Mar 9 | KQF | STEP | Bi Yesu i giuwedina gado, “Yea giugiu kauwemi, matabumi niganana ko miyamiyana mote koma peki kamaina ee te Maimaituwa ena waibada ḡailisi vaitena ya natonatona ko kita.”

b 9:12Aisaiya 52:13-53:12; Sams 22

d 9:48Aisaiya 66:24

‏ Mark 9

1 Bi Yesu i giuwedina gado, “Yea giugiu kauwemi, matabumi niganana ko miyamiyana mote koma peki kamaina ee te Maimaituwa ena waibada ḡailisi vaitena ya natonatona ko kita.”

Yesu kitana i nuwavitala

(Metiu 17:1-13; Luk 9:28-36)

2 Laḡan 6 mulidimo Yesu Pita, Diyemesi bi Diyoni i wai dolidi a saḡa a nawa oya lofalofana dabanemo, ḡome tedi taudiḡa. Bi tedi a wai kita ba Yesu kitana i nuwavitala. 3 Te ena gala potipotina bi waimatakanikanina, mote aiyai dobumo gala ima koḡa bi mai ima tubuḡa. 4 Kamaina bi ena tauwaikaiwatana faiona a kita te Mousis bi Elaidiya a lau maḡata bi Yesu vaitena a wai giugiu.

5 Pita Yesu i giuwena gado, “Tauwailovelove i visu te tama niga ḡome. Agunai i visu te kape faiona ka voiyedi, ḡemota tam, ḡemota Mousis bi ḡemota Elaidiya.” 6 Tana mote i sibe te bai ya giuwe, bi i tatava aubaina te i giu yabayababa.

7 Kamaina bi giyou i lau maḡata bi i suma tawedi, kalina dididigina giyouḡa i yovo bi i giuna gado, “Niga taunana tagu Natugu, nuwapougu tana lisinemo. Koi beyavaiye kauwe!” 8 Noi taunana a tautauvitaledi te mote aiyai ḡesau bi Yesu taunaḡa i moimoito.

9 Laḡannemo oyamo a miyamiya kuluva, bi Yesu i giu vavasaḡedi te bai i tubutubuḡana mote aiyai ḡesau sima giuwe, ee te Tana Taunana Natuna* pekimo ya kena moito.

10 Tedi ena giu a kaiwata, bi taudiḡa modomodomo niga kauwina a wai giugiuwe te pekimo kenamoito banina bai.

11 Kamaina bi Yesu ai talaye, “Bai aubaina waiḡake tauwailovelovena sa giugiu te Elaidiya ya gei nato?” ^{▼▼9:11Diu edi waisumaḡa te Elaidiya maso i gei tava dobumo, kaka muliḡa Maimaituwa ena vinevine maso i tava. (Mal 3:1, 4:5-6 ko kita). Tedi mote a sibe te Elaidiya ya tava dobumo ba yai nuatoi.}

12 Yesu i giuna gado, “Mba giu kauwa Elaidiya male ya tava doli bi bai matabuna ya kadidimani. Bi kota bai aubaina kulikulina wadubonemo i giu te Tana Taunana Natuna male yai nuwatoi gulata bi sa daboke? ^b 13 Yea giugiu kauwemi, Elaidiya kaikana i tava bi lava edi ḡowana lisinemo a noḡonoḡotina a voiye, mai kulikulina wadubonemo i giugiu watana mai. ^{▼▼9:13Yesu niga ḡome Elaidiya i giuwena ba Diyoni tauwaibulu i giugiuwata. (Metiu 11:13-14, 17:10-13 ko kita).}

Yesu aluwa gebogebona gomana noponemo i kwavi vai

(Metiu 17:14-21; Luk 9:37-43a)

14 Yesu bi ena tauwaikaiwatana faiona oyamo a munaḡa yovo tauwaikaiwatana ḡesaudi lisidimo. Bi a kita te lava kumna tedi a dubutawidi bi waiḡake tauwailovelovena vaitedi a waikagiu. 15 Laḡannemo lava Yesu a kitakita ba tedi a tagugu bi a velau te ai yebone.

16 Tana i wai talayedina gado, “Bai kona waikagiuwe?”

17 Lava kumna nopodimo oloto i giuna gado, “Tauwailovelove, natugu e natomena lisimmo, tana aluwa gebogebona i sunei bi i voiye te mote ima giugiu. 18 Lanḡannemo aluwa gebogebona gomana i sulusuluvai ba i pwalapwalaḡe doḡamo. Bi mwakana ya sanawaikikokikodi bi kasapula gayanaḡa sa yovoyovo bi tunina sa badobado. Taunana aubaina te em tauwaikaiwatana e giuwedi te aluwa gebogebona maso a kwavi vai bi mote ḡemoḡemotina te maso a voiye.”

19 Yesu i giuwedi, “Ei, temi mote koma wai sumaḡa! Vaitemi teala miya! Yaḡolo te emi vita yea avavavali? Gomana ko natome lisigumo.”

20 Tedi gomana a nawe Yesu lisinemo. Noi taunana aluwa gebogebona Yesu i kitakita ba gomana i katititi te i kuluva doḡamo i talaḡa bi i wai kuikuileva bi kasapulana gayanaḡa a yovoyovo. 21 Yesu gomana tamana i wai talayena gado, “Niga ena sidana i wai tubuna bainewa lofana?”

Bi tana i giuna gado, “Wala ma ḡaubonemo te niganana. 22 Bi laḡan wapawapana aluwa gebogebona gomana kaimo bi gaubemo i pwalaḡe nawe te maso i wai peki. Bamo te tam ḡemoḡemotim, te kwa launuwatoiyemai bi kwa sagumai.”

23 Yesu i giuwena gado, “Bai aubaina kuna giu, ‘Bamo te tam ḡemoḡemotim?’ Aiyai ya waisumaḡana ba Maimaituwa ḡemoḡemotina bai matabuna tana aubaina ya voiyedi.”

24 Noi taunana te gomana tamana i kaiḡabalana gado, “Aee, yea waisumaḡa, bi mote egu sumaḡa i didiga. Kwa sagugu te egu waisumaḡa ya didiga!”

25 Yesu i kita te lava kumna a tavatava taunana aubaina Yesu aluwa gebogebona i giuwena gado, “Tam beyapotapota bi gumgum aluwina yea kwavikwavivaim te noi taunana gomana kwa gose kamaḡe, mote kuma saḡa munaḡa gomana noponemo!”

26 Aluwa gebogebona gomana i ka binabinau, bi i katititi bi i potiyovo kamaḡe. Bi gomana kitana mai lava pekipekina, bi lava wapewapedi ḡome a giu, “Tana i peki.” 27 Bi Yesu gomana nimanemo i kabi bi i solu wai moito, bi gomana i moito.

28 Muliḡa Yesu i nawa vanuwa noponemo, bi ḡome tedi taudiḡa bi ena tauwaikaiwatana ai talaye, “Bai aubaina tama mote ḡemoḡemotina te maso aluwa gebogebona ke kwavi vai?”

29 Bi Yesu i giuwedina gado, “Niga mai aluwina ba pali taunaḡa ka ya kwavi vai, mote bai ḡesauna.”

Yesu ena peki i giuwata munaḡe

(Metiu 17:22-23; Luk 9:43b-45)

30 Yesu bi ena tauwaikaiwatana mba modomodona a ḡose bi Galili noponaḡa a nawa. Yesu mote i ḡoye te aiyai ḡesau ya sibe te tana ḡome, 31 banina tana ena tauwaikaiwatana i wailovelovedi i kovi, bi i giuwedina gado, “Tana Taunana Natuna kaka sa kaisoluḡe bi lava nimedimo sa sako, bi tana sai peki. Bi laḡan wai faioninemo ya kenamoito.” 32 Tana mai i giugiu, ba tedi mote ena giu banina a sibe. Bi a naila aubaina te mote ai talaye.

Yesu ena tauwaikaiwatana a waikagiu te aiyai i saḡa gulata.

(Metiu 18:1-5; Luk 9:46-48)

33 Yesu bi ena tauwaikaiwatana Kapeniammo a tava bi a valageta vanuwemo, bi i waitalayedi, “Temi etamo bai konai kagiuwe?”

34 Tedi a miya moimoisili mote bai a giuwe, banina tedi etamo taudiḡa a waikagiu te aiyai i saḡa gulata.

35 Tana i miya tulu, bi ena tauwaikaiwatana 12 i giuwedi a nato ai ḡemotidi bi i giuwedina gado, “Aiyai bi doli i ḡoyena, ba ya sakoyovo munaḡe bi lava matabudi aubaidi yai taunoya.”

36 Yesu gomana i natome mododimo i wai moito bi i giuwedi, 37 “Aiyai isagumo bi gomana ḡaubona mai niga gomenina i giuvaina ba tagu ya giugiuvaigu, bi kota aiyai tagu ya giugiuvaiguna ba tana mote tagu tauguḡa ima giugiuvaigu bi taugiukamaḡegu vaitena ya giugiuvai.”

Aiyai mote imai ḡavieda ba tana eda tau.

(Luk 9:49-50)

38 Diyoni Yesu i giuwe, “Tauwailovelove, tama oloto ḡemota ke kita isammo aluwa gebogebodi i kwavikwavi vaidi. Olotona mote tada vaiteda, taunana aubaina kei ḡake te mote ima voiye munaḡe.”

39 Yesu i giuna gado, “Mote komai ḡake, lava aiyai isagumo anisove kauwidi ya voivoiyedina ba muliḡa noi i nawana mote isagu ima kagebogebo. 40 Lava aiyai bi mote imai ḡaviyeda ba tada eda tau. 41 Yea giugiu kauwemi, bamoda lava aiyai gauba i yaai bi i vitemina, banina temi tagu taukaiwatagu, ba ena maia mote imai geḡa bi ya vai.”

Laukaḡesolumo gebogebo ya tubutuḡa

(Metiu 18:6-9; Luk 17:1-2)

42 Bamo te niga libilibidi mododimo gomana ḡaubona ḡemota i waisumaḡegu bi aiyai i voiye wapa bi gebomo i kuluvana, ba i visu te lavana gadonemo ḡakima dididiga sa duli bi nisamo sa pwalaḡe nawe. 43 Bamo te nimam i voiyem bi gebomo kuna kuluvana ba kwa koiḡavuki. I visu te nimam ḡemota bi kwa saḡa yawasanamo. Mote i visu te nimam labu bi kwa nawa iyoyoḡamo, ḡome kai mote bamo ena ani kalapeki. 45 Bamo te kaḡem i voiyem bi gebomo kuna kuluvana ba kwa koiḡavuki. I visu te kaḡem ḡemota bi kwa saḡa yawasanamo. Mote i visu te kaḡem labu bi sa pwalaḡe nawem iyoyoḡamo. 47 Bamo te matam i voiyem bi gebomo kuna kuluvana ba kwaḡivoi kamaḡe. I visu te matam ḡemota bi Maimaituwa ena waibadamo kwa saḡa. Mote i visu te matam labu bi sa pwalaḡe nawem iyoyoḡamo. 48 Mba ḡome mwatamwata lava sa kanikanidi bamo mote edi anipeki, bi kaina mote bamo ena ani kalapeki. ^d

49 Taukaiwatagu matabudi male pilipili sa banavidi bi pilipilidi mayavaidi mai kai poyana, mba etanemo kaka sa ḡailisi.

50 Soliti ba mwali visuvisuna bi bamo te dinina i kovina, ba bainewa ko voiye bi ya dini munaḡa? Temi didiga aubaina ko wai kagiuna mba temi mai soliti dinimi i kovi. Temi emi yawasana maso mai kani solisolitina dinina. Temi maso mainana nuwavisumo emi lava vaitedi kona miya.”