Mar 6 | KQC | STEP | Iesu ini usi dina vene sa mina sana feresi ini tora niyo taoniri dairiyo.

a 6.4:Jn 4.44

b 6.8–11:Lk 10.4–11

c 6.11:Acts 13.51

d 6.13:Jas 5.14

f 6.14–15:Mt 16.14; Mk 8.28; Lk 9.19

g 6.17–18:Lk 3.19–20

j 6.34:Num 27.17; 1 Kgs 22.17; 2 Chr 18.16; Ezek 34.5; Mt 9.36

‏ Mark 6

Iesu bi Nazareth ri fufuta maradi

(Mt 13.53–58; Lk 4.16–30)

1 Iesu ini usi dina vene sa mina sana feresi ini tora niyo taoniri dairiyo. 2 Sabati medari usausa yavari amiye rofu oteimagi kora reyo. Amiye taugade vima diyadi ini beika niyo neideyadi ri, iniye niyadi, “Goidu mina baku reyo? Mina mokena tora moiyo bi beika? Gokai dudu Sei di vava nufa vegu redo? 3 Ina bi mina yava rina amiye, Mary di mida ma ini dubuiyaka bi James, Joseph, Judas ma Simon? Ini tobaiyaka ka minari amededi ba?” Ye minari bi Iesu rofu gedu maradi.

4 Iesu yaku mina vene rofu niyo, “Gagani tau vene Sei di ago nido amiye yaku vei odoro regamadi, idu ini tora niyadi rauturi bi ini davatu vene ma usika ourena yaku bi de.” ^a

5 Ini vima diyo adina bi amiye ini uka vari gira de maradi. Ye minari bi Sei di vava nufa vegu moi ogau de riyo, idu gauka vene aisi maka ini vana moi fafau aiyo ma buni niyadi.

Iesu yaku ini usi dina vene tuero ni feideyo

(Mt 10.5–15; Lk 9.1–6)

Kamini Iesu bi rauturautu amiye ago ni oteimaro. 7 Ini usi dina vene tuero raka nisi ni egogo resi remanuremanu dudu ni feideyo. Ina yaku vava vima no fafau ina vene rofu maro. 8 Resi niyo, “Gugura bi yokoi de idari moigedi, idu yi yukana maka – iruku be de ma dura bi de ma fore yi foketari aina ka de. ^b 9 Resi yi yuka ro maka bi rigedi.” Ka niyo, “Varuka yokoimaka akugedi. 10 Bema goina yava yaku ya ni dui regedi bi minari dui resi amefa mamo mina taoni feresi digedi. 11 Bema taoni yokoiri dui regedi ma de ya moi dui regedi o yi ago de neidegedi ri, bi yi yuka di budoka usi eyarei feresi kamini digedi. Ye mina bi ini vegu makai regedi yaku bi vei mama rego.” ^c

12 Kamini disi ago buni ni rausi reyadi, dada amiye yaku neidesi vegu no fereyagane. 13 Minari bi vima no taugade amiye di rovaitari umeki regamadi ma gauka bi diga di ona yaku rovaitari rausi regasa moi buni rigamadi. ^d

John Baptist di muyena

(Mt 14.1–12; Lk 9.7–9)

14 Ye kini Herod ^{▼▼6.14 kini Herod:Herod Antipas, Galilee di ourefeidena amiye.} yaku beika vata nigamo bi neideyo, adina bi Iesu di ini roka bi gagani tauri ogau nigamo. Amiye be yaku nigamadi, “John Baptist muyena gutuna dadi rae resi vegu niyo. Resi bi vava nufa vegu buni moisi redo.” ^f

15 Idu be yaku niyadi, “Ina bi Elijah.”

Ma be yaku niyadi, “Ina bi Sei di ago nido amiye kaere bi senagisenagi Sei di ago nido amiye nokoi kana.”

16 Herod yaku mina neideyo ri bi niyo, “Ina bi John Baptist, kaere bi ini ada nugai feideyaka ma ina bi dubusa dairisi vegu niyo!” 17 Herod ina kaya ago ni gira reyo ma John moisi ini yuka ukita risi dibura yavari aiyadi. Herod mina reyo ini adina bi Herodias kaere bi ina yaku meyo bi ini dubuini Philip di rema. ^g 18 Adina John Baptist yaku Herod toga nigamo, “Yi dubuini di rema ^{▼▼6.18 yi dubuini di rema:yi abuata.} meyo bi tabu.”

19 Mina dada Herodias ini uka esika John rofu bi toragade ma ini ura bi ina umuyego vo nigamo, idu ina rofu ida de. 20 Herod bi John rofu ori regamo, adina bi ina diba John bi mokena rorobo amiye ma amiye kikifa, mina dada buniri maka aigamo. Ina sina neideyo ri, bi ini mokena neuneu niyo. Idu, ini ura bi ini sina neidegi vo niyo.

21 Herodias ini mokegamo meda bae okiyo ri, bi Herod di ini vata niyo di medari ina yaku ini ourefeidena vene, ruda vene di toratora ma Galilee di ourefeidena vene raka nisi irakuna ina rofu maro. 22 Herodias di vefa ^{▼▼6.22Herodias di vefa;bura bedakai biIni vefa Herodiasnufa.} dui resi adena usi Herod di ini okiyadi vene sa di uka moi ada reyo. Ye kini yaku mina rema niyo, “Ya ura beika magida? Yi beika ura regiya bi ya magida.” 23 Sina taugade dudu mina rema niyo, “Gua ya nida mini beika na usa nigiya bi ya magida, ye nai ourefeidena amena sana mina berou rofu tu ya magida.”

24 Mina rema minari maka yaku nesi ini nono ni kaiteyo, “Beika bodo ni kaitegida?”

Ma ini nono ya niyo, “John Baptist di ini ada.”

25 Mina rema evade maka dairi nesi kini rofu ni guba reyo, “Nai ura bi ya yaku ruika maka John Baptist ini ada biyo odorori aisi na ma!”

26 Minari maka kini bi iriyeduka no niyo, idu ina bi gokai ni rego, adina bi sina taugade ini okiyadi vene di ini budari ina rofu niyo. 27 Dada evade ini iya rena amiye ni feidesi ago gira niyo John di ini ada moi baiyaganedi. Ma dibura yavari nesi John di ada nu buru reyo. 28 Resi biyo odorori ae baisi mina rema mida maro, ma ina yaku dadisi bi ini nono maro. 29 John di ini usi dina vene mina neideyadi ri, bi desi ini rovaita moisi guri aiyadi.

Iesu yaku amiye 5,000 ubua reyo

(Mt 14.13–21; Lk 9.10–17; Jn 6.1–14)

30 Kamini ini ni feidena vene bi ina sa amei desi bi ini beika reyadi kana ma beika oteimaradi kana mina nigamadi. 31 Minari bi amiye taugadegade ma nega baiga neyadi, dada iriiri di meda bi de, ye niyo, “Ya yaku maka na sa baigedi ma disi mafumafu sanari sifere regifa.” 32 Ye vanagiri keu risi iniyeiniye mafumafu sana nokoiri diyadi.

33 Idu boyadi ri amiye kaere ina vene vei mama niyadi bi taoni tau gutuna raga resi sena bogamadi ini boi okigedi sana. 34 Ye Iesu bi seriri okisi amiye utuma veyo ri bi ina rofu iriyeduka reyo, adina bi mamoe kaere dogo amiye bi de kana, dada Iesu yaku ina vene rofu ago taugade ni oteimagi kora regamo. ^j 35 Ma meda bi uriyenau eta rofu niyo ri, bi ini usi dina vene bi ina rofu baisi niyadi, “Mina gagani bi maike ma ari bi koina nido mini. 36 Bema buni bi mina vene ni feidegiya ma deyagane goina negau rautu ma taoniri iruku voi resi iriyagane.”

37 Idu Iesu yaku niyo, “Ya yaku iruku magedi ma iriyagane.”

Ma niyadi, “Una yaku 200 siriva fore ^{▼▼6.37 siriva fore:Siriva fore yokoimaka bi rautu amiye di moimai meda yokoiri di ini davana kana. (Mt 20.2 baku re).} dudu beredi voi resi mina vene magifa ma irigedi ba?”

38 Ma Iesu yaku niyo, “Bema yi beredi nufa vo nisi bi disi vegiya.”

Ye baku reyadi ri, bi niyadi, “Beredi 5 ma oyena remanu mini.”

39 Kamini Iesu yaku ina vene rofu niyo bi amiye tau neinei dudu mutaka odoro ameinu reyadi. 40 Dada amiye bi tau neinei be bi 100 ma be bi 50 dudu ameyadi. 41 Minari Iesu yaku beredi 5 ma oyena remanu moisi omari nesi bi buni toragade Sei rofu maro ri, bi beredi moi odesi togatoga ini usi dina vene magamo ma amiye tau neinei dudu rau reyadi. Ina ka oyena remanu moi odesi amiye tau neinei dudu rau reyadi. 42 Ye ina tau noibanu iriyadi ma uka bere niyadi. 43 Ma ini usi dina vene yaku de iriyadi beredi ma oyena sa foroka tuero moiyadi. 44 Ye rumana vene kaere mina iriyadi bi 5,000.

Iesu koru fafau nana reyo

(Mt 14.22–33; Jn 6.15–21)

45 Gua maka Iesu yaku amiye taugade ni feidegamo ri, bi ini usi dina vene vanagiri keu resi ina siko Bethsaida ri, koru moka tora berou eta rofu baiyadi. 46 Amiye yuata niyo koina niyo ri, bi omuna ika yokoiri bosi usausa niyo. 47 Urusa niyo ri, vanagi bi koru moka tobo ramari, ye Iesu bi inaike konori ameyo. 48 Nei reyo ri, bi ini usi dina vene bi fayo rena bi gira iniye nigamo, adina bi ina bi aura baigamo sana seira risi baigamadi dada. Ye ari uvego atafuri ini vene rofu boyo, koru fafau ma nana rega bogo. Ina bi ini vene ebu rego vo niyo. ^{▼▼6.48ebu rego;oina rofu yova rigo.} 49 Idu Iesu bi koru fafau nana regamo vegasa mokeyadi mina bi monogo. Kamini imuna niyadi, 50 ina tau vesi ori reyadi dada.

Idu Iesu yaku evade niyo, “Uka gira nifa! Mina bi na; ori ga refo.” 51 Kamini vanagiri ina vene sa keu riyo ma aura amuta niyo. Ini usi dina vene bi vima disi ago koina niyadi, 52 badina ini adari diba de amiye 5,000 ubua reyo ri ini uka forovai reyadi dada.

Iesu Gennesaret ri gauka vene moi buni riyo

(Mt 14.34–36)

53 Kamini koru moka tora ugasi Gennesaret konori okiyadi ri, minari vanagi ukita riyadi. 54 Ye vanagi fereyadi ri, amiye yaku Iesu bi sena maka vei mama reyadi. 55 Ma amiye raga resi berouberou Gennesaret konori ini gauka ekamari uakaisi moi okigamadi, mina bi neideyadi Iesu ini goidu amegamo sanari. 56 Ye Iesu goidu soka regamo ri, rauturautu neinei o taoni o gagani maketi sanari gauka moi baigamadi. Iesu rofu guyaguya nigamadi, gauka vene yaku ini varuka metona maka avaka moisi buni nigedi. Ye kaere avaka moiyadi bi tau noibanu buni niyo.