Luk 8 | KQC | STEP | Mina fufutari Iesu yaku taoni ma rautu digasa ago buni ni rausi regamo; Sei di ourefeidena amena sana di sina buni nigamo ri ini usi dina vene tuero ina sa boyadi

a 8.2–3:Mt 27.55–56; Mk 15.40–41; Lk 23.49

c 8.10:Is 6.9–10 (LXX)

‏ Luke 8

Rema be bi Iesu sa

1 Mina fufutari Iesu yaku taoni ma rautu digasa ago buni ni rausi regamo; Sei di ourefeidena amena sana di sina buni nigamo ri ini usi dina vene tuero ina sa boyadi 2 ma rema be ka, kaere bi Iesu yaku vima no meki reyo, ma be bi ini gauka moi buni riyo: Mary, kaere ini roka bi Magdalene, ina rofu bi, Iesu yaku vima no viro vara meki rei ini rovaitari yakuyo. ^a 3 Ma yokoi bi Joanna, ini maruka Chuza bi Herod di ini yava nari redo amiye, ma Susanna ka bi rema yokoi, ma rema tau ka ina vene yaku ini gugura dudu Iesu ini usi dina vene sa nari regamadi.

Oga varina amiye di mokena ago

(Mt 13.1–9; Mk 4.1–9)

4 Taoni neinei vene taugadegade Iesu rofu baisi egogo reyadi ri, Iesu yaku mokena ago yokoi niyo:

5 “Amiye yokoi ini yoyava varigi diyo. Ye yoyava varivari riyo ^{▼▼8.5Mirona medari amiye yaku yoyava varigasa kono fafau makuyadi.} ri bedakai bi yuka rafo adina sanari vareyo ma amiye yaku etei ri fufuta reyadi ma erena yaku okisi iri vau reyadi. 6 Be bi forefore konori yareyadi. Dadiyadi ri, bi muyeyadi, adina kono bi roko dada. 7 Ma be bi imiye ifoka adinari yaresi vakoi boi tora nisi umuyeyadi. 8 Ma be bi kono buniri yaresi imu resi meko varisi rama niyadi; yokoiyokoi ini rama 100 aiyadi.”

Mina niyo ri, ni tora resi niyo, “Kaere ini anema nufa neidego, bi neideyaine!”

Mokena ago di ida

(Mt 13.10–17; Mk 4.10–12)

9 Kamini Iesu di usi dina vene yaku ni kaiteyadi mina mokena ago ni rorotari reyaine. 10 Ina yaku ni kabai reyo, “Ya bi Sei di ourefeidena amena sana di kiki ago diba nigedi, idu idana vene bi mokena ago maka moigedi; ye yomakai vegedi, idu vei mama de regedi; ma neidegedi, idu neide mama de regedi. ^c

Iesu oga varina amiye di mokena ago ni rorotari reyo

(Mt 13.18–23; Mk 4.13–20)

11 “Mina mokena ago di sina iniye bi yomini: yoyava bi Sei di ago. 12 Amiye bedakai bi yuka rafo ida sanari yoyava yareyadi kana. Ago neideyadi ma Satani yaku baiyo ri ini uka mekori mina sina moi taga riyo, sina moi vari gira resi vegu moigedi baebu. 13 Bedakai bi ago neideyadi ri, bi evade maka ada dudu moiyadi bi yoyava kono foreforeri yareyadi kana. Idu ini daru inike bi gira de, ma uka vari gira doba de. Ye yi uka maina rego baigo ri ina bi you feidegedi. 14 Ma amiye be bi imiye ifoka adinari yareyadi kana. Mina vene bi ago neideyadi, idu mina kono di mokena tau ma gugura taugade moigedi di ura ma gugura be di ura, mina mokena tau yaku ago buni bi moi forovai reyadi, ye ina bi meko o rama varena de reyo. 15 Idu amiye be bi yoyava kana kono buniri yareyadi; ago neidesi ini uka buniri moi gira risi neidesi yavoi resi rama nisi meko vareyadi.

Ramefa takura ideri

(Mk 4.21–25)

16 “Amiye yokoi yaku ramefa orisi disi yaku takura ideri o ekama gabireri de aigo. Idu, ina bi ramefa ikina sanari ikigo. Ye kaere yava dui rededi yaku ka vabara vegedi. ^d 17 “Adina gokai beika sui niyadi bi yakusi ogau nigedi ma gokai beika bou reyadi bi bou uyounesi bura rigo. ^e

18 “Ya beika neidededi bi mokei mona refa! Amiye kaere ini beika baika nufa bi moi tanu mago. Idu kaere ina bi de iniyeiniye, ka ina rofu ini mokena keika amedo bi moi dairigo.” ^f

Iesu ini nono ma ini dubuiyaka sa

(Mt 12.46–50; Mk 3.31–35)

19 Iesu ini nono ma ini dubuiyaka ina rofu vegi baisi bi anua reyadi adina bi amiye tau tora dada. 20 Resi ni oteimaradi, “Yi nono ma yi dubuiyaka bi etofarori are resi ya yaku vegi rededi.”

21 Idu ni kabai resi niyo, “Nai nono ma nai dubuiyaka bi Sei di ago neidesi rededi vene.”

Iesu yaku miya ma aura moi amuta riyo

(Mt 8.23–27; Mk 4.35–41)

22 Meda yokoiri Iesu ini usi dina vene sa bouti yokoiri keu risi niyo, “Una koru moka berou eta rofu boi nenadi.” Dada boyadi. 23 Boyadi ri Iesu vareyo, kamini aura yeiva tora koru moka tora fafau fu reyo ye koru ya boutiri vata baigamo, ina bi no baku reyadi dada. 24 Ini usi dina vene ina rofu bosi edadiga niyadi, “Ourefeidena amiye, una bi kamini muyegifa!”

Iesu dadisi aura ma ureure ni vaunavauna ago maro ma aura bere niyo ma koru moka amuta niyo. 25 Resi ina vene rofu niyo, “Yi uka vari gira Sei rofu mana bi goini?”

Idu ina vene bi ori resi tururu resi iniyeiniye rofu niyadi, “Mina amiye bi kaere? Aura ma ureure rofu besenai ago mado ri ka neidededi!”

Iesu yaku amiye vima no nufa moi buni riyo

(Mt 8.28–34; Mk 5.1–20)

26 Iesu ini usi dina vene sa Galilee koru moka tora berou eta rofu okiyadi, Gerasa ^{▼▼8.26Gerasa;bura bedakaiGadaranufa (Mt 8.28 baku re); idanaGergesanufa.} gaganiri. 27 Soka reyo ri, mina taoni amiye nokoi vima no ina sa amegamo baisi ina baku reyo. Ina bi senagi iniye varuka rina de fai sara digamo. Ina bi yavari amena de idu ina bi amiye guri avana fore rubari amegamo. 28 Iesu veyo ri, ababa nisi ini yuka atafu keto resi raka ni tora reyo, “Iesu Oma Odoro Sei di Mida, na rofu beika ura reisa? Ya ni guba reida, esika na mana ga re!” 29 Mina kana niyo ini adina bi Iesu yaku sena mina vima no niyo yakuyainedi vo nisi. Seini dudu yuka vana ukita risi nari regamadi, idu meda tau vima no yaku moiyo ma mina seini moi ubaki reyo ma gagani autu sanari moi afei bogamo.

30 Kamini Iesu yaku ni kaiteyo, “Yi roka bi beika?”

“Nai roka bi ‘Taugadegade’,” vo niyo — adina bi vima no taugade bi ina ideri amegamadi. 31 Vima no yaku Iesu ni guba reyadi kono rubari ^{▼▼8.31 kono rubari:Jew vene di mokena bi vima no kono ruba ideri dibura aigedi, ini meda koina nigo ma ini kaunava meda okigo ri. Rev 20.3 baku re.} ga moi feideyaine.

32 Mironari bi dona taugade atafu, omuna ikari ina vana irigamadi. Ye vima no yaku Iesu guyaguya niyadi mina dona tau rovaita ideri dui regedi. Kamini ini usa niyadi kana reyo. 33 Vima no mina amiye di rovaitari yakusi dona tauri dui reyadi. Mina dona tau raravari raga rei nesi koru mokari bi koruri sofu nisi muyeyadi.

34 Dona vana regamadi vene bi raga disi beika vata niyo ma veyadi mina taoniri ma gaganigaganiri sina ni digamadi. 35 Amiye diyadi beika vata niyo mina vegedi vo nisi. Iesu vegi okiyadi ri, nei resi mina amiye veyadi, kaere bi vima no taugadegade ini rovaitari ideri yakuyo, bi mironari Iesu di yuka atafuri amegamo rovaita dogo resi mokena rorobo dudu, ma ina tau noibanu ori reyadi. 36 Mina vegu veyadi vene yaku amiye nigamadi gokai mina vima no ya moidedi amiye buni niyo. 37 Kamini mina gagani tau vene yaku Iesu niyadi, ina vene ferei diyainedi, adina ina vene bi ori yaku no iniye niyadi. Ye ina yaku boutiri keu risi diyo. 38 Mina vima no fereyadi amiye yaku Iesu usi digo vo nisi usa niyo.

Idu Iesu yaku ni feidegasa niyo, 39 “Rauturi dairisi Sei yaku beika vegu buni ya rofu reyo ni digiya.”

Dada dairi nesi taoni noibanuri Iesu yaku ina rofu beika reyo mina ni diyo.

Jairus di vefa ma rema yokoi kaere Iesu di varuka avaka moiyo

(Mt 9.18–26; Mk 5.21–43)

40 Iesu dairiyo ri, amiye tau yaku faiva niyadi, adina ina tau noibanu bi ina nari regamadi. 41 Kamini amiye nokoi ini roka Jairus okiyo. Ina bi usausa yava di amiye tora yokoi. Iesu di yuka adinari you makusi guyaguya niyo ini yavari boyagane, 42 adina bi ini vefa yokoimaka ini lagani bi tuero kana bi muyena tumu sa.

Mironari bodo ri, bi amiye tau yaku fafa riyadi. 43 Rema yokoi amiye di fogori bi lagani tuero rema di gauka gura ugamo. Ini fore taugade gauka dogo vene rofu makuyo, ^{▼▼8.43Bura bedakaiIni fore taugade gauka dogo vene rofu makuyonufa de.} idu yokoi yaku moi buni de reyo. 44 Ina bi Iesu di fufutari baisi ini varuka tu avaka moiyo ri, bi ini dava degamo koina niyo. 45 Ma Iesu yaku niyo, “Kaere yaku na avaka moiyo?”

Yokoi yaku nina de reyadi ri, bi Peter yaku niyo, “Ourefeidena amiye, amiye taugade ya sa didedi mini, mina tau yaku ya fafa ridedi.”

46 Idu Iesu yaku niyo, “Amiye yokoi yaku na avaka moiyo, adina na na diba bi vava nai rovaitari yakuyo.” 47 Mina rema yaku veyo bi ina bi baku reyo dada tururu resi Iesu di yuka rafo adinari iniye you makuyo. Minari amiye di nemokori niyo beika resi ina avaka moiyo ma gokai minari maka buni niyo. 48 Iesu yaku ina rofu niyo, “Nai vefa, yi uka vari gira maro yaku ya moi buni riyo. Uka amuta dudu digiya.”

49 Kamini Iesu mina nigamo ri, Jairus, kaere bi usausa yava di amiye tora, bi naivonaivo amiye yokoi ini yava gutuna ina rofu okisi niyo, “Yi vefa bi muyeyo. Beika resi mina oteimana amiye rofu toga mokena moigasa ameisa?”

50 Idu Iesu yaku neidesi Jairus rofu niyo, “Ori ga re; mokena vari gira maka aigiya ri, bi buni nigo.”

51 Iesu Jairus di yavari okiyo ri, bi amiye yokoi ina sa afena de reyo, idu Peter, John ma James, ma mina rema mida keika ini nono baba sa maka. 52 Amiye tau minari uka vorivori regasa isaka nigamadi mina mida keika dada. Iesu yaku niyo, “Isaka ga nifo; mida keika bi muyena de — ina bi neota varedo!”

53 Ina rofu yoga nigamadi adina ina diba bi muyeyo. 54 Idu Iesu yaku rema mida keika di vana moisi ina rofu raka nisi niyo, “Rema mida keika, dadi!” 55 Ini vegu dairiyo ri, bi minari maka dadiyo ma Iesu yaku iruku be magedi ma iriyainedi, vo niyo. 56 Ini nono baba bi tururu reyadi, idu Iesu yaku amiye yokoi mina vegu vata niyo ga niyaganedi vo niyo.