‏ Deuteronomy 32

1U a bala na bakut, una ki na valongor, ma ina tata;
Ma ra rakarakan a gunagunan na valongore ra tinata na ngiegu.
2Kaugu tinata na vartovo na bura da ra tua na bata,
Ma kaugu pirpir na bilim da ra mavoko;
Da ra ririmi ta ra vura i golgol,
Ma da ra bata tonoi taun ra lavur davai.
3Tago ina varvai ure ra iang i ra Luluai;
Avat a ru tuna kada God.
4Ra Vat Ki, kana papalum i ko kakit;
Tago kana lavur mangamangana par dia takodo;
A dovot na God ma pa ta kaina tana,
I takodo ma i ko.
5Dia ga pait ra magit i bilak pirana,
Vakir diat ra umana natuna, tago dia dur;
A taun tarai i kaina ma i gegagege ra maukua i diat.
6Dave, ava balbali damana pire ra
Luluai,
Avat a tarai na papaua ma ra umana tabobo?
Dave, vakir ia tama i vavat, ma pa i kul vake avat laka?
Ia iat i tar vaki avat, ma i tar vapadikat avat.
7Avat a nuk pa ra e amana tana,
Avat a nuk pa ra lavur kilala kai mangoro na taun tarai;
Avat a tir ra umana tama i vavat, ma diat a vaarike pire vavat;
Ma kavava umana patuana, ma diat a vateten avat.
8Ba ra Ngala Kakit i ga tive tar kadia gunan ta ra umana vuna tarai,
Ba i ga tibe varbabaiane ra tarai.
I ga pait ra lavur langun kai ra tarai
Varogop ma ra niluluk ure ra tarai Israel.
9Tago ra tarai kai ra Luluai kana tiniba iat;
I tar kale pa Iakob ba kana iat.

10I ga na tadav ia ta ra gunan i bil tuna,
Ma ta ra ngala na pupui i lingling;
I ga tur kikilane, i ga matamataure,
I ga balabalaure da ra kiau na matana iat;
11Da ra taragau i vargat ra umana natina ta kana po,
Ma i bebabebe kove diat,
Ma i vue pepeba, ma i vatur vake diat,
Ma i puak pa diat ta ra bebeana,
12A Luluai kaka i ga rap lue,.
Ma pa ta vaira na god i ga ki pirana.
13I ga vaki ia ta ra lualuana ta ra rakarakan a gunagunan,
Ma i ga en ra vuai ra uma;
Ma i ga vau ia ma ra polo na livur i arikai kan ra vat ki,
Ma ra dangi i tavit rikai ta ra dekdek na vat;
14A bira na polo na u na bulumakau, ma ra polo na u na sip,
Varurung ma ra bira na nat na sip,
A bira na sip Basan, a tomotoina, ma ra bira na me,
Ma ra vit i boina tuna:
Ma ava ga mome ra vain, a polo na vuai na vain.

15Ma Iesurun i ga tubu vavavana, ma i ga ruarua;
Ava tar bira, ava tar tubu, ava tar monoina;
Io, i ga vana kan God nina i ga vaki ia,
Ma i ga nuknuk vakuku ure ra Vat Ki i laun tana.
16Dia ga vangangal ia ma ra lavur enana god,
Dia ga vakankan ia ma ra lavur bilak na magit.
17Dia ga vartabar tadav ra umana tabaran ba pa dia God,
Tadav ra umana god dia ga tuptup ta diat,
Tadav ra umana god dia ga kabur vana rikai,
Nina ra umana tama i vavat pa dia ga burutue diat.

18Ma pa ava nuk pa ra Vat Ki nina i ga vangala avat,
Ma ava tar valubane God nina i ga vaki avat.
19Ma ra Luluai i ga gire, ma i ga milmilikuane diat,
Tago ra umana natuna, a umana tutana ma ra umana vavina, dia vakankan ia.
20Ma i ga biti: Ina ive ra matagu kan diat,
Ina gire ba ava bar ra mutuai diat;
Tago diat a tarai i manga gegagege ra nuknuk i diat,
A umana bul na vartuam.
21Dia tar vangangal iau ma ra magit ba pa i god;
Dia tar vakankan iau ma kadia lavur magit vakuku;
Io, ina vangangal diat ma diat ba vakir diat a tarai;
Ina vakankan diat ma ra vuna tarai na papaua.
22Tago ra iap i io ure kaugu kulot,
Ma i io tuk tar ta ra ruarua na tulungen aro iat,
Ma i vaimur vue ra rakarakan a gunagunan ma ra lavur magit i tavua tana,
Ma i vautunge ra lavur bit a lualuana.
23Ina tulue vartataurane ra lavur varmonong taun diat;
Ina ponok diat ma kaugu lavur pu;
24Diat a palaur ma ra mulmulum, ma diat a imur ma ra ngala na oao,
Dimana diat a panie ta ra ngal;
Ma ina tulue ra pal a ngie i ra umana leing tadav diat,
Varurung ma ra taring matmat i ki ta ra lavur mangana dia kakao ra pia.
25Ara ra pia ra pakat na vunarubu na ra vue ra umana natu i diat,
Ma ta ra umana pakana pal ra nidadar;
Na vamutue dir par ra barmana ma ra gara na vavina,
Ra kuramana ma ra kua.
26Iau ga biti ba ina imire vue diat ta ra gunan vailik,
Ma ina vapanie vue ra nuknuk uraure diat kan ra tarai;
27Ma iau ga burutue ke ra kankan kai ra ebar,
Kan ra nuknuk i kadia lavur ebar na rara,
Ma diat a biti: A lima i dat i dekdek,
Ma ra Luluai pa i ga pait go ra lavur magit par.

28Tago diat a vuna tarai ba pa dia matoto,
Ma pa i kapa ra bala i diat.
29Gala dia kabinana pi go ra lavur magit na tapala pire diat.
Upi diat a nuk pa ra mutuai diat!
30Na tale davatane ra kopono ba na korot mur tika na arip na marmar,
Ma ra ivut upi dir a korot vue ra vinun na arip na marmar,
Ia kaka ba kadia Vat Ki i ga tar ivure diat,
Ma ra Luluai i ga tar nur vue diat?
31Tago kadia vat ki pa i da kada Vat Ki,
Maia, ma kada lavur ebar iat dia kure damana.
32Tago kadia davai na vain a ibul na vain Sodom,
Ma i ga tur ta ra uma aro Gomora;
Kadia vuai na vain i da ra tava mapak,
Kadia lavur kura vuai na vain dia manmanin;
33Kadia polo na vain i da ra taring kai ra umana vui,
Ma da ra taring matmat kai ra umana varkarat na vui.

34Dave bar, pa di ga vung vake go piragu,
Ma pa di ga vabulit ia bar varurung ma kaugu ngatngat na tabarikik?
35Kaugu iat ra varobo, ma kaugu ra balbali,
Ta nam ra bung ba na tagalir ra kau i diat;
Tago ra bung dia malari tana i tar maravai,
Ma ra lavur magit ba diat a tup diat, diat a pampam.
36Tago a Luluai na kure kana tarai,
Ma na mari mule kana umana tultul;
Ba i gire ra dekdek i diat i tar panie,
Ma pa ta na i ki valili, ta vilavilau ba ta tikai i langalanga.
37Ma na biti: Akave kadia lavur god.
Ra vat ki nina dia ga nurnur tana,
38Nina dia ga en ra bira ta kadia lavur vartabar,
Ma dia ga mome ra vain ta kadia tinabar na nimomo?
Boina diat a tut ma diat a maravut avat,
Boina diat a kovakove avat!

39Io, avat a gire ba iau kaka God,
Ma pa ta god mulai amir ki varurung me;
Iau vardodoko, ma iau valavalaun;
Iau vuna ta ra kinkin, ma iau map ia;
Ma pa ta na na valaun ta tikai kan ra limagu.
40Tago iau tulue ra limagu urama ra bala na bakut,
Ma iau biti: Da iau laun pa na mutu,
41Ba iau al vamangi kaugu pakat na vinarubu i bagabagele,
Ba iau bibili ta ra varkurai,
Ina varobo pire kaugu lavur ebar,
Ma ina balbali pire diat dia milikuane iau.
42Kaugu lavur pu diat a maur ma ra gap,
Ma kaugu pakat na vinarubu na en ra vio i ra tarai,
Ma ra gapu i diat dia virua, ma ra gapu i diat di ben vavilavilau diat,
Kan ra ulu i ra umana raprap kai ra umana ebar.

43Avat a umana Tematana, avat a pite pa kana tarai;
Tago i obo pa ra gapu i kana umana tultul,
Ma i balbali pire kana lavur ebar,
Ma i pait ra varporong ure kana gunan ma kana tarai.

44Ma Moses i ga vana ma i ga tatike ra lavur tinata ta go ra kakailai ta ra luaina mata i ra tarai, dir ma Iosua natu i Nun. 45Ma Moses i ga ngo ma ra varvai ure go ra lavur tinata ta ra tarai Israel par, 46ma i ga biti ta diat dari: Avat a nuk bulu pa go ra lavur tinata iau vaarike ta vavat ta ra bung gori; ma avat a vartuluai pire ra lavur natu i vavat ba diat a ongor ta ra lavur tinata par ta ra varkurai upi diat a pait diat. 47Tago vakir a magit vakuku pire vavat, kavava nilaun i vuna tana, ma ure go ra tinata avat a valolokon kavava kini ta ra gunan nina avat a vana lake ta ra Iordan ure, upi avat a vatur vake.

God i mulaot pi Moses na gire kapi ra gunan Kanaan

48Ma ta nam ra bung iat a Luluai i ga ve Moses dari: 49Una tutua ta ra ul a luana Abarim, ta ra luana Nebo, ta ra gunan Moab, nina i vatale uro Ieriko, ma una bobe ra gunan Kanaan, nina iau tul tar ia ta ra tarai Israel upi diat a vatur vake; 50ma una tapula ma una mat ta ra luana nina una tutua tana, da turam Aron i ga tapula ma i ga mat ta ra luana Or; 51tago amur ga piam vue iau pire ra tarai Israel ta ra tava Meriba-Kades ta ra bil Sin; tago pa amur ga ru iau pire ra tarai Israel. 52Io, una gire ra gunan ta ra luaina matam; ma i dekdek upi una vana ta ra gunan nina iau tabar ra tarai Israel me.