Luk 1 | KQC | STEP | Theophilus amiye tora, amiye tau tora ya beika vegu una rofu Sei yaku moi ogau reyo bi sena bura riyadi. Mina vegu vata ni baiyo rofu, mina ni feidena vene ini ouresi ini ne yaku mina vegu veyadi ma ina ka mina ago di ini moimai rededi vene. Kamini ini sina ni odoro reyadi, resi nidedi mini, una rofu. Mina dada, Theophilus e, nai mokena bi mina sina dubusa, bura rei mona regida, resi moi feidegida ya rofu, adina mina vata niyo vegu bi, sena baku rei mona reyaka, ini vata ni baiyo gutu.

b 1.5:1 Chr 24.10

c 1.15:Num 6.3

d 1.17:Mal 4.5–6

e 1.19:Dan 8.16, 9.21

f 1.27:Mt 1.18

g 1.31:Mt 1.21

h 1.32–33:2 Sam 7.12, 13, 16; Is 9.7

i 1.37:Gen 18.14

j 1.46–55:1 Sam 2.1–10

k 1.48:1 Sam 1.11

l 1.52:Job 5.11, 12.19

m 1.55:Gen 17.7

n 1.59:Lev 12.3

o 1.76:Mal 3.1

p 1.79:Is 9.2

‏ Luke 1

1 Theophilus amiye tora, amiye tau tora ya beika vegu una rofu Sei yaku moi ogau reyo bi sena bura riyadi. Mina vegu vata ni baiyo rofu, mina ni feidena vene ini ouresi ini ne yaku mina vegu veyadi ma ina ka mina ago di ini moimai rededi vene. Kamini ini sina ni odoro reyadi, resi nidedi mini, una rofu. Mina dada, Theophilus e, nai mokena bi mina sina dubusa, bura rei mona regida, resi moi feidegida ya rofu, adina mina vata niyo vegu bi, sena baku rei mona reyaka, ini vata ni baiyo gutu. 4 Makai reyaka dada, yi adari ae mona regiya, ya rofu beika vegu ya oteimaradi bi, rama vata niyadi.

John Baptist ini vata niyo di ago ogau niyadi

5 Herod yaku Judea gaganiri ^{▼▼1.5 Judea gagani:Mina bi Palestine gagani noibanu.} kini niyo ri, Sei ma amiye utari naivo amiye yokoi roka Zechariah amegamo; ina bi Abijah di vene amiye yokoi. Ini rema di roka bi Elizabeth. Iniye ka, Sei ma amiye utari naivo amiye roka Aaron di ini tutubena rema. ^b 6 Ina remanu vegu no yokoi rena de Sei di nemokori, Sei di ini ago vava tauvakoi ma Warika Amiye di mokena sina gira tauvakoi ka moi gira regamadi. 7 Ina remanu bi mida de, adina Elizabeth bi natu, ma ina ini maruka sa ka ugava iniye niyadi.

8 Yokaru Zechariah Sei ni vakena yavari Sei di ini nemokori Sei ma amiye di utari naivo amiye di ini moimai rega amedo, adina mina meda bi ini vene omaro di moimai ari. 9 Kamini Sei ma amiye utari naivo vene di rededi kana, ina vene ya laki isirari gutu Zechariah moiyadi ma bi Warika Amiye ni vakena yava ideri orina vata fafau sisika buni muramura origi. 10 Ma amiye tau tora iniye bi etofaro are regamadi, usausa nigamadi ri, bi sisika buni muramura oriyo.

11 Mina medari Zechariah yaku Warika Amiye di ini naivonaivo vima yokoi veyo, sisika buni muramura orina vata vana rama rofu are reyo. 12 Zechariah ya veyo ri, bi tururu resi ini uka ideri gutu ori ya no iniye niyo. 13 Idu naivonaivo vima yaku niyo, “Zechariah ori ga re, Sei yaku yi usa neideyo. Yi rema Elizabeth yaku yi mida yokoi evata rego, ini roka nigiya bi John. 14 Ada yaku no iniye nigedi, ma amiye taugade ka ada regedi John vata nigo dada! 15 Adina bi Warika Amiye di nemokori bi amiye tora yokoi. Ina bi koru gira o waini de irigo; ina bi ini nono di ukari Vima Kikifa ya sena vata baiyo. ^c 16 Ina yaku Israel vene taugade ini Warika Amiye Sei rofu moi dairigo. 17 Ina bi Warika Amiye di ini naivonaivo amiye, kaere ourei bi bobigo, Sei di ago nido amiye Elijah di vima ma vava nufa. Ina yaku baba vene di uka moi kero rego ri, bi ini mida sa uka yokoimaka dudu ameibigedi. Ina yaku vegu no vene moi kero rego ri, bi mokena rorobo vene di mokena ameibigedi. Adina Warika Amiye di ini vene moi egogo resi Warika Amiye di ini dego meda nari rebigedi.” ^d

18 Zechariah yaku mina naivonaivo vima rofu ni kabai resi niyo, “Sina nisa bi gokai moi rama rego diba nigida? Na bi amiye ugava, ma nai rema ka rema ugava.”

19 Naivonaivo vima yaku ni kabai resi niyo, “Na bi Gabriel, na bi Sei di ini nemokori are reida. Sei yaku ya rofu na ni feideyo mina sina buni ya nigida. ^e 20 Idu ya bi nai sina buni rofu uka vari gira de maro. Mina dada ya bi babo nisi ago de nigiya; nai niyaka kana ogau nigo mamo ago nigiya. Nai sina tau niyaka bi ini meda iniyeri vata nigo.”

21 Zechariah bi Sei ni vakena yava ideri amei doba regamo dada, amiye tau bi mokena tau moigamadi ina nari regamadi ri. 22 Etofaro yakuyo ri, bi amiye ni kabai de reyo, dada mokeyadi ina bi Sei ni vakena yava ideri rebe yokoi veyo. Ini vena babo niyo dudu maka amiye oteimaro ina bi rama iniye rebe yokoi veyo. Ina babo nisi bi togatoga ina vene rofu rebe reyo.

23 Zechariah ini moimai ari koina niyo ri, bi ini rautu rofu dairiyo. 24 Mina ari koina niyo ri, bi ini rema Elizabeth rivo niyo. Mina rivo niyo ri, bi eyo vana berou autu ini yavari maka amegamo. Elizabeth yaku makai niyo, 25 “Gua Warika Amiye yaku na rofu ada reyo. Ina yaku nai maena amiye nemokori erufuyo!”

Iesu di vata nina ni ogau reyo

26 Elizabeth ini rivo niyo eyo koru idari bi, Sei yaku naivonaivo vima roka Gabriel Galilee di ini taoni yokoi roka Nazareth rofu ni feideyo. 27 Rema ofi yokoi bi amiye yokoi sa varena kode mironari amegamo, iniye bi amiye roka Joseph ni kake reyadi, megedi vo nisi. Joseph bi kini David di ini tutubena amiye yokoi. Mina rema di roka bi Mary. ^f 28 Mina naivonaivo vima bi Mary rofu bosi niyo, “Rema mida e, Sei ya rofu sena ada reyo, ma Warika Amiye bi ya sa amedo.”

29 Mary yaku mina sina neideyo ri, bi ori toragade resi mokegamo mina ago di ini rama adina iniye bi beika. 30 Naivonaivo vima yaku niyo, “Mary, ori ga re, adina Sei ya rofu sena ada reyo. 31 Ya bi rivo nisi rumana mida yokoi moi vata resi ini roka bi Iesu vo nigiya. ^g 32 Ina bi amiye toragade iniye nigo, ma ini roka Sei Odoro Iniye di ini Mida nigedi. Warika Amiye Sei yaku ini tutubena David di ini vava moi mago. ^h 33 Ma ina bi Jacob ini tutubena fafau togatoga ourefeidebobigo. Ini ourefeidena amena sana bi koina de nigo!”

34 Mary yaku naivonaivo vima ni kaitesi niyo, “Na bi amiye yokoi sa varena kode. Mina nisa bi gokai vata nigo?”

35 Naivonaivo vima ya ni kabai resi niyo, “Vima Kikifa bi yaku rofu dego, ma Sei Odoro Iniye di vava ya fafau ameinu rego, mina dada mina mida kikifa bi Sei di ini Mida vo nigedi. 36 Ma va moke, yi rasini Elizabeth, ina bi ugava nufari sena rivo niyo; amiye ya nigamadi bi mida de moigo vo niyadi, idu ini eyo koru ida bi mini, 37 adina bi vegu yokoi de Sei yaku moi rama de rigo.” ⁱ

38 Mary yaku niyo, “Na bi Warika Amiye di ini naivo rema amiye. Yi sina niyo kana na rofu vata nigo bi buni.” Kamini mina naivonaivo vima ina feresi diyo.

Mary yaku Elizabeth rofu oto reyo

39 Mina medari, Mary dadisi evade omuna ikari taoni yokoi Judea gaganiri boi neyo. 40 Zechariah di yava ideri dui resi Elizabeth rofu ini buni ago niyo. 41 Elizabeth yaku Mary di ini buni ago neideyo ri, bi ini mida ini rivo ideri kita reyo, ma Vima Kikifa yaku Elizabeth ini rovaitari vata baiyo. 42 Kamini dadisi ni goroka tora resi niyo, “Rema tau di ini fogori bi ya maka bi buni toragade! Ya yaku evata regiya mida ka buni tora iniye nigo! 43 Nai buni bi beika, dada ma nai Warika Amiye di nono bi na rofu oto reyo mini? 44 Adina bi yi ago buni neideyaka ri, bi nai mida bi nai rivo ideri ada resi kita reyo. 45 Warika Amiye di ini ago ya rofu niyo ma ya bi mina rofu mokena vari gira aiyo. Ina bi buni toragade ya mago dada!”

Mary Sei di roka moi odoro resi nina di yauta

46 Kamini, Mary yaku niyo, ^j

“Nai vima yaku Warika Amiye di roka moi odoro resi nido;
47 Nai vima yaku ka Sei na moi vegu rido amiye rofu ada tora redo,
48 Adina bi na, ini naivo rema, na mokeyo mini! ^k
Ma mina dada gua ameibonari, amiye tau yaku nigedi Sei yaku buni toragade na rofu maro.
49 Adina bi Vava Iniye Amiye yokoimaka yaku vegu tora iniye na fafau moi vata riyo,
ini roka bi kikifa.
50 Ini iriyeduka bi kaere ina rofu kikifa iniye rededi vene fafau ameibigo.
Mina vene kaere bi ini tutubena vene fafau ka ameibigo.
51 Ini vana yaku ini yeiva bi sena moi ogau riyo,
ma matuka vene ini mokena sa ina yaku meki reyo.
52 Ina yaku ourefeidena vene di amena vava sanari eyarei vau reyo, ^l
resi matuka de vene bi ina yaku moi odorori vau reyo.
53 Rauna amededi vene bi ina yaku buni ini ukari moi vata baiyo.
Resi gugura tau amiye bi ina yaku vana koina moi feidei diyo.
54 Ini naivo vene Israel aedeyo,
ini iriyeduka mokeyo dada.
55 Ma uni tutubena vene togatoga ago niyo, ^m
Abraham ma ini tutubena rofu!”
56 Kamini Mary bi Elizabeth sa eyo regode amesi ini rautu rofu dairiyo.

Elizabeth yaku John moi vata reyo

57 Elizabeth di mida moina aru okiyo ri, rumana mida moiyo. 58 Kamini ina atafu amededi vene ma ini usika ourena yaku Warika Amiye di ini iriyeduka tora ina rofu vata niyo sina neideyadi ri, bi ina sa ada no iniye niyadi.

59 Meda vana berou autu regoderi, bi rumana mida di rovaita nugagedi vo nisi, egogo resi ini roka bi Zechariah vo nigedi, ini baba di roka. ⁿ 60 Idu ini nono niyo, “Ide, ini roka bi John.”

61 Ina vene ya niyadi, “Idu ya yi usika ourenari bi mina roka bi koina!” 62 Kamini ina vene yaku vana dudu rumana mida di baba rofu ni kaiteyadi rumana mida di roka bi beika nisi mago.

63 Zechariah yaku bura rina buka yokoi ni kaitesi yomakai bura reyo, “Ini roka bi John.” Ina tau noibanu vakoi tururu reyadi! 64 Mina medari, Zechariah dubusa ago nigamo. Resi Sei rofu moi odoro rena ago buni niyo. 65 Mina dada, ina adina vene tau ori yaku ini uka vata baiyo, ma mina vegu di sina bi Judea omuna gagani tau rofu ni nega boga reyadi. 66 Mina sina neideyadi vene tau yaku mokesi niyadi, “Mina mida yaku beika vegu moi ogau rigo?” Adina Warika Amiye di vava bi mina mida fafau amedo mini.

Zechariah di ada reyo yauta Sei rofu

67 Vima Kikifa yaku John ini baba di uka vata baiyo dada, Sei di ini ago niyo:

68 “Warika Amiye ni moi odoro renadi, kaere bi Israel di ini Sei!
Idu ina bi una oto reyo, adina ina yaku ini vene moi vegu riyo.
69 Moi vegu rina amiye una maro.
Ina bi ini naivo amiye David di ini tutubena gutu deyo.
70 Sei di ini ago nidedi vene kikifa yaku mina amiye sena niyadi,
71 una rofu uni tuma vene iya resi una moi vegu rego,
ma una rofu gubuyo rededi vene ka moi vegu rego.
72 Sei yaku uni tutubena vene rofu ini iriyeduka moi ogau rigo ina rofu niyo,
ma ini uka ago kikifa toto de nigo.
73 Uni tutubena Abraham rofu ni tore reyo,
74 ina yaku uni tuma vene rofu una moi vegu rigo.
Ina rofu naivo renadi ma ori ga rena di ida riyo.
75 Kikifa dudu, mokena rorobo dudu ini nemokori dinadi,
uni vegu ameibobina meda tauri.

76 Ma ya, nai mida, bi Sei Odoro Iniye di ago nido amiye vo nibigedi, ^o
adina ya bi Warika Amiye ouresi dibigiya,
resi ini ida dogo regiya.
77 Ini vene oteimagiya ma Warika Amiye yaku moi vegu rigo bi diba nigedi,
ini vegu no koite makugo di.
78 Adina Sei di iriyeduka una rofu bi ini ukari vata baiyo,
ina yaku uruyaku meda vabara kana omari gutu una rofu ni feidego.
79 Mukuna ideri ma muyena tumu sa vene rofu mina vabara mago, ^p
resi ina yaku uka amuta di ida dudu una ourefeidebogo.”
80 Mina mida kamini tora niyo, ma ini vima ka yeiva niyo. Ina bi gagani autu sanari amegamo, baiyo Israel vene rofu ini ogau niyo medari mamo.