Ephesians 4
Di hagadaubuni o tuaidina
1Au, tangada galabudi hai hegau gi Tagi, e hagamahi bolo goodou gi mouli i di mouli dela ne dugu adu go God i dono madagoaa ne gahi mai goodou. 2Nia madagoaa huogodoo goodou gi manawa balabala, hila gi lala, mo di hagakono di manawa. Haga modongoohia ina godou aloho i di godou hagabalabala i goodou. a 3Hagamahi daahi hua beelaa di hagadaubuni dela e gowadu go di Hagataalunga mai i di aumaalia dela e hagabuni goodou gi di gowaa e dahi. 4Ma tuaidina hua e-dahi, di Hagataalunga hua e-dahi, gadoo be di hagadagadagagee hua e-dahi dela ne gahi ginai goodou go God. 5Tagi hua e-dahi, di hagadonu hua e-dahi, mo di babdais hua e-dahi, 6di God hua e-dahi, Tamana o nia daangada huogodoo, Tagi digau huogodoo, e ngalua i lodo digau huogodoo, ge e noho i lodo digau huogodoo. 7Tangada nei mo tangada nei la gu kae di wanga dehuia gi tau ang gi di mee a Christ ne dugu anga, 8gi hai be nia helekai di Beebaa Dabu dela e helekai:“Di madagoaa o mee ne hana gi di gowaa dela i nua loo, mee ne lahi ana gau galabudi dogologo dalia ia, ga wanga ana wanga dehuia gi ana daangada .” b
9“Mee ne hana gi nua” e hai dono hadinga bolo aha? E hai dono hadinga boloo: matagidagi mee ne haneia gi di gowaa koia mugi lala loo i henuailala. 10Deelaa laa, tangada dela ne haneia gi lala, la go mee hua dela ne hana gi baahi nua nia langi, belee haga honu di langi hagatau. 11Ma go mee dela “ne wanga ana wanga dehuia gi nia daangada,” ga dongo hunu gau belee hai digau agoago hagau, nia soukohp, digau kae di Longo Humalia, digau agoago, mono tentei. 12Mee ne hai di mee deenei belee hagatogomaalia nia daangada a God huogodoo gi nia hegau daumaha, gi mee di haga duu aga tuaidina o Christ. 13Gei gidaadou huogodoo ga buni mai gi lodo di hagadonu e dahi, mo di iloo di Tama a God. Gidaadou ga hai digau e mmaadua i lodo tadau hagadonu, ga tugi loo gi di hagahonu o Christ. 14Gei gidaadou ga hagalee hai be nia damagiigi lligi, ma ga daahee i nia beau, ge iliili go di madangi hulihuli go nia agoago o digau halahalau dangada, ala e dagi hunu daangada gi lodo di hala gi nadau hai halahalau dangada ala e hai. 15Malaa, gidaadou gi tomo aga i nia ala huogodoo gi hai be Christ, dela go di libogo, mai i tadau helehelekai i di tonu mo di aloho. 16I lala ono mogobuna, nia dudaginga huogodoo o tuaidina gu tau gi di gowaa dahi, gei tuaidina hagatau le e daahi go nia dudaginga huogodoo o tuaidina. Maa tudaginga nei mo tudaginga nei ga hai dana hegau, gei tuaidina hagatau ga tomo aga, ga bida haga duu aga ia mai i di aloho. c
Di mouli hoou i baahi o Christ
17Au e bule goodou i di ingoo o Tagi, gi hudee mouli bouli, gadoo be digau ala e balumee nadau maanadu, ono hadinga ai, 18nadau hagabaubau la i-lodo di bouli. Digaula hagalee dau gi di mouli o God, i nadau noho hua i di haga longoduli mo di hiinoho. 19Digaula gu de longono nia manuu o di langaadia, gu bida wanga nadau huaidina gi heia nia huaidu, gei e hai nadau hangaahai huaidu huogodoo. 20Hagalee deelaa di godou mee ne kabe i Christ! 21E donu goodou gu longono a mee, gu daudali a mee, gu aago ginai di tonu dela i baahi o Jesus. 22Kilia gi daha godou mouli namua. Di mouli namua la gu hagahuaidu go nia hiihai haga boiboi dangada. d 23Godou manawa, mo godou hagabaubau gi haga hoou ina hagatau. 24Goodou e hai loo gi huli hoou be di ada o God, dela gu haga modongoohia aga bolo di mouli e donu, hai donu ge e dabuaahia. e 25Deelaa laa, hudee helekai kai tilikai. Huogodoo gi helekai donu i godou mehanga, idimaa, gidaadou huogodoo gu dahi i tuaidina o Christ. f 26Maa goodou gu hagawelewele, hudee heia di hagawelewele gi dagi ina goodou gi lodo di huaidu, ge hudee noho hagawelewele i di laangi dogomaalia. g 27Hudee dugu anga gi Satan dono madagoaa humalia e hai ana hai adu gi goodou. 28Maa goodou nogo gaiaa, gi lawa gi daha, daamada ngalua e hagahumalia goodou, gi mee goodou di hagamaamaa digau hagaloale. 29Hudee helehelekai i nia helekai haga huaidu daangada, gei helehelekai hua nia helekai hagamaamaa humalia, nia helekai haga tomo aga, ge haga haingoohia nadau mee ala e hiihai bolo gi i-golo. Gei godou helekai ga hagahumalia digau ala e longono godou helekai. 30Goodou hudee heia di Hagataalunga Dabu a God gi manawa gee, idimaa, di Hagataalunga la di maaga ni God i godou nua, dono hadinga bolo goodou ni aana, gei e haga modongoohia bolo di laangi ga dae mai, geia ga haga maahede goodou. 31Kilia gi daha nia hagadugina(,) hiihai huaidu ge hagawelewele. Gi lawa gi daha mo nia haga hooho, mo di helekai hai baahi i godou mehanga, nia hagadugina lodo huaidu hagadilinga e logo. 32Gei gi dumaalia, manawa balabala, ge hagadau wwede i godou mehanga, gadoo be God dela ne dumaalia adu gi goodou mai i Christ. h
Copyright information for
KPG