Mark 16
Iesu dubusa dadi rae reyo
(Mt 28.1–8; Lk 24.1–12; Jn 20.1–10)
1Kamini Sabati di meda koina niyo ri, Mary Magdalene, Mary kaere bi James di nono ma Salome bi sisika buni muramura voi reyadi. Ye moisi bogedi ma Iesu di rovaitari aigedi. 2Uruyaku gorogoro meda dadiyo ri, ouresi di ari fura kora rena, mina rema bi sena ida bogamadi guri vegi 3resi iniyeiniye ni kaiteyadi, “Kaere yaku bi guri di ida vena fore biri riyadi mina moi kurevai rei tae rigo?” 4Idu, kamini ne resi veyadi bi mina fore bi sena moi kurevai rei etaga riyadi; mina fore bi tora iniye. 5Resi ideri bi veyadi bi amiye rua varuka doba feyo akusi vana rama rofu amegamo, ma vesi imu niyadi.6Ina yaku niyo, “Ori bi ga refa, na na diba ya vene bi Iesu Nazareth amiye kaere bi satauro odoro ikoko reyadi mina maina rededi. Ina bi dadi rae reyo! Ina bi minari ide. Ina aiyadi sana vefo. 7Idu bosi ini usi dina vene ma Peter ni oteima, ‘Ina bi ina siko Galilee ri boi nego. Iniye ini niyo kana, ya vene bi mironari baku regedi.’” a
8Mina rema vene bi rovaita tururu resi ori dudu guri sanari gutu raga yakusi diyadi. Ina vene bi ori reyadi mina dada amiye yokoi be de niyadi.
Ago buni di ini ago metona yokoi ▼
16.9–20
Iesu bi Mary Magdalene rofu ogau niyo
(Mt 28.9–10; Jn 20.11–18)
[ 9Rema vene yaku Peter ma ini asiyaka vene rofu disi ni oteimaradi beika ina rofu niyo mina. 10Gabi, Iesu iniye yaku ago kikifa ini usi dina vene di vanari meda dadido ma meda nedo eta rofu ni feideyo. Mina ago bi toga vegu moina di vegu ago.]11Mina sina neideyadi Iesu bi vegu niyo ma ina bi veyo vo niyo ri, ina vene bi uka vari gira de maradi.
Iesu yaku ini usi dina remanu rofu ogau niyo
(Lk 24.13–35)
12Gabi rofu Iesu bi rovaita idana dudu ini amiye remanu rofu ogau niyo idau muro gaganiri negamadi ri. 13Mina ago bosi ni oteimaradi, idu mina ka uka vari gira de maradi.Iesu yaku ini usi dina vene eleven rofu ogau niyo
(Mt 28.16–20; Lk 24.36–49; Jn 20.19–23; Acts 1.6–8)
14Gabi rofu Iesu di ini amiye eleven rofu ogau niyo iruku irigamadi ri; ago gira maro uka vari gira maraganedi. Ada tora nufa uka vari gira de maradi kaere Iesu dadi rae reyo ma veyadi vene rofu. 15Iesu yaku ina vene rofu niyo, “Disi kono tora noibanuri ago buni gagani amiye tau rofu ni rausi regedi. c 16Kaere amiye uka vari gira mago ma babatiso rego ina bi vegu nigo, idu kaere uka vari gira de mago ina bi muyego. 17Kaere uka vari gira aigedi bi mina rebe dudu auta regedi: nai roka dudu vima no umeki resi ago ruaka dudu ago nigedi; 18ini vana dudu aruma moisi vo nisi ma muyena di koru no duduka regedi vo nisi ka esikaesika de moigedi; ini vana gauka vene fafau aigedi bi ina buni nigedi.”Iesu bi omari dadisi boyo
(Lk 24.50–53; Acts 1.9–11)
19Kamini Iesu Warika Amiye ina vene rofu ago ni oteimaro gabi rofu bi Sei yaku omari afei boyo ma Sei di vana ramari ameyo. d 20Iesu di usi dina vene yaku disi gagani tauri ago buni ni rausi reyadi ma Warika Amiye moimai regamo ina vene sa ma ini ago rama aiyo ini rebe auta regamadi ri.]Metona ago yokoi ▼
16.9–10
[
Copyright information for
KQC