Isa 38 | KSD | STEP | Ta nam ra e Esekia i ga mait, ma i to na mat. Ma ra propet Iesaia, natu i Amos, i ga tadav ia, ma i biti tana: A Luluai i biti dari: Una mal pa ra lavur magit ta ra kubam, tago una mat ma pa una laun mulai.

‏ Isaiah 38

Esekia i mait

(2 King 20:1-11; 2 Tutu 32:24-26)

1 Ta nam ra e Esekia i ga mait, ma i to na mat. Ma ra propet Iesaia, natu i Amos, i ga tadav ia, ma i biti tana: A Luluai i biti dari: Una mal pa ra lavur magit ta ra kubam, tago una mat ma pa una laun mulai. 2 Ma Esekia i ga lingan upi ra papar a pal, ma i ga araring tadav ra Luluai, ma i biti: 3 Luluai, iau lul u ba una nuk pa kaugu vinavana ta ra luaina matam, tago iau tar dovot ma ra balagu i ko, ma iau tar pait ra magit i boina ta ra luaina matam. Ma Esekia i ga tangi mat.

4 Ma ra tinata kai ra Luluai i ga tadav Iesaia dari: 5 Una vana ma una ve Esekia ba ra Luluai, ra God kai tamana David, i biti dari: Iau tar valongore kaum niaring, iau tar gire ra lur na matam; ea, ina valolovina kaum nilaun pi una ki mulai a vinun ma a ilima na kilala. 6 Ma ina valaun u ma go ra pia na pal bula kan ra king Asiria. ma ina balaure bat go ra pia na pal.

7 Ma ina tul tar go ra vakilang tam upi una nunure ba ra Luluai i pait go ra magit i ga tatike: 8 Ea, ina valilikun ra malur ta ra koko rikai, nina i ga vana ur ta ra koko rikai kai Akas ta ra keake, upi na talil a vinun na rina. Io, ma ra keake i ga lilikun a vinun na rina ta ra koko rikai, nina i ga kuba tana.

9 Ma Esekia, ra king Iuda, ba i ga mait par, ma i ga tar lagar kan kana minait, i tumu go ra tinata:

10 Iau ga biti: Ba i dekdek boko ra pakagu ina olo ta ra mataniolo kai ra ruarua na tulungen;
Di tar tak vue ra ibaiba ta kaugu nilaun kan iau.
11 Iau ga biti: Pa ina gire ra Luluai, maia pa, pa ina gire ra Luluai ta ra gunan a tarai dia laun tana;
Pa ina gire mule ra tarai ba ina ki pire diat dia tar panie.
12 Di rubat vue ra kubagu, ma di * kari ia da ra pal na mal kai ra tena balabalaure vavaguai;
Iau tar pin kaugu nilaun da ra tena viri mal;
A Luluai na kut vue iau kan ra kuara;
Ta ra kopono bung una ga vapar vue iau.
13 Iau ga vango ra balagu tuk tar ta ra malana; i bubur ra lavur urugu da ra leon;
Ta ra kopono bung una ga vapar vue iau. 14 iau ga tangi da ra tamatamele ba da ra mou;
Iau ga riri da ra uka; a matagu i bilua ma ra tadatadarake;
Luluai, i tar tup iau, boina ba ina tur bokon tam.
15 Ava ina tatike? I tar tata piragu, ma ia iat i ga pait ia.
Ina pa vovovon ta ra lavur kilala ina laun tana, tago ra tulungeagu i kankadik.
16 Luluai, a tarai dia laun ta go ra lavur magit,
Ma ra tulungeagu i laun uka ta diat;
Kari una valagar iau, ma una valaun iau.
17 Ea, ra tulungeagu i ga kankadik upi ina vatur vake ra malmal tana;
Ma u tar mari ra tulungeagu, ma u tar valaun ia kan ra tung na vinirua.
Tago u tar vue kaugu lavur kaina mangamangana namur tam.
18 Tago ra ruarua na tulungen pa na pite pa u, ma ra minat pa i manane u;
Diat dia kuba ta ra tung na minat, i dekdek upi diat a ki pa kaum dovotina.
19 Nina i laun, nina i laun na pite pa u, da iau papait ia go ieri;
I boina ba tama i ra umana bul na vaarike kaum dovotina ta ra umana natuna.
20 A Luluai i ki na vaninara upi na valaun iau;
Kari dat a kakaile kaugu lavur kakailai, ma dat a ubu ra pagol maravut ia
Ta ra kuba i ra Luluai ta ra bungbung par da laun tana.
21 ^{▼▼Di pukue ra varmur ure go ra ura rina upi a tinir ma kana balbali dir a ki varurung.}Ma Iesaia i ga biti dari: Boina diat a tak pa ra gem na lovo, ma diat a vung ia ta ra buk, ma na lagar mulai. 22 Esekia i ga biti bula: Ava ra vakilang ina nunure tana ba ina tutua ta ra kuba i ra Luluai? Ma Iesaia i ga biti: