Mar 12 | KQC | STEP | Kamini mokena ago nigi kora regamo:, “Amiye yokoi waini meko di muro varisi kota mina buru riyo. Ma waini meko etei di kono ruba goisi waini meko ota rina di yava akuyo. Kamini amiye be yaku fore maro ma ini muro nari reyadi ma iniye bi yava ika oto diyo.

a 12.1:Is 5.1–2

b 12.10–11:Ps 118.22–23

c 12.18:Acts 23.8

d 12.19:Deut 25.5

e 12.26:Ex 3.6

f 12.28–34:Lk 10.25–28

h 12.29–30:Deut 6.4–5

i 12.31:Lev 19.18

j 12.32:Deut 4.35

k 12.33:Hos 6.6

l 12.36:Ps 110.1

‏ Mark 12

Waini meko di muro nari vene di mokena ago

(Mt 21.33–46; Lk 20.9–19)

1 Kamini mokena ago nigi kora regamo:, “Amiye yokoi waini meko di muro varisi kota mina buru riyo. Ma waini meko etei di kono ruba goisi waini meko ota rina di yava akuyo. Kamini amiye be yaku fore maro ma ini muro nari reyadi ma iniye bi yava ika oto diyo. ^a 2 Resi butu rina di meda okiyo ri ina bi ini naivonaivo amiye yokoi ni feideyo ma muro nari vene rofu waini meko vareyo mina be butu riyainedi. 3 Idu ina bi mina vene yaku mina naivonaivo amiye moi gira resi usi vana notoka ni feideyadi. 4 Kamini dubusa ini naivonaivo amiye yokoi ni feidesi boyo ina vene rofu ma mina vene yaku ini ada usi ni moi maena reyadi. 5 Dubusa ini naivonaivo amiye nokoi ni feideyo, idu ina bi umuyeyadi. Ina bi besa ma ni feideyo, idu bedakai bi uyadi ma bedakai bi umuyeyadi. 6 Ma ina sa bi nokoi maka amegamo, ini mida, kaere bi ini uka magamo mida. Ina bi gabi koukou ni feidesi niyo, ‘Nai mida bi vei matagini regedi.’ 7 Idu muro nari vene yaku iniyeiniye niyadi, ‘Ina bi muro biyaguna di ini mida amiye nigo. Baifo kumo umuyenadi, ma mina gugura bi uni auna regifa!’ 8 Ye moisi umuyesi waini muro etofarori makuyadi.

9 “Waini muro biyaguna amiye bi gokai beika be rego? Ina bi baisi muro nari rena vene umuyesi muro bi bouna vene mago. 10 Sei di agori mina bura bi vei mama rededi ba? ^b

‘Yava akuna vene etofa reyadi fore
bi yava moi gira redo fore iniye niyo.
11 Mina bi Warika Amiye yaku reyo;
ma uni nemokori vena bi buni vayavaya!’”
12 Kamini ida maina reyadi ina moigedi vo nisi, adina bi diya niyadi mina mokena ago ina vene rofu niyo. Idu amiye tau ori reyadi, dada ye feresi diyadi.

Fore butu resi mana di ni kaitena ago

(Mt 22.15–22; Lk 20.20–26)

13 Gabi Pharisee ma Herod di eta rofu vene bedakai ni feideyadi, Iesu ini ago nigo ri ni eru regedi. 14 Ina bi baisi Iesu rofu niyadi, “Oteimana amiye, una una diba ya bi sina rama maka nisa amiye. Ya bi amiye rofu de ori reisa, ini adina bi amiye gokai kana bi de maka nisa, idu Sei di ida oteimaisa sina rama dudu maka. Caesar rofu takesi fore fei rena bi uni ago gira rofu rorobo ba de? Fei bi regifa ba de?”

15 Idu Iesu bi sena ini ofarosi sina vei diba resi ni kaiteyo, “Beika resi ya bi na ni eru regi rededi? Siriva fore nokoi moi na mafo kumo vegida.”

16 Fore moi maradi, ma kamini ni kaiteyo, “Mina bi kaere di ne uruma ma kaere di roka?”

Ina vene yaku ni kabai reyadi, “Caesar di.”

17 Kamini Iesu yaku niyo, “Beika Caesar di, bi Caesar mafa, ma beika Sei di bi Sei mafa.”

Ma ina vene bi Iesu di ago rofu vima diyadi.

Muyenari dadi rae rena di ni kaitena ago

(Mt 22.23–33; Lk 20.27–40)

18 Kamini Sadducee vene be baiyadi Iesu rofu, kaere bi muyenari dadi rae rena bi egere de vo nidedi vene. ^c 19 Ina yaku niyadi, “Oteimana amiye, Moses yaku una rofu bura reyo bi: ‘Amiye kaere ini rema feresi muyego, mida de ma natu bi ini dubuini yaku mina obu mego ma ina rofu ini dubuini di mida mago.’ ^d 20 Yokaru bi dubuiyaka viro vara amegamadi. Ourena mida, rema meyo idu muyeyo, mida yokoi de. 21 Usi mida yaku ka mina obu meyo, idu iniye ka muyeyo, mida yokoi de. Ye dubuini regode ere ka makai reyo. 22 Idu dubuiyaka viro vara tau bi makai dudu muyeyadi mida yokoi de evata reyadi. Gabi bi mina rema ka muyeyo. 23 Ye muyena dadi rae rena ri, ina bi kaere di ini rema nigo, adina bi amiye viro vara tau noibanu yaku meyadi?”

24 Iesu yaku ni kabai reyo, “Ya, yi forovai reyadi bi mini, ya ya diba beika resi ini adina bi ya Sei di ago ma Sei di vava bi ya ide vei diba rei mama reyadi? 25 Ye muyena dadi rae regedi ri, bi iniyeiniye de megedi, idu omari naivonaivo vima kana nigedi. 26 Gua muyena di dadi rae rena rofu: ya Moses di bura rena ri ide vei mama reyadi ba, yabo orina agori gokai Sei yaku ago ni maro, ‘Na bi Abraham di Sei, Isaac di Sei ma Jacob di Sei?’ ^e 27 Ina bi vegu ameibobina di ini Sei, diya muyena di Sei. Ya bi moi forovai toga reyadi.”

Ago gira tora iniye

(Mt 22.34–40; Lk 10.25–28)

28 Ago gira oteimana amiye yokoi baisi bi ini ni dodi regamadi mina neideyo. Ina yaku neide mama reyo ri bi Iesu bi rama rorobo dudu ago magamo, ye mina amiye yaku ni kaiteyo, “Mina ago girari goina ere bi tora iniye?” ^f

29 Iesu yaku niyo, “Tora iniye bi yomini, ‘Neidefo Israel vene, Warika Amiye uni Sei ina bi Warika Amiye yokoimaka. ^{▼▼12.29Warika Amiye uni Sei ina bi Warika Amiye yokoimaka;oWarika Amiye bi uni Sei, Warika Amiye maka.
,} ^h 30 Warika Amiye yi Sei rofu uka ma, yi uka meko noibanu dudu, yi vima noibanu dudu, yi mokena noibanu dudu ma yi yeiva noibanu dudu.’ 31 Ago gira remanu bi yomini: ‘Yi asini uka ma ya kaya uka maisa kana.’ Ago gira tora yokoi ide mina remanu maka.” ⁱ

32 Ago gira oteimana amiye Iesu rofu niyo, “Oteimana amiye ya bi rama niyo; ya bi rorobo iniye niyo, ‘Sei bi nokoi maka; Sei yokoi ide idu ina maka.’ ^j 33 Uka magiya yi uka meko noibanu dudu, mokena noibanu dudu, yi yeiva noibanu dudu ma yi asini rofu uka maisa ya kaya uka maisa kana yaku aira ori kamu rena ma vibani ori sisika ebu redo.” ^k

34 Kamini Iesu veyo ina bi ni monamona iniye reyo ma mina amiye rofu niyo, “Ya bi Sei di ourefeidena amena sanari bi maike de.”

Ye mina ituari amiye yokoi yaku uka mokesi Iesu ide ni kaitekaite regamadi.

Keriso di ini ni kaitena ago

(Mt 22.41–46; Lk 20.41–44)

35 Kamini Iesu bi Sei ni vakena yavari amiye oteimagamo ri, ina yaku ni kaiteyo, “Gokai dada ago gira ni feidena vene yaku nidedi Keriso bi David di tutubena? 36 David iniye, Vima Kikifa di vava yaku moisi niyo: ^l

‘Warika Amiye yaku nai Warika Amiye rofu niyo:
Nai vana rama ameinu re
kumo na yaku yi tuma vene fafau yi yuka aina sana rigida.’
37 David iniye ka roka nisi nido, ‘Warika Amiye.’ Ye gokai ida dudu ina bi ini tutubena?”

Iesu yaku ago gira oteimana vene di vegu ni diba reyo

(Mt 23.1–36; Lk 20.45–47)

Amiye taugade Iesu di ini ago neidegamadi ada dudu. 38 Ye ini oteimana ago bi yomini: “Vei mona refo ago gira oteimana vene rofu. Ina vene yaku ini ura rededi bi, nana rededi ri varuka doba akusi voivoi sanari amiye yaku buni dudu maka ni kabai reyagane. 39 Ma usausa yavari amena sana ka buni torari amena ura rededi ma irakuna sanari ka makai. 40 Ina vene yaku obu vene di gugura ka duma resi ofa dudu usausa doba nidedi. Mina kana vene, ini kaunava moigedi bi toe tora iniye.”

Obu di ini fore maro

(Lk 21.1–4)

41 Iesu bi Sei ni vakena yava di fore aina mauari berou eta rofu ameinu resi amiye ini fore aigamadi mina vegamo. Amiye gugura tau nufa bi fore tora aigamadi. 42 Idu obu irava baisi bi fore keikakeika remanu aiyo di yeiva bi keika iniye. 43 Iesu ini usi dina vene ni rutu resi niyo, “Rama iniye ya nida, mina obu gugura de nufa bi tora iniye aiyo ma mina amiye tau yaku aiyadi bi ebu reyo. 44 Mina vene yaku fore toratora bi ini gugura tau fafau aiyadi, idu mina rema ini gugura nufa de bi, ini tora noibanu aiyo; mina bi ini fafau ameibogo gugura.”