongoohia hua bolo ma go Christ dela ne hihi di lede deenei, ga gowadu go gimaua. Di lede deenei hagalee ne hihi gi nia inki, gei ne hihi gi di Hagataalunga o di God Mouli. Hagalee ne hihi gi hongo nia baahi hadu, gei ne hihi gi lodo nia hadu manawa o nia daangada. a 4Gimaua e helehelekai beenei, i mau hagadagadagagee huoloo gi God mai i Christ. 5Gimaua hagalee ne wouwou ga mee ai di hagamaanadu di mee mai i gimaua. Gei di mau kabemee dela ga mee di hai mau mee, la ne daamada mai baahi o God. 6Ma go mee dela ne hai gimaua gi hai digau e mee di hagadele di hagababa hoou, hagalee go di hagababa dela ne hihi gi nnaganoho gei di hagababa o di Hagataalunga Dabu, idimaa, nnaganoho ala ne hihi, le e hidi mai di made, gei di hagababa hoou o di Hagataalunga Dabu, le e hidi mai di mouli. b 7Nnaganoho ala ne hihi gi di gili nia hadu le e madamada huoloo i di madagoaa nia maa ne gaamai gi nia dama o Israel, gei digaula gu deemee di mmada adu gi nia golomada o Moses, idimaa di madamada dela gu i-di gili ono golomada, gei di madamada deenei, le e odi gi daha, ga hagalee. Maa nnegau o nnaganoho ala e hidi mai di made, le e madamada huoloo beelaa, c 8malaa e hai behee? Nnegau o di Hagataalunga Dabu hagalee koia e madamada gi nonua? 9Maa nnegau o di hagi aga le e madamada, di madamada o nnegau ala e gaamai di mouli, la koia e madamada huoloo gi nonua. 10Idimaa, di madamada o lodo di madagoaa i mua, la hagalee tau ang gi di madamada o di madagoaa dolomeenei. 11Nia mee ala ne odi gi daha le e madamada, malaa di madamada o nia mee ala hagalee e odi gi daha, la koia e madamada huoloo gi nonua! 12Deenei laa, gimaua e agoago adu gi goodou i di mau manawa maaloo, idimaa, gimaua iei di mau hagadagadagagee i golo i nia mee aanei. 13Gimaua hagalee hai be Moses dela ne gahu dono libogo gi di gahu libogo, bolo gi dee mmada nia dama o Israel gi di madamada deelaa, dela ma ga odi gi daha, ga hagalee. d 14Nadau lodo gu haga hamaaloo dangihi, ga dae mai loo gi dangi nei. Di gahu libogo deelaa, le e duuli huaigolo nadau maanadu i di madagoaa ma ga dau di hagababa namua. Go Christ hua dela e mee di daa gi daha di gahu libogo deelaa. 15Dangi nei, gei di gahu libogo la i-golo hua, dela e duuli nadau maanadu i di nadau madagoaa ma ga dau Nnaganoho Moses. 16Gei di gahu e mee di daa gi daha, be di hai o di beebaa dela e helekai i Moses, “Dono gahu hii libogo e daa gi daha di madagoaa mee ga huli ang gi Dimaadua.” e 17Dimaadua deenei la go di Hagataalunga Dabu. Di gowaa dela iai di Hagataalunga o Dimaadua, deelaa di gowaa iai di aumaalia. 18Malaa, gidaadou huogodoo gu maahina i di madamada o Dimaadua i di hagalee gahu tadau hadumada, gei di madamada deelaa dela e hanimoi i baahi o Dimaadua, deelaa go di Hagataalunga dela e huli gidaadou gi hai be Dimaadua i di madamada dela e damana gi nonua.
Copyright information for
KPG