Mark 11
Iesu kini kana Jerusalem ri dui reyo
(Mt 21.1–11; Lk 19.28–40; Jn 12.12–19)
1Kamini Jerusalem ri okiyadi, ye mina bi Bethphage ma Bethany taoni keika Olive yabo di ika adinari. Iesu ini usi dina vene remanu moi feidesi 2bi ina rofu niyo, “Rautu yokoi yi budari rofu bogedi. Mina sanari boi okigedi ri, mironari bi donkey ▼ di mida ukita riyadi mironi, ina bi keu rina kode, younesi moi baifa. 3Ye kaere amiye yaku ya ni kaitego beika resi makai rededi vo nigo ri bi nifa, ‘Warika Amiye ▼ yaku ura redo dada, ma evade maka moi dairigo mironi.’”4Ye neyadi ri bi donkey di mida baku reyadi idau, ukita riyadi yava yokoi di ida venari. Mina you negamadi ri, bi 5amiye be kaere bi mironari are regamadi yaku ni kaiteyadi, “Ya bi beika resi mina donkey di mida younededi?”
6Ma ina yaku ni kabai reyadi Iesu yaku ni oteimaro kana dudu ma mina vene yaku feresi diyadi. 7Mina donkey di mida Iesu rofu moi baisi ini varuka moisi mina donkey di mida odorori youyadi ma Iesu keu riyo. 8Ma amiye taugade ini bou varuka moisi idau ibu reyadi ma be bi yabo adaka nugasi idari ibu reyadi. 9Amiye kaere ini budari ma kaere usi digamadi bi kamini raka nigamadi, “Sei moi odoro ri! Sei buni mado kaere bi Warika Amiye di rokari baido! c 10Sei buni ma uni baba, kini David di ourefeidena amena sana baido! Sei omari moi odoro ri!”
11Iesu Jerusalem ri okisi Sei ni vakena yavari dui resi mina gagani veitao reyo. Idu ari bi koina niyo dada ini usi dina vene tuero sa Bethany diyadi.
Iesu yaku fuka yabo kana mina ni karaini reyo
(Mt 21.18–19)
12Aru veyo ri, ina bi Bethany ferei baigamadi ri, Iesu bi kamini rauna reyo. 13Gaima gutuna ne reyo ri bi yuveita iye yaku fuka yabo kana yokoi bou reyadi. Ye mina vegika bogo fuka be baku rego ba ide mina. Idu bae atafu niyo ri bi yuveita iye maka baku reyo, adina mina bi diya fuka di ini rama nina meda. 14Iesu yaku mina fuka yabo kana rofu niyo, “Amiye dubusa fuka de irigedi ya rofu!”Ma ini usi dina vene mina niyo bi neideyadi.
Iesu bi Sei ni vakena yavari boyo
(Mt 21.12–17; Lk 19.45–48; Jn 2.13–22)
15Jerusalem ri okiyadi ri, Iesu bi Sei ni vakena yavari dui resi bi sero rena vene umeki rei feregi kora reyo. Fore senesi vene di teiboro ma pune erena sero rena vene di fata moi evaivo riyo. 16Sei ni vakena yavari diga boga gugura tau uakaigamadi ka biri riyo. 17Ma ni oteimagi kora reyo, “Bura riyadi, ‘Nai yava roka nigedi bi gagani tau di usausa yava.’ Idu ya yaku reyadi bi, dumaduma vene di ini sui nina yava kana reyadi!” d18Kamini Sei ma amiye utari naivo vene di warika vene ma ago gira oteimana vene mina ago neideyadi ri bi ida be maina regamadi gokai dudu Iesu umuyegedi mina. Idu ina bi Iesu rofu ori reyadi, ini adina bi amiye tau ini oteimagamo ago mina neidesi bi vima diyadi.
19Uru nigika regamo ri bi Iesu ini usi dina vene sa bi taoni feresi yakuyadi.
Fuka yabo di ini oteimana ago
(Mt 21.20–22)
20Uruyaku, ida ma nana rei baigamadi ri mina fuka yabo kana mina ne rei veyadi. Ye abiye niyo ini daruri. 21Peter mokeyo beika vata resi niyo, “Ve kumo, oteimana amiye! Ya yaku ni karaini reyo yabo bi abiye niyo!”22Iesu yaku ni kabai reyo, “Mina mokefa Sei rofu uka vari gira magiya ri. 23Rama iniye ya nida, bema amiye yokoi yaku mina omuna rofu nigo, ‘Dadisi ya kaya koru moka tora ideri you,’ ma ini uka ka itu de, ma uka vari gira dudu beika nigiya bi vata nigo ma ini nigo bi, ina rofu mago. e 24Mina dada ya nida, mokena vari gira aisi beika usa nigiya bi ya moigiya. 25Are resi usausa nigedi ri, ye amiye yokoi ya rofu vegu no riyo, ini vegu no moi erufu refa. Makai regedi ri yi Baba omari ka yi vegu no koite makugo.” ▼ , g
Iesu di vava mina ni kaiteyadi
(Mt 21.23–27; Lk 20.1–8)
27Ina vene bi dubusa Jerusalem ri dairi baiyadi, ye kamini Iesu bi Sei ni vakena yavari nana rei bogamo ri, Sei ma amiye utari naivo vene di warika vene ma ago gira oteimana vene ma tora vene baiyadi Iesu rofu. 28Ina vene yaku ni kaiteyadi, “Beika vava dudu mina moimai reisa? Ma kaere yaku mina vava ya maro ma reisa?”29Iesu ni kabai reyo, “Na bi nai ni kaitena bi yokoimaka. Na ni kabai regedi vo nisi, ya nigida beika vava dudu na bi mina reida. 30Na nifa, John di babatiso rena bi goina gutuna deyo oma gutuna ba amiye rofu?”
31Iniyeiniye ni dodi resi niyadi, “Beika nigifa, ‘Oma gutuna,’ ina yaku una ni kaitego, ‘Ma beika resi ya bi uka vari gira de maradi?’ 32Idu una yaku nigifa, ‘Amiye rofu… ’” (Ina vene bi amiye rofu ori reyadi, adina bi amiye tau yaku mokeyadi John bi Sei di ago nido amiye yokoi.) 33Ye Iesu rofu ni kabai reyadi, “Una diba de.”
Iesu yaku niyo, “Na yaku ka makai de ya nigida na bi beika vava dudu mina vegu reida bi.”
Copyright information for
KQC