Luk 7 | KQC | STEP | Amiye rofu ini sina tau niyo mina, ni vau reyo ri, bi Capernaum taoniri dui rei boyo.

c 7.22:Is 35.5–6, 61.1

‏ Luke 7

Iesu yaku Rome di iya rededi vene di ourefeidena amiye di naivo amiye buni riyo

(Mt 8.5–13)

1 Amiye rofu ini sina tau niyo mina, ni vau reyo ri, bi Capernaum taoniri dui rei boyo. 2 Rome di iya rededi vene di ourefeidena amiye yokoi di naivo amiye, kaere bi ini mokei vava iniye redo amiye yokoi bi gauka reyo; ina bi muyena gauka moiyo. 3 Mina iya rededi vene di ourefeidena amiye yaku neideyo bi Iesu bi Capernaum ri, bi ago ni feideyo Jew tora vene be rofu, buni baisi ini naivo amiye moi buni rigo ba ide. 4 Iesu rofu baisi ni guba rega niyadi, “Mina amiye vana magiya bi buni. 5 Adina uni vene rofu uka mado dada, una rofu uni usausa yava bi ina yaku riyo.”

6 Kamini Iesu ina vene sa boyadi. Yava adina okiyadi ri, bi mina iya rededi vene di ourefeidena amiye yaku ini asiyaka vene rofu ini ago ni feideyo Iesu rofu niyadi, “Warika amiye, gokai mokegiya ri, bi ga devo. 7 Mina dada na ka ya rofu baigida bi buni de, ago nina maka regiya ma nai naivo amiye buni niyaine. 8 Na ka bi amiye be gabireri ameida dada; iya rededi vene be bi nai gabireri ma yokoi rofu nida, ‘Bo!’ vo nida ri bodo; ma yokoi rofu, ‘Bae!’ nida ri baido; ma nai naivonaivo amiye rofu bi, ‘Mina re!’ vo nida ri redo.”

9 Iesu yaku mina neideyo ri tururu resi kero resi amiye taugade kaere ina rofu usi didedi niyo, “Ya nida, mina kana Israel ri uka vari gira mana de baku reyaka!”

10 Mina ni feideyo vene yavari dairiyadi ri, bi ini naivo amiye bi buni niyo.

Iesu yaku obu di mida moi dadiyo

11 Meda doba de, ^{▼▼7.11Meda doba de;bura bedakaiAri uveyo rinufa.} Iesu yaku taoni yokoi roka Nain ri ini usi dina vene ma amiye taugade sa boyadi. 12 Taoni ida venau okiyo ri, bi muyena amiye yokoi, guri aigi, uakai yakuyadi. Mina muyena amiye bi obu yokoi di ini mida yokoimaka ma taoni di amiye taugadegade ka mina obu sa. 13 Warika Amiye yaku veyo ri, iriyeduka resi ina rofu niyo, “Isaka ga ni.” 14 Kamini, baisi muyena maua avaka moiyo ri, bi uakaidedi vene are reyadi. Iesu yaku niyo, “Mida godua, na yaku ya nida, dadi!” 15 Kamini, mina muyena godua dadisi ameinu resi ago niyo ma Iesu yaku ini nono maro.

16 Ma amiye tau noibanu ori no iniye resi Sei di roka moi odoro regasa niyadi, “Sei di ago nido amiye tora yokoi una fogori ogau niyo mini!” Resi ka niyadi, “Sei yaku ini vene rofu vana magi okiyo mini!”

17 Kamini mina vegu di sina bi Judea gagani tau ma ina adina gagani negau tauri urafo reyo.

John Baptist ni feideyadi vene

(Mt 11.2–19)

18 John Baptist di usi dina vene yaku mina sina tau ni oteimaradi. Kamini ini usi dina amiye remanu roka nisi 19 ni feideyo Warika Amiye rofu bosi ni kaitegedi, “Baigo amiye bi ya ba, o amiye yokoi tua regifa?”

20 Ina remanu ina rofu boyadi ri niyadi, “John Baptist yaku una ni feidesi usausa nigi niyo, ‘Baigo amiye bi ya ba, o amiye yokoi tua regifa?’”

21 Mina medari, Iesu yaku amiye taugade moi buni reyo; gauka vene, esika vene, vima no yaku moiyo vene, ma ne taufa vene ka moi buni reyo ma dubusa nene reyadi. 22 Kamini ina yaku mina amiye remanu rofu niyo, “Bosi John nifa beika vega neideyadi: ne taufa vene nene rededi, yuka no vene di mona rededi, refera nufa vene bi buni niyadi, ^{▼▼7.22 buni niyadi:5.12 baku re.} anema kora vene bi neidededi, muyena vene veguri dadidedi, ma irava vene ka sina buni ina rofu ni rausi reyadi. ^c 23 Na rofu mokei adaka de rededi vene bi ina rofu bi ada toragade iniye!”

24 John di ini ago moi baiyadi vene dairi diyadi ri, bi John di sina kamini amiye tau rofu niga kora reyadi, “Ya bi beika vegi gagani autu sanari boyadi? Doi iye aurari tururu redo ba? 25 Beika vegi vo nisi boyadi? Varuka burefe rido amiye ba? Mina kana varuka burefe ridedi ma beika baika burefe moiga iriga amededi vene bi kini di yavari baku regiya! 26 Na nifo, beika vegi vo nisi boyadi? Sei di nido amiye, ba? Yo, na yaku ya vene rofu nida, Sei di nido vene bi tau tora, idu mina tau bi John yaku reyo, kana de regedi. 27 Adina amiye rama bi John mini, Sei di agori bura reyo: ‘Sei yaku ago niyo; yi buda rofu nai naivonaivo amiye ni feidegida. Yi ida moi dogo reyaine.’ ^d 28 Ya vene rofu nida, amededi tau bi yokoi yaku John ebu rena de redo. Idu Sei di ourefeidena amena sanari bi kaere amiye roka de yaku bi ebu redo.”

29 Amiye tauvakoi ma fore butu rededi vene ka mina sina neideyadi ri, bi Sei di vegu bi rama vo niyadi, adina bi John yaku babatiso reyo dada. ^e 30 Idu Pharisee vene ma ago gira oteimana vene bi John di babatiso de moiyadi dada, Sei di mokena ina vene rofu bi makuyadi.

31 Iesu yaku niyo, “Gua ari vene bi beika vo nigida? Ina bi gokai kana? 32 Ina bi mida keikakeika kana, maketi sanari amegasa ini asiyaka rofu raka nisi nidedi, ‘Una bi ya rofu bibo isira reyafa, idu ya bi adena de uyadi! Una bi muyena yauta niyafa, idu ya bi isaka de niyadi!’ 33 Adina John Baptist deyo ri, bi waini irina de resi oyo reyo kamini niyadi, ‘Ina bi vima no nufa!’ 34 Idu Amiye di Mida baisi bi iruku irisi waini iriyo ri bi niyadi, ‘Mina amiye vefo! Ina bi iruku irina kurakura ma waini irina kurakura. Ina be fore butu rededi vene ma vegu no vene di asini!’ 35 Idu Sei di naivonaivo vene yaku ini reremama di mokena vabara moi rama aidedi.”

Iesu bi Pharisee amiye ini roka Simon di yavari ameinu reyo

36 Pharisee yokoi yaku Iesu niyo ini yavari vakoi iruku irigedi, dada Iesu ini yavari bosi iruku irina sana boi ameinu reyo. 37 Mina taoniri rema yokoi, kaere bi vegu no redo, yaku neideyo bi, Iesu bi Pharisee amiye di yavari iruku irido, dada fore roka alabaster dudu riyadi siua yokoi, ideri bi diga di sisika buni yaku vata baiyo, mina moi boyo. ^f 38 Bosi Iesu di ini yuka atafu fufuta are resi isaka nigi kora reyo. Ini isaka ne koru dudu yaku Iesu di yuka moi dou resi ini ada iye dudu moi ifi regamo, moi roko rego vo nisi. Ini yuka rafo fuka resi diga rausi reyo. 39 Kamini, Iesu raka niyo Pharisee amiye mina yaku veyo ri, ini uka ideri iniye niyo, “Mina amiye bi Sei di ago nido amiye vo nisi bi veyadu mina bi gokai kana rema yaku avaka moido. Adina mina rema bi vegu no redo rema!”

40 Kamini Iesu yaku ni kabai resi niyo, “Simon na bi sina yokoi ya rofu nigida.”

Ni kabai resi niyo, “Oteimana amiye, na rofu ni.”

41 Iesu yaku niyo, “Amiye remanu yaku amiye yokoi rofu fore abitore reyadi; yokoi bi meda 500 di moimai di fore moi tavoi reyo, ma yokoi bi meda 50 di moimai di fore moi tavoi reyo. 42 Ina remanu bi mina fore dairi mana anua reyadi. Dada mina amiye ina remanu rofu fore dairi magedi mokena ga moiyagane vo niyo. Goina yaku bi ina rofu uka toragade mago?”

43 Simon yaku niyo, “Nai mokena bi ina rofu fore iniye moi toka reyo amiye yaku.”

Ma Iesu yaku niyo, “Ya bi rama nisa.” 44 Kero resi mina rema rofu resi Simon rofu niyo, “Mina rema veisa? Yi yava dui reyaka ri, nai yuka koitegi koru de na maro, idu ina bi nai yuka rafo bi ini ne koru dudu moi dou reyo resi ini ada iye dudu moi roko reyo. 45 Ya bi de na fuka reyo, idu dui reyaka ri gutu bi, nai yuka rafo fuka redo mina bi ferena de mini. 46 Nai adari diga de rausi reyo, idu ina bi nai yuka rafori diga di sisika buni rausi reyo. 47 Mina dada, ya nida, mina rema ini uka mana toragade iniye dada, ini vegu no taugade ka koite makuyo. Idu ini vegu no keika maka amiye bi koite makuyo, ini uka mana ka keika maka.”

48 Kamini Iesu yaku mina rema rofu niyo, “Yi vegu no bi koite makuyaka.”

49 Ina sa vakoi iruku iridedi vene yaku iniye ni kaitesi niyadi, “Mina bi kaere, vegu no ka koite makudo?”

50 Kamini Iesu yaku mina rema rofu niyo, “Yi uka vari gira mana yaku ya moi vegu riyo; uka amuta dudu di.”