Jos 17 | KSD | STEP | Ma di ga padapadailam pa ra tiniba ba kai ra vuna tarai Manase, tago ia ra luaina kai Iosep. Ma Makir ra luaina kai Manase ia ra tama i Gilead; ma di ga tul tar Gilead ma Basan tana, tago ia ra tena vinarubu.

‏ Joshua 17

1 Ma di ga padapadailam pa ra tiniba ba kai ra vuna tarai Manase, tago ia ra luaina kai Iosep. Ma Makir ra luaina kai Manase ia ra tama i Gilead; ma di ga tul tar Gilead ma Basan tana, tago ia ra tena vinarubu. 2 Ma di ga padapadailam pa ra tiniba ba kai ra ngungu tarai Manase nina i tur valili, varogop ma kadia lavur apik na tarai, kai ra tarai Abieser, ma kai ra tarai Kelek, ma kai ra tarai Asriel, ma kai ra tarai Sekem, ma kai ra tarai Keper, ma kai ra tarai Semida; go diat a umana bul tutana kai Manase natu i Iosep varogop ma kadia lavur apik na tarai. 3 Ma Selopekad natu i Keper natu i Gilead, natu i Makir natu i Manase, pa ka.na ta bul tutana, a umana bul vavina ka; ma go ia ra iang i kana umana bul vavina: Mala, Noa, Kogla, Milka ma Tirsa. 4 Ma dia ga vana tadav Eleasar ra tena tinabar, ma tadav Iosua natu i Nun, ma tadav ra umana luluai, ma dia ga biti: A Luluai i ga vartuluai pire Moses upi na tibe avet ma ta gunan livuan ta ra umana tai vevet; io, varogop ma ra vartuluai kai ra Luluai, i ga tul tar ra tiniba ta diat livuan ta ra umana tama i diat. 5 Ma damana i ga vinun na tiniba kai Manase, ma ra gunan Gilead ma Basan ta ra papar a Iordan maro, 6 tago ra umana natu i Manase, a umana vavina, dia ga kale tika na tiniba varurung ma kana umana bul tutana; ma ra umana natu i Manase dia ga ki valili, dia ga kale pa ra gunan Gilead.

7 Ma ra langun kai Manase i ga tur pa ia aro Aser ma i tuk uro Mikmetat nina i tur ta ra luaina mata i Sekem; ma ra langun i bolo ta ra papar a lima tuna tadav ra tarai dia ki En-Tapua. 8 Manase i ga vatur vake ra gunan Tapua, ma ra pia na pal Tapua ta ra langun Manase kai ra tarai Epraim. 9 Ma ra langun i kuba tadav ra tava alir Kana, ta ra papar a taubar tana; go ra umana pia na pal kai Epraim livuan ta ra umana pia na pal Manase; ma ra langun kai Manase i mur ra tava alir, ta ra papar a labur tana, ma ra ta ia ra mutuaina; 10 a papar a taubar kai Epraim, ma ra papar a labur kai Manase, ma ra ta kana langun; ma dir varlangunai ma Aser ta ra papar a labur, ma ta ra papar a taur dir varlangunai ma Isakar. 11 Ma Manase i ga vatur vake ta umana pia na pal pire ra tarai Isakar ma Aser; Bet-Sean ma kana lavur pia na pal, Ibleam ma kana lavur pia na pal, ma ra tarai Dor ma kana lavur pia na pal, ma ra tarai En-Dor ma kana lavur pia na pal, ma ra tarai Tanak ma kana lavur pia na pal, ma ra tarai Megido ma kana lavur pia na pal, ta ra utul a buana. 12 Ma ra tarai Manase dia ga mama korot vue ra tarai ta nam ra umana pia na pal; a tarai Kanaan dia ga ki ka ta nam ra gunan. 13 Ma ba ra tarai Israel dia ga ongor, dia ga kure tar ra papalum ta ra tarai Kanaan, ma pa dia ga korot vakakit vue diat.

14 Ma ra vuna tarai kai Iosep i ga tata pire Iosua, ma i ga biti dari: Ta ra ava u ga tul tar ika ta kopono tiniba ma ta kopono langun tagu pi ina kale, tago iau a ngala na tarai ma ra Luluai i tar vadoane iau tuk tar ta ra bung gori? 15 Ma Iosua i ga biti tana: Ba u a ngala na tarai, una vana uria ra lokalokor ma una raraut ta ra gunan kai ra tarai Peres ma ra tarai Repaim, tago ra gunan i lualuana kai Epraim i vaim bat u. 16 Ma ra umana natu i Iosep dia ga biti: Ra gunan i lualuana pa i ngala ure avet; ma ra tarai Kanaan nina dia ki ta ra gunan i male dia vung ra kiki na vinavana na palariam ure ra vinarubu, diat par dia ki Bet-Sean ma kana lavur pia na pal ma diat dia ki ta ra male Iesrel. 17 Ma Iosua i ga ve ra kuba i Iosep, a tarai Epraim ma Manase, dari: U a ngala na tarai, ma i ngala ra dekdekim, koko una vatur vake ke ta kopono tiniba; 18 a gunan i lualuana kaum iat; a dovotina i lokalokor, ma una raut ia ka ma una vatur vake tuk tar ta ra langun tana aro iat; ma ba ra tarai Kanaan dia vatur vake ra umana kiki na vinavana na palariam, ma ba dia ongor, una korot vue ke diat.