‏ Job 41

1Dave, una il ra pukpuk ma ra ngie na il,
Ba una vi ra karameana ma ra kuara?
2Dave, una vung ra vinau ta ra bilauna,
Ba una go laka ra pagupagu na ngiene ma ra rumu?
3Dave, na lul vovo pa u,
Ba na tata vovovon piram?
4Dave, na pait ra kunubu piram,
Ba na toratorom vatikai tam?
5Dave, amur a limlibur me da u limlibur ma ra beo,
Ba una vi ia upi kaum umana inip na vavina diat a ga tana?
6Dave, a umana talaim diat a balaguan tana,
Ba diat a ivure ra umana pakapakana pire ra umana tena kunukul?
7Dave, una go ra palina ma ra umana rumu na palariam,
Ba ra uluna ma ra umana rumu ai ra en?
8Una vung uka ra limam tana;
Una nuk pa ra vinarubu, ma pa una pait mule!
9Ea, a ninunuk ung upi da kinim vake, a ninunuk vakuku ka;
Ona ta tikai i gire ke, i dadadar ika tana.
10Pa ta tikai i rurung upi na vakurat ia.
Ma akave ra tutana nina ba na tur pa ia?
11To ia na ub ia, ma pa na balbali?
Pa ta tikai ta ra vavai na bakut.
Kaugu iat.

12Pa ina ki mut ure ra umana ingarina,
Ba ra ngala na dekdekina, ba ra minamarina.
13To ia na kulit vue ra palina?
To ia na go kana dekdek na vargal?
14To ia na papa ra ngiene?
Di tingtingiran ta ra umana pal a ngiene.
15A umana vulegina dia ki ngaina ta ra tamuruna,
Ma dia ki varpetep.
16Dia ki vartamtabirit,
Kari pa ta vuvu i ruk tana.
17Dia ki varpakan vanavana;
Ma tago dia ki rokot, i dekdek ba da al kaba pa diat.
18A kapa i pupua rikai. ba i mapiuak,
Ma ra ura kiau na matana dir da ra malana ba i lar.

19A birao i irop kan ra ngiene,
Ma ra umana pitil na iap dia pitil rikai.
20A mi i irop kan ra bilauna,
Da kan ra kabala i buabuai ma Ta ul i io.

21Kana ubar i topa ia ba da vabirao ra umana lakit na iap me,
Ma ra birao i arikai ta ra ngiene.
22A dekdek i bang ta ra inoana,
Ma ra lavur magit par dia burut ure.
23Di varpakane ra pal i ra pakana,
I ki bulu tana, ma i dekdek upi da tak vue.
24A balana i leo da ra vat,
I leo da ra vat na uduudu.
25Ba i tut, a umana rangrang na tutana dia burut,
Dia dadadar ari i ubuubu lup ta ra ta.
26A pakat na vinarubu pa i topa ta magit,
Damana bula ra rumu ma ra pu ma ra magit i mangi tuna.
27A palariam i da ra kubul pirana,
Ma ra palariam gobol i da ra davai i maroto.
28Pa na lop kan ra pu;
Ma ra umana lika dia da ka ra timul a kunai pirana.
29A umana ram dia da ra vuvur;
Ma i nongone ke ra umana rumu dia bebe.
30A balana i da ra umana epene vat dia mangi;
I va da ra gegege tapiok ta ra pikai.
31I vakakapal ra ta da ra kabala;
I vurue ra lamanana da di vurue ra vamong ta ra kaka.
32A taina i pua murmur tana,
Ma ta tikai na nuk ia ba ra ta iat i pua.
33Pa ta magit i varogop me ta ra rakarakan a gunagunan,
Tago pa i nunure ra bunurut.
I gire ra lavur ngala na magit;
I king ure ra lavur magit i kolakolo.
34