‏

JUDE Di lede a Jude

Tangada ne hihi di lede deenei:Jude ^{▼▼Jude: Mt 13:55; Mrk 6:3}, tuaahina daane o James

Di haga modongoohia

Di lede a Jude ne hihi belee haga modongoohia ang gi nia dama a Christ di hai o digau agoago tilikai ala bolo ginaadou e hagadonu a Christ. I lodo di lede bodobodo deenei, e helekai beDi lua lede a Peter. Tangada ne hihi di lede deenei e hagamahi ang gi digau ala ma ga dau di maa bolo gi maaloo i lodo di mouli hagadonu dela gu wanga go God hagadahi gi ana dama(1:3).

Di hagahonu di beebaa deenei:Di haga modongoohia (1-2)Nnangaahai, nia agoago mo di hagalawa o nia gau agoago tilikai (3-16)Agoago hagamahi i di hai o di daudali di hagadonu (17-23)Talodalo hagalawa (24-25)

‏ Jude

1 Mai baahi o Jude, tangada hai hegau a Jesus Christ, tuaahina daane James, ang gi digau ala gu gahigahi go God, ala e mouli i lala di aloho o God Tamana, mo di madamada humalia o Jesus Christ: ^b

2 Tumaalia, noho i di aumaalia, mo di aloho gi haga honu ina goodou.

Digau agoago tilikai

3 Ogu ihoo hagaaloho nei, au nogo hagamahi huoloo e hihi adu gi goodou di hai o di haga mouli dela e hai mee ginai gidaadou ngaadahi, dolomeenei au gu hagabaubau huoloo bolo au e hihi di lede deenei e hagamaaloo aga goodou i lodo di mouli hagadonu dela ne wanga go God haga dahi gi ana daangada. 4 Idimaa, digau huaidu i golo i tadau baahi e haga hai gee nia helekai di Longo Humalia o tumaalia o God bolo gi daudali nadau haihai huaidu, gi hudua gi daha a Jesus Christ, go tadau Dangada Aamua go tadau Dagi. I mua loo di Beebaa Dabu e haga modongoohia di huaidu dela gu hai mee ginai digaula. 5 Maeaha maa goodou gu iloo humalia nia mee huogodoo aanei, gei au e hiihai e haga langahia adu gi goodou i di hai o Dimaadua dela ne haga dagaloaha digau Israel gi daha mo Egypt, nomuli, gei mee ga hagahuaidu digau ala e de hagadonu. ^c 6 Goodou gi langahia digau di langi ala hagalee noho i nadau lohongo donu. Digaula gu kili gi daha nadau lohongo. God gu lawalawa digaula gi nia daula baalanga i lodo di gowaa bouli i lala, e dugu e tali di nadau hagi aga i di laangi damana, e hagahuaidu. 7 Goodou gi langahia labelaa Sodom mo Gomorrah, mo nia waahale ala e hoohoo mai gi golo. Digau o nia waahale aanei gu hai labelaa nia huaidu digau di langi ala ne hai, nia hiihai hai be di manu mo nia hiihai taane ang gi taane. Digaula gu hai di haga modongoohia gi digau huogodoo, i di nadau hagaduadua i di ahi dee odi. ^d 8 E hai labelaa beenei, digau agoago tilikai aanei e haihai nadau moe ala e hai digaula gi bida hai di huaidu ang gi nadau huaidina. Digaula e haga balumee nia mogobuna o God. Digaula e leelee huaidu i nia madamada o digau di langi. 9 Tangada di langi aamua go Michael digi hai di mee deenei. Dono madagoaa nogo lagalagamaaloo ginaua mo Satan be di maa koai i ginaua ga kae tuaidina o Moses, Michael digi haga huaidu ina a Satan gi ana helekai haganneennee, ge ne helekai hua boloo, “Dimaadua ga haga huaidu laa goe!” ^e 10 Gei digau aanei, le e leelee huaidu i nia hagadilinga mee ala e de iloo ginaadou, e daudali hua nadau hiihai, digaula e hai be nia manu lodo geinga, aanei nia mee e hagahuaidu digaula. 11 E huaidu huoloo ang gi digaula! Digaula e hula i di ala nogo hana Cain. Digaula gu ihala be di hala o Balaam i di gili nia bahihadu. Digaula e de hagalongo gadoo be Korah, gei digaula ga hagahuaidu gadoo be mee. ^f 12 Digaula e hai gadoo be nia dogolia ala e hagahuaidu godou hagamiami daumaha ang gi godou ihoo hagaaloho, i nadau madagoaa ga libaliba ga hagalongoaa. Digaula e madamada humalia hua i ginaadou. Digaula e hai be nia gololangi ala e angiangina i di madangi, ge hagalee doo di ua. Digaula e hai gadoo be nia laagau ala hagalee hua, hagalee hua labelaa i di madagoaa taugai. E hai be nia laagau ala gu daagi gi daha mo nia gelegele, gu deai nadau aga ai, gei gu mmade. 13 Digaula e hai gadoo be nia beau maaloo o di moana, mo nadau hai haga langaadia dangada ala e kila aga be nia abiabi. Digaula e hai be nia heduu ala e menegenege, ala gu hagatogomaalia di nadau lohongo go God i di gowaa llala bouli dongoeho ga hana hua beelaa. 14 Enoch, dela go di hidu hagadili mai Adam, dela ne agoago i mua loo i di hai o digaula,

“Tagi ga hanimoi mo ana gau di langi dabuaahia dogologowaahee, ^g
15 belee hagi aga, e hagaduadua digaula huogodoo i nadau haihai huaidu ala ne hai, mo nadau helekai huaidu huogodoo ala nogo leelee huaidu i God!” 16 Digaula e lagalagamaaloo ge hagahuaidu digau ala i golo i nia madagoaa huogodoo. Digaula e daudali hua nadau hiihai huaidu. Digaula e bida hagaamu hua ginaadou. Digaula e hagaamu digau ala i golo bolo gi gila nadau mee e hiihai ginai.

Nnelekai hagalliga mono agoago

17 Ogu ihoo hagaaloho nei, goodou gi langahia nia mee ala ne hagi adu go digau agoago hagau i di hai o tadau Dagi go Jesus Christ. 18 Digaula ne helekai adu gi goodou boloo, “Di madagoaa nia laangi hagaodi ga dae mai, gei nia daangada ga kila aga, ga leelee huaidu i goodou. Digau aanei e daudali nadau haihai huaidu.” ^h 19 Aanei digau ala e hai nia daangada gi dee buni, e dagi go nadau hiihai huaidu, di Hagataalunga Dabu la hagalee i nadau baahi. 20 Gei goodou, go ogu ihoo hagaaloho, hagamahi, heia goodou gi maaloo i lodo godou hagadonu dabuaahia. Hai dalodalo i nia mogobuna o di Hagataalunga Dabu, 21 gei gi hagamau ina goodou i lodo di aloho o God, i di godou madagoaa dela e talitali tumaalia o tadau Dagi go Jesus Christ dela e gowadu gi goodou di mouli dee odi.

22 Goodou gi dumaalia ang gi digau ala e manawa logo. 23 Haga dagaloaha ina digau ala i golo gi daha mo di ahi. Haga modongoohia ina tumaalia mo di hagalaamua gi digau ala i golo, gei dee hiihai hogi gi nadau goloo ala gu gulugulua i nia hiihai hui adu o nadau huaidina.

Talodalo hagaamu

24 Ang gi mee dela e mee di benebene goodou gi dee too, ge gowadu gi goodou di tene mo di madammaa i mua ono hadumada madamada, 25 ang gi mee go di God e dahi, go tadau Dangada Hagamouli, mai Jesus Christ, go tadau Dagi, gi madamada, hagalaamua, nia mahi mo nia mogobuna, mai loo i taamada, ga dae mai gi dolomeenei, ga hana hua beelaa! Amen.

‏