Galatians 5
Daahia godou maahede
1Christ dela ne haga maahede gidaadou, malaa, goodou gi tuu gi mau i lodo godou dagaloaha, hudee dugu anga gi hai nia hege. 2Ko au go Paul, au e hagi adu bolo maa goodou ga sirkumsais, dono hadinga bolo Christ le( e)-balumee hua adu gi goodou ai. 3Au e haga iloo labelaa ang gi tangada nei mo tangada nei, dela ga sirkumsais, bolo eia e hai loo gi haga gila aga nia haganoho huogodoo. 4Digau ala e hagamada bolo ginaadou e hai gi donu i baahi o God mai i nadau haga gila aga Nnaganoho, digaula ne daa ginaadou gi daha mo Christ, gu noho i daha mo tumaalia o God. 5Gei gidaadou e hagadagadagagee gi God dela ga hai gidaadou gi donu i dono baahi. Deenei tadau mee dela e talitali, mai i di mogobuna o di Hagataalunga dela e hai hegau i tadau hagadonu. 6Gei gidaadou ala gu buni ang gi Jesus Christ, tadau sirkumsais gu dono hadinga ai. Gei di mee dela dono hadinga, la go tadau hagadonu dela e hai hegau i di aloho. 7Gei godou mouli i mua la gu kila humalia! Ma koai dela ne dugu di godou daudali di tonu? Dehee dana hai dela ne huli goodou? 8Hagalee ne hai mai baahi o God, dela ne gahigahi goodou. 9Nia ‘yeast’ hua dulii loo e mee di hai di palaawaa hagatau gi tanga. a 10Au e hagadagadagagee adu gi goodou mai i tadau hagadaubuni ang gi Tagi, bolo godou hagamamaanadu hagalee hai gee mo agu maanadu. Gei tangada, de hilihili be koai, dela e haga hinihini godou mehanga, geia e kae dono hagaduadua mai i baahi o God. 11Gei mai gi di au, ogu duaahina nei, maa nei bolo au ga agoago huaigolo bolo sirkumsais le( e)-hagalabagau, malaa, nia daangada le e hagahuaidu au eiaha? Maa di mee deenei le e donu, malaa, dagu agoago di loobuu o Christ la hagalee di mee e hagawelewele ginai. 12Au bolo digau ala e haga hinihini goodou gi hula gi tugi, gi bida tele ina ginaadou!13Gei goodou, go ogu duaahina nei, goodou ne gahigahi bolo gi maahede. Malaa, goodou ala gu dagaloaha, hudee haga haingoohia ina goodou gi nia hiihai o tuaidina gi dagi ina goodou. Gei goodou gi hagadau maamaa i godou mehanga i di aloho. 14Idimaa, nia haganoho huogodoo le e daabui mai go taganoho hua e-dahi boloo: “Aloho i tangada dela i doo baahi, gi hai be doo aloho i di goe.” b 15Maa goodou ga hai be nia manu lodo geinga, ga haga huahuaidu, ga haga mmaemmae goodou, malaa, goodou gi pula i goodou, gi dee hagadau dadaaligi hua goodou.
Di Hagataalunga mo di hiihai o tangada
16Deenei dagu mee ga helekai iei au: dugu ang gi di Hagataalunga gi dagia goodou, hudee haga kila aga ina nia hiihai o tuaidina. 17Idimaa, di hiihai o tuaidina le e hai baahi gi di hiihai o di Hagataalunga, ge di hiihai o di Hagataalunga le e hai baahi gi di hiihai o tuaidina. Nia hiihai e lua aanei le e hagadaumee i nau mehanga. Gei di mee deenei e hai dono hadinga, bolo goodou e deemee di hai godou hiihai. c 18Maa di Hagataalunga e dagi goodou, goodou la hagalee noho i lala Nnaganoho. 19Nia hangaahaihai o tuaidina la aanei: di hai be di manu, mo di manawa manu i mehanga taane mo di ahina, nnangaahai milimilia, 20daumaha ang gi nia balu god, hai buubuu, hagadugina, dee donu, dubua, hagawelewele, lagamaaloo, tee buni, 21hagagailaa, libaliba, mono mee ala i golo beenei. Au e helekai adu gi goodou be agu helekai i mua: Digau ala e hai nia mee aanei, la hagalee e ulu i Tenua o God.22Aanei laa go nia hua o di Hagataalunga: aloho, tentene, noho i di aumaalia, hagakono di manawa, dumaalia, humalia, manawa dahi, 23hila gi lala mo di haga ligaliga i daha mo di huaidu. Taganoho e hai baahi gi nia mee aanei ai. 24Nia dama a Jesus Christ gu daaligi gi daha nnagadilinga hiihai huaidu huogodoo o nadau huaidina. 25Di Hagataalunga gu dugu mai gi gidaadou di mouli, malaa, e hai gi dagi tadau mouli labelaa. 26Gidaadou hudee hagamuamua, hagawelewele, be hagadau dubua i tadau mehanga.
Copyright information for
KPG