Mar 7 | KQC | STEP | Kamini Pharisee vene ma ago gira ni feidena vene be kaere bi Jerusalem gutuna baisi bi Iesu sa ameyadi.

b 7.6–7:Is 29.13 (LXX)

c 7.10:Ex 20.12, 21.17; Lev 20.9; Deut 5.16

‏ Mark 7

Tutubena vene di oteimana ago

(Mt 15.1–9)

1 Kamini Pharisee vene ma ago gira ni feidena vene be kaere bi Jerusalem gutuna baisi bi Iesu sa ameyadi. 2 Minari veyadi bi Iesu ini usi dina vene be bi vana dudu kino ma koitena de yaku iruku moigasa irigamadi.

3 (Pharisee vene ma Jew vene noibanu bi ini tora vene di ago gira vaitani ini vana bi dogo resi koitegedi mamo iruku irigedi. 4 Bema maketi sana gutuna baigedi ri bi iruku de irigedi mamo rafesi iruku irigedi. Ma ini sena tora vene di ago gira mina ka vededi bi kaposi ma fani ma ketoro ^{▼▼7.4Bura bedakai bima ekamanufa.} ka koitegedi.)

5 Ma Pharisee vene ma ago gira ni feidena vene yaku Iesu ni kaiteyadi, “Beika resi yi usi dina vene bi tora vene di ini ida dudu de amesi ini vana kino sa iruku iridedi?”

6 Dada Iesu yaku ni kabai resi niyo, “Isaiah bi rama resi ya ofarosi vene rofu ni ogau resi bura riyo bi mini: ^b

‘Mina vene bi ini afiye yaku na ni vakededi,
idu ini uka bi na rofu bi maike.
7 Tavoitavoiri na ni vakededi,
mina dada amiye di ago gira nisi
Sei di ago gira kana oteimadedi!’
8 “Ma ya bi Sei di ago gira bi you feidesi sena amiye di ago moi gira ridedi.”

9 Ma ina vene ka rofu niyo, “Ye ya bi Sei di ago gira gedu masi bi yi oteimadedi ago moi gira ridedi. 10 Mina dada Moses yaku makai niyo, ‘Yi baba ma nono rofu vegu buni re,’ ma ‘Kaere yaku baba o nono ni karaini rego bi umuyeyaine.’ ^c 11 Idu ya bi amiye oteimadedi bema ina vene ini sogona amededi vo nisi bi mina yaku ini baba o nono aedegedi. Idu nidedi, ‘Mina bi Corban (Sei di sogona’) 12 resi ka nidedi, ‘Yi baba o nono bi aedena ga re.’ 13 Ya yaku tora vene di ago amiye rofu oteimadedi, dada Sei di ago moi no ridedi. Ya yaku ka vegu no taugade makai rededi.”

Amiye kino nidedi di vegu mini

(Mt 15.10–20)

14 Resi Iesu dubusa amiye taugade raka ni egogo resi niyo, “Amiye tau neidefo, ma yi adari ameyaine. 15 Beika baika etofaro baisi amiye di rovaita ideri dui rego yaku moi kino de rigo. Idu beika amiye di ini rovaita gutuna yakugo yaku mina amiye moi kino rigo.” ^{▼▼7.15Bura bedakai bi nanaka 16 nufa:Amiye ini anema nufa neidego vo nisi, bi neideyaine!(4.23 baku re).}

17 Amiye tau feresi yavari dui reyo ri, ini usi dina vene yaku ni kaiteyadi beika mina mokena ago di rama bi. 18 Iesu yaku niyo, “Ya ka bi ada yora de ba? Ide vededi ba, beika etofaro amiye rofu baisi ini rovaitari dui rego yaku moi kino de rego? 19 Adina bi ini uka mekori bi na de redo idu ini rivori maka bi ini rovaitari yakudo.” (Makai niyo dudu Iesu yaku moi rama aiyo iruku tora noibanu bi ruaka maka.)

20 Ka niyo, “Beika amiye rofu yakudo yaku moi kino rido. 21 Amiye di uka ideri gutu yakudedi mini: mokena no, gogoi rena, dumaduma, amiye umuyena, amiye di rema nufa o rema di maruka nufa gogoi rena, 22 udu, amiye uka esika mana, amiye ofa ni mana, uka ideri mokena no, uka mukuna, gonema, amiye di roka moi no rina, ya kaya roka ni odoro, ma dona auna di mokemoke. 23 Mina vegu no tau yaku amiye di ini rovaita ideri amesi yakudedi bi amiye moi kino ridedi.”

Rema yokoi di uka vari gira maro

(Mt 15.21–28)

24 Kamini Iesu mina sana feresi dadisi Tyre taoni di gagani rofu diyo. Ina bi yava ideri dui resi baiyo ini ura bi amiye diba de niyagane ina bi minari. Idu ina bi sui nina de erau niyo. 25 Rema yokoi kaere bi ini rema mida bi vima no ina sa bi Iesu di sina neideyo ri, bi evade maka ina rofu baisi Iesu di yuka adinari ini efuka meimiyo. 26 Ina bi Greek rema Phoenicia gagani Syria ri vata niyo. Iesu ni guba regamadi mina vima no ini mida rofu umeki reyainedi. 27 Iesu ina rofu niyo, “Ouresi bi ferei kumo midamida yaku ini beika ura rededi siko iriyagane, adina bi rorobo de midamida di iruku moisi auna rofu makugiya.”

28 Mina rema yaku niyo, “Warika Amiye, rama nisa, idu kamini mida di iruku bubudo teiboro gabireri auna yaku iridedi.”

29 Kamini Iesu yaku niyo, “Makai dudu na niyo ma ya bi dairigiya, vima no bi yi midari yakuyo.”

30 Ina bi rautu disi veitao reyo ri, bi ini mida bi varegamo ma vima no ka diyo.

Iesu yaku babo ma anema kora amiye moi buni riyo

31 Kamini Iesu bi Tyre taoni di gagani feresi Sidon dui resi Galilee koru torari Decapolis taoni di gagani ideri okiyo. 32 Mironari amiye yokoi ina rofu afei okiyadi. Ina bi babo ma vena ufoka resi ago nina bi gira. Ina vene yaku guyaguya niyadi ini vana mina amiye fafau aiyaine. 33 Ye Iesu yaku afei tae ri diyo mina amiye tau rofu resi ini vana ebuna moisi mina amiye di ini anema ideri aisi ayaka su resi ini afiye avaka moiyo. 34 Ne odoro risi oma vesi ababa nisi ina yaku niyo, “Ephphatha!” Mina bi “Ne are!”

35 Mina dudu mina amiye di anema fo'o niyo, ma ini afiye roge reyo ma ago ni mama reyo. 36 Iesu yaku ago gira dudu mina vene rofu niyo, “Amiye nokoi ga ni oteimaragane.” Ago gira Iesu yaku niyo bi tora iniye niyo ri, ina vene toga ini vegu di ago ni rausi regamadi. 37 Amiye di vima bi tururu toragade resi niyadi, “Ina yaku deda tau moi burefe rido; ina yaku ka anema kora neidesi babo ago niyadi.”