Luk 23 | KQC | STEP | Kamini egogo reyadi vene tau dadisi Pilate rofu Iesu afei bosi

b 23.30:Hos 10.8; Rev 6.16

e 23.34:Ps 22.18

f 23.35:Ps 22.7

g 23.36:Ps 69.21

h 23.45:Ex 26.31–33

i 23.46:Ps 31.5

j 23.49:Lk 8.2–3

k 23.56:Ex 20.10; Deut 5.14

‏ Luke 23

Iesu bi Pilate di nemokori aiyadi

(Mt 27.1–2, 11–14; Mk 15.1–5; Jn 18.28–38)

1 Kamini egogo reyadi vene tau dadisi Pilate rofu Iesu afei bosi 2 ina rofu ni tourage resi kora resi niyadi: “Mina amiye vei tau reyafa bi uni vene di uka moisi Caesar rofu takesi mana ga rena vo nigamo. Resi iniye nigika ina bi Keriso, kini yokoi.”

3 Pilate yaku ni kaitesi niyo, “Ya bi Jew vene di kini ba?”

Ma ni kabai resi niyo, “Bi ya makai niyo kana.”

4 Ma Pilate yaku Sei ma amiye utari naivo vene di warika vene ma amiye tau rofu niyo, “Mina amiye rofu no yokoi baku rena de reida.”

5 Idu ina vene yaku bi ago ni gira resi niyadi, “Ina bi amiye tau Judea gaganiri oteimasi di uka moi odoro rido. Galilee ri siko ago ni oteima disi bi gua minari baiyo.”

Iesu Herod rofu ni feideyadi

6 Pilate yaku mina neideyo ri, bi ni kaitesi niyo, “Mina amiye bi Galilee amiye ba?” 7 Resi bi diba niyo ina bi Herod di ini vava gabireri ri, bi Herod rofu ni feideyo, kaere mina ariri iniye ka bi Jerusalem ri. 8 Herod yaku Iesu veyo ri, bi ada iniye reyo, adina ini sina neidesi meda torari ini ura bi vego vo nisi. Ini mokenari bi rebe be rego ma vego. 9 Herod yaku toga ni kaitesi nigamo, idu Iesu yaku ni kabai de regamo. 10 Ma Sei ma amiye utari naivo vene di warika vene ma ago gira oteimana vene yaku ina rofu gubuyo resi ni kake regamadi. 11 Herod ini iya rededi vene sa ni ninika resi ni kurugamadi. Resi bi kamini ini rovaita fafau varuka burefe bou risi Pilate rofu dairi feideyadi. 12 Mina medari maka Herod ma Pilate dubusa uka yokoimaka niyadi. Sena bi ina remanu bi de auta regamadi.

Iesu di umuyena ago

(Mt 27.15–26; Mk 15.6–15; Jn 18.39—19.16)

13 Kamini Pilate yaku Sei ma amiye utari naivo vene di warika vene ma ourefeidena vene ma amiye tau ni egogo resi 14 ina vene rofu niyo, “Ya vene yaku mina amiye na rofu moi baisi ni tourage reyadi nidedi bi ina bi amiye di uka moigamo. Yi nemokori ni kaitega vaiga reyaka. No yokoi de baku reyaka gua ya vene yaku nidedi kana. 15 Herod yaku ka no yokoi de baku reyo, dada dairi ni feideyo. Mina amiye bi no yokoi reyo dada muyeyaine. 16 Ye na maka buburu resi moi feidego.” ^{▼▼23.16Bura bedakai ka nanaka 17 nufa:Passover irakuna neineiri Pilate di vegu ina rofu bi dibura sanari amedo amiye yokoi moi feidego(Mk 15.6 baku re).}

18 Idu ina tauvakoi raka niga nigamadi, “Mina amiye afei bo, idu Barabbas bi una rofu moi feidegiya!” 19 (Barabbas bi amiye yokoi amiye di fogori kaere bi taoni ruda yokoi moi vata riyo ma amiye be umuyeyo ma dibura yava ideri afei boyadi.)

20 Pilate yaku dubusa ina vene rofu ago niyo. Ini ukari mokena moigamo bi Iesu moi feidego, 21 idu raka nigasa nigamadi, “Satauro ikoko re, Satauro ikoko re!”

22 Pilate yaku uru regode kamini ina vene rofu niyo, “Beika vegu no reyo dada? Vegu no muyeyaine vo nisi di ini adina bi de baku reyaka! Mina dada na maka bururu resi moi feidegida.”

23 Idu ina vene yaku ago gira resi goroka tora dudu ni tonatona niyadi, “Satauro ikoko re!” Ina vene di ini ago yaku vava niyo. 24 Dada Pilate yaku mina vene di ini niyadi kana Iesu rofu reyo. 25 Mina amiye ruda resi amiye umuyeyo ma dibura yavari afei boyadi bi kamini moi feideyo, ina usa nigamadi dada. Resi bi Iesu maro, ini mokeyadi kana reyaganedi vo nisi.

Iesu satauro ikoko reyadi

(Mt 27.32–44; Mk 15.21–32; Jn 19.17–27)

26 Iya vene yaku Iesu afei bogamadi ri, bi Cyrene gagani amiye yokoi roka Simon, kaere bi gaganiri gutu taoniri bae dui reyo, baku reyadi. Resi bi moi gira resi satauro ina fafauri aiyo ma ina yaku uakaisi Iesu usi boyo.

27 Amiye toragade iniye ina usi boyadi. Mina amiye tau fogori bi rema vene be iriyeduka resi ina dada isaka nigamadi. 28 Idu Iesu yaku ina vene rofu kero resi niyo, “Jerusalem rema vene, na dada isaka ga nifa, idu ya kaya ma yi mida dada isaka nifa. 29 Adina bi, ini ari baigedi bi amiye yaku nigedi, ‘Mida de rema vene, ma natu rema vene, kaere bi susu de maro, bi buni toragade regedi!’ 30 Mina ariri bi amiye yaku omuna rofu nigedi, ‘Una fafau yare!’ resi ika keikakeika rofu bi, ‘Una moi sui refa!’ ^b 31 Adina bi yabo veguri bi makai regedi vo nisi, ma yabo abiye nigo ri, bi gokai?” ^{▼▼23:31ONa bi yabo vegu kana, ye mina vegu na rofu ogau niyadi, idu ya yabo abiye kana ya rofu beika ogau niyadi?}

32 Amiye remanu, kaere bi vegu no reyadi vene, ka Iesu sa vakoi umuyegi afei boyadi. 33 Gagani roka “Ada Girika” ri bae okiyadi ri, bi kamini satauro ikoko reyadi, ina vegu no reyadi amiye remanu sa. Yokoi bi ini vana rama rofu ma yokoi bi ini vana enana rofu. 34 Ma Iesu yaku niyo, “Baba, ini vegu no koite maku; adina ina vene bi ina toto dada makai rededi.” ^{▼▼23.34Bura bedakaiMa Iesu yaku niyo, “Baba, ini vegu no koite maku; adina ina vene bi ina diba de dada makai rededinufa de.
,} ^e

Iya rededi vene yaku laki isira dudu ini varuka ini yokoiyokoi moiyadi. 35 Amiye tau yaku are resi vegamadi ri, bi Jew vene di ourefeidena vene bi Iesu ni ninika rega nigamadi: “Amiye be bi moi vegu riyo; ina bi Keriso kaere Sei yaku niyo amiye vo nisi, bi iniye moi vegu ri!” ^f

36 Iya rededi vene ka Iesu ni ninika resi baisi waini safi de ru mina masi ^g 37 nigamadi, “Ya bi Jew vene di kini vo nisi, bi ya kaya moi vegu ri!”

38 Bura yokoi ka ini satauro yabo odorori aisi yomakai bura resi aiyadi: “Mina bi Jew vene di kini.”

39 Vegu no reyo amiye yokoi satauro reyadi mina yaku Iesu ni ninika resi niyo, “Ya bi Keriso ba? Ya kaya moi vegu risi una ka moi vegu ri!”

40 Idu yokoi ere yaku emagasa niyo, “Ya bi Sei rofu ori reisa ba ide? Ini adina yi kaunava bi ini kaunava kana. 41 Una beika moisifa bi una vegu reyafa kana; rama moisifa mini. Idu yomina amiye bi vegu no yokoi rena de.” 42 Resi niyo, “Iesu, yi ourefeidena amena sana moigiya ri, bi na na moke!”

43 Ma Iesu yaku ina rofu niyo, “Gua ya ni tore reida mini, mina medari ya bi na sa ada rena sanari amegiya.”

Iesu di muyena

(Mt 27.45–56; Mk 15.33–41; Jn 19.28–30)

44 Meda nemoko tobo niyo ri, bi gagani tora noibanu bi mukuna yaku fono resi meda nemoko regodenu koina niyo, ^h 45 ye mukuna yaku meda bou riyo ma Sei ni vakena yava ideri di ini ida vena bou ridedi varuka, mina utama uesi reyo. 46 Kamini Iesu goroka tora dudu raka niga niyo, “Baba, yi vanari nai vima fereida!” Mina nisi asa you feideyo. ⁱ

47 Ruda vene di ourefeidena amiye tora yaku beika vata niyo mina veyo ri, bi Sei moi odoro riga niyo, “Rama iniye mina amiye bi mokena rorobo amiye!”

48 Amiye taugade iniye mina vata nigamo vegi egogo reyadi. Beika vata niyo mina veyadi ri, bi iriyeduka toragade resi ini rautu rofu dairiyadi. 49 Ma Iesu di ini asiyaka ina sa baiyadi ma rema kaere ina sa Galilee gutu usi baiyadi, bi gaimari gutu are resi mina vegu vata nigamo mina vegamadi. ^j

Iesu guri aiyadi

(Mt 27.57–61; Mk 15.42–47; Jn 19.38–42)

50 Kanisoro amiye yokoi ini roka bi Joseph, ina bi buni ma mokena rorobo amiye. 51 Ina bi Arimathea, Jew vene di taoni yokoi amiye. Ina bi kanisoro vene yaku egogo resi ini sina ago ma reremama regamadi ri, bi de dui reyo. Kamini ina ka Sei di ourefeidena amena sana baigo mina tua regamo. 52 Mina amiye yaku bosi Pilate rofu Iesu di rovaita moigi usa niyo. 53 Resi bi ini rovaita moi soka resi varuka buni yokoi dudu kumu risi kono guri fore ideri goiyadi bi ini rovaita mina ideri aiyo. Mina kono guri bi rua; muyena rovaita yokoi mina ideri aina kode. 54 Mina bi Sabati dogo rena di meda, adina Sabati meda bi kaira niyo.

55 Iesu sa vakoi Galilee gutu baiyadi rema vene bi Joseph usi bosi Iesu di rovaita gokai mina kono guri ideri aiyo mina veyadi. 56 Resi bi sisika buni be dogo regika rauturi dairiyadi. ^k

Sabati medari, bi tarutaru reyadi, adina bi ago gira yaku bi makai niyo dada.