‏ Luke 1

Lukau au haoka Teovilasiho hisaliale

1Teovilasi, di haoka, ata moagaeau hovedevei Iesu no vigomo vaveve dua vale ke hisalialu. 2Subuta Iesu esemuiau ata degomolehi Iesu vaveve elehai ata kebia namigevege abu ke hisalialu. 3Ige data isiviale deiada ko hisaliai aho hanavoi. Au ivi balugate. Katealemo di Iesu deiadae umuka ke bahata neniai kaovai hisaliai aho hanavoma. 4Iale au ko dodavei bae ihuve bahata ata degomoleau a haivuale ke bahata hilokanela.

Ata babatisogevemale Dioni keu uveve deiada

5Vani mole subuta Elodi keu Diudia vata kemo kosive baluga holisege Diue dubu nalimale ata mole Sekalaia keu ua. Abaisa keu subuta Diue dubu nalimale ata baluga. Ige Sekalaia keu lovive ivi vanu. Mahinave ivilike Elisabeti. Keate ke valadae ivilike Eloni. 6Malaha keu abu mahinati Dilava nimo inutolotoloai uime Kosive menaka ke bahata evisi valu. 7Isito keateve keu esesia. Ilage abu abu ebia holilu.

8Vani mole Sekalaiau dubue loviveve vaniu lohoge au tiale dubue Dilava hoesehavoma. 9Diue dubu nalimale atae vaveve keu koseanu. Vani igaegae abuna ata igae ebagevage kena deholo hagote mai tiniege dubue uvue batabata golomo ehosivai mahogei. Abu vani kela Sekalaia ebagevage au Kosive dubue uvue tinu. 10Tialeu dubue uvue deholo hagote mahosege ata moagaeau heie guligulilahama. 11Guligulilahasege anelu moleu Sekalaiae lohoale deholo mahomale batabatae ada inuteveatae laminu. 12Ige Sekalaiau ke elehai vabuage uvuveu kibikibiai ua. 13Ige anelu keu namihai loui avoe, “Sekalaia, vabu halenela. Dilavau a imiliale ke eviale a mahinana bae ese mai. Ese keu uge ivihai loui kosea, ‘Dioni.’ 14Vani kela lana bae vahaehoave. Ese keu uge ata moagaeabuna bae vahaeholahai. 15Kosealemo kena bae Dilava nimo kosive baluga holisi. Au bae e toela bahata ke ilivebene. Au uale vani kela Munana Tumutena bae uvuvemo holomage auna negoai. 16Kena bae Iselala ata moaga malevege abuna tota abu Kosive Dilava ehovai tai. 17Kena beloveta Ilaidia vaveve ke nahate vai negoai vuvuneai. Ige hotove kemo eseabuna abu mamuvuhi tota bevuai igaetoai. Kena bae hoto eviholimale ata kebia haivege abuna bae lulele ata holisi vaveve inutolotolote vai. Auna vasohuta tai ata haivege abuna abu vaveve hoesegevege Kosivena lohoi.”

18Ige Sekalaiau anelu ke namihai loui avoe, “Kateige dana oleve kateai. Dau koli holige di mahinata mabata holinu.” 19Ige anelu keu loui avoe, “Dau di ivilike Geibiliolo. Dau Dilava vudimo umale Dilavau di namihaike vage di hotoe dua ko loui a namihama. 20Vani mole di hoto louale kena bae velemai. Isito a di hoto eviholinu. Katealemo a bae hotoalivebene. Ana bae uvute nahate valive di louale vani keu lohoge bae hotoanela.”

21Sekalaiau dubue uvue usege ataeau heie hemei uma. Isi loui avoe, “E, Sekalaia keu tiale dubue uvue osioime solekai lohoholinu.” 22Kateai lousege Sekalaiau heie lohoniale abuhi hotoholige abu huhuige keu dubue uvue tiale vaveve nimolete elehanu. Katealemoike au uvute holisime ada unahata deiada loui haivema.

23Iniale Sekalaia dubue loviu uoholige au halei oe tinu. 24Vani degomoleau uoholisege mahinaveu tobuaime oai tiholisito bata ada mole ke uvumo o unahamo ua. 25Isi loui avoe, “Vagana moaga di eseholiale kemo Dilavau di tedahonu. Iale ataeau di elehage di eseholiale mati kena uoholisi.”

Iesu uveve deiada

26Ke iae bata igae uoholisege Dilavau anelu nehe Geibiliolo hanavoge keu Galili vatae tialeu o mole Nasaletae velemanu. 27O keve velemage ma mole Meli keu ua. Ma ke abu Diosebaho kokovalu. Dioseba keu Deividi valadamo lohonu. 28Ige anelu keu lohoale avuho loui avoe, “Ana duave. Kosiveu aiti ui a hoesehavoge au nivemo duave.” 29Kateige Meliu hoto ke evisi vikobaluganu. Isi huhuai avoe, “Hoto oleteike ko.” 30Ige anelu keu avuho loui avoe, “Vabu hale. Dilavau a eahalenu. 31Ialemo ana bae eseane. Ese keu uge ivihai loui kosea, ‘Iesu.’ 32Kena uniege kosi baluga holige Dilava ehue umale kena bae loui kosea, ‘Keu di moike.’ Dilavana ebagemage auna vatae kosive holisi au haoka Deividiu ugulamomale telonamo ugulamoi. 33Iale auna bae vani baita Diekobo valada kebia nalievegei. Isi kateige vuvuneveu bae ata kebiamo uoholilivebene.”

34Aneluu hoto kateale louge Meliu namihai loui avoe, “Dau koliaholinu. Iale dana oleve kateai eseai.” 35Ige aneluu avuho loui avoe, “Munana Tumutena aemo dobai lohoge Dilava vuvune kena a bamuge ana ese ke manela. Katealemo Dilavana au mo ke ivihai kosea, ‘Di mo tumuteike.’ 36Ana a neina mole Elisabeti ke hilokanu. Ataeau loui avoe, ‘Keu eseholisito mabata holisi ua.’ Hoto kateale louito keu tobuta uale aike bata ada mole isi igae uoholinu. 37Dolodolo halenela. Dilava kemo onobeu bae anekialivebene.”

38Kateige Meliu loui avoe, “Dau Kosive esemu daliko. A hoto bahata louale kena daemo lohoge keu duave.” Kateai louge aneluu halei tinu.

Meliu Elisabetie deiai tinu.

39Vani kemo Meliu solekai au kunai bevuai malei tanae o moleve Diudia vatae tinu. 40Isime Sekalaia oe tiale mahinave Elisabeti namihai loui avoe, “Ana duave.” 41Ige Elisabetiu hoto ke evige unive uvue eseveu kibianu. Ige Dilava Munanae Tumuu avuemo lohoaleu mai vuvunetinu. 42Ige Elisabetiu tovuai avuho loui avoe, “Dilavau a ebagemage a keate bahatae vigomo keate baluga. Iale ese kena uge Dilavana ebagemai hoesehavoi. 43A keu di Kosive neina. Iale a dae deiai lohoale kou duave baua. 44Di a hoto louale ke evisege di ese unita uale keu kibiai vahaehoanu. 45Iale vahaeho baluga. A hilokage Dilavau aho hoto louale kena seleve holisi.”

Meliu vahaehoale deiada

46Kateige Meliu avoe,
“Di di uvumo vahaehoai di Kosive hoesehavoma.
47Dilavau di tedahomale kemo di vahaeho baluganu.
48Dau Dilava nimo iviholinu.
Isito keu di huhuanu.
Nova komo ata bahataeabuna loui kosea,
‘Dilavau keate ke hoesehavonu.’
49Kosealemo Kosive ivi balugate keu dahoe vaveve baluga vanu.
Ivive keu tumute.
50Katealemo oleuoleu Dilava vabuhavoge uvuvena abuemo ui.
Ige auna vani bahata kebiata eseabeta tedaevegei.
51Ige adave keu vaveve negote vanu.
Isime auna oleuoleu abu ebika tabagevaho huhuimale kebia huhuihuhui bahata malei evihai.
52Keu vatae kosive baluga kebia tatolemagevenu.
Isito au ata uvevete kebia tabagevenu.
53Keu lovie dua ata vaete kebia ovege uniabeu hanilahalu.
Isito ata kunaite kebia iovege abu ada unahala tilu.
54Dilavau au ata Iselala tedaevenu.
Au kebia haleveholisito kebiaho uvuale kemo au tedaevenu.
55Kosealemo Dilavau subuta nahie buluveho lounu.
Isi Ebalahamuho loui avoe,
‘A valada isi a ese kebia dana vani bahata huhuevei hoesegevegei.’”
56Meliu hoto kateale louime Elisabeti oe uale bata abuita igaetaeau uoholisege au halei au oe tinu.

Dioni uale deiada

57Vani mole Elisabeti eseu uveve vaniu lohoge moveu ua. 58Moveu uge valadaeabeau isi haokuvuiabeau ke evisi vahaeho balugalu. Abu hilokage Dilavaike keate ke huhuaime ese ke mai ominu.

59Bula igaeu uoholige haokuvuiabeau lohoale mo ke hoesehavoi vudive vate etulei isiviale ataeau kemo hilokage keu Ebalahamu valadae ese. Kebia vaveveu kateanu. Vateve etulege uoholige abu isiviai mamave Sekalaia ivita ivihai. 60Isito neinaveu loui avoe, “Kate halevave. Iviveike Dioni.” 61Kateai louge abu keate keho loui avoe, “Au a valada kemo ivi katealebeu uoholinu.” 62Isi kateaime abu ada unahata deiada mamave haivuma. Isiviale mamaveu ivi oleteale mo ke ivihai. 63Kateige au adamo beba mai omiveve tovetove vanu. Ige abu beba mai omige au hisaliai avoe, “Iviveike Dioni.” Kateige abu ke elehai viko balugalu. 64Kateisege solekavesite Dilavau Sekalaia ai alavoge au hotoai Dilava hoesehavonu. 65Ige haokuvuiabeau ke elehai vabu balugalu. Ige ataeau Diudia tanae uale keau bahata hoto ke evilu. 66Ige ata bahataeau ke evisi huhulahai avoe, “Ese kena bae vadeai.” Isime abu hilokage Kosive adae vuvuneu ese kemo ua.

Sekalaiau au mo Dioni vaveve lounu.

67Dioni mama Sekalaia keu Dilava hoesehavosege Munana Tumuteu uvuvemo holomage au gabie velemaveve hoto lounu. 68Isi loui avoe,

“Nahi nahie Kosive hoesehavoi.
Keu Iselala ata nahie lohoale isiviai nahie vatetumumo nahie tedaevei malevei.
69Kosealemo keu nova au esemu Deividi valadamo nahie toelamo nahie maleveveve ata negote ebagemanu.
70Subuta mole Dilavau hoto kateale loui au beloveta tumute kebia namigevenu.
71Au louale auna nahie aiogevemale ata kebia isi nahiho itumulahamale ata kebia adamo nahie tedaevei.
72Au subuta nahie buluveho loui mamoale ke auna huhuai nahiho uvuai nahie tedaevei.
73Ke nahate au subuta nahie buluve Ebalahamu keho hoto tumute lounu.
74Au hoto tumute louale kemo auna nahie aiogevemale kebia adamo nahie tedaevei.
Auna nahie tedaevege nahiabuna vabuholisito lovive vai.
75Isime ata tumute holisi vani bahata Kosive nimo vaveve inutolotolote vagei.
Dilavau hoto loualeu kemo kateai ua.
76Iale di mo, ataeabuna ahoe loui kosea,
‘Dilavau ehue umale ke beloveta alike.’
Iale ana vasohuta tai Kosive humaha elulumasege auna bae lohoi.
77Ana bae Kosiveu toelamo au ata maleveve hoto louge abuna bae abu vaveve toela halevege Dilavana kebia toela ulihai.
78Kosealemo nahie Dilava keu uvue Dilava.
Keu nahiho uvuai nahie tedaevema.
Iale vau alamoale ke nahate Kosive atagana nahiemo halui.
79Nahiemo haluge oleuoleu vavie vaveve vamale kemo haluviho vasege Kosivena kebia holoevege abuna uveve duae humahala tai.”
Sekalaia hotou kemo kateai ua. 80Igeto moveu balugai kosi holisege uvuveu negoige au o halei botoe tialeu ataeau uvesite keve ua. Keve uniale vani moleu lohoge au lohoaleu Iselala ata haivenu.