Jos 2 | KSD | STEP | Ma Iosua natu i Nun i ga tulue ive vue a ura tutana maro Sitim, a ivu kilao, ma i ga biti: Amur a vana ma amur a gire ra gunan ma Ieriko. Ma dir ga vana, ma dir ga ruk ra kuba i tika na paiga na vavina, a iangina Rakab, ma dir ga va ie.

‏ Joshua 2

Di tulue ra ivu kilao uro Ieriko

1 Ma Iosua natu i Nun i ga tulue ive vue a ura tutana maro Sitim, a ivu kilao, ma i ga biti: Amur a vana ma amur a gire ra gunan ma Ieriko. Ma dir ga vana, ma dir ga ruk ra kuba i tika na paiga na vavina, a iangina Rakab, ma dir ga va ie. 2 Ma di ga ve ra king Ieriko dari: Ea, a ura tutana ta ra tarai Israel dir tar olo ta go ra gunan go ra marum upi dir a matoto ta ra gunan. 3 Ma ra king Ieriko i ga tulue ra tinata tadav Rakab dari: Una tulue vairop ra ura tutana dir tar pot piram, ma dir tar ruk ra kubam, tago dir tar vut upi dir a matoto ta ra gunagunan. 4 Ma ra vavina i ga ive nam ra ura tutana, ma i ga biti: A dovotina a ivu tutana dir ga ruk piragu, ma pa iau ga nunure ba dir mamave; 5 ma ba di ga vaninara upi da banu bat ra pia na pal, ba i ga marum, dir ga irop uka; ma pa iau nunure ba dir vana uve; avat a korot mur lulut dir, tago avat a tadav dir.

6 Ma i ga tar agure dir urama ra ul a pal, ma i ga ive dir ta ra gaga ure ra vir mal nina i ga vuare ta ra ul a pal. 7 Ma ra tarai dia ga korot mur dir ta ra nga i vana ba ta ra Iordan ta ra bolabolo tana; ma ba diat dia korot mur dir dia ga irop, dia ga banu bat ra mataniolo.

8 Ma ba ra ura tutana pa dir ga va mat boko, i ga tutua tadav dir urama ra ul a pal, 9 ma i ga biti ta dir dari: Iau nunure ba ra Luluai i ga tabar avat ma go ra gunan, ma ra ngala na bunurut ure avat i ga arikai pire vevet, ma i bilua tuna ra nuknuk i ra tarai par ta ra gunan ta ra luaina mata i vavat. 10 Tago ave ga valongore ba ra Luluai i ga vamama ra Ta Meme ta ra luaina mata i vavat ta nam ra bung ava ga irop tana kan ra gunan Aigipto, ma ave ga valongore ra magit ava ga pait ia ta ra ura king kai ra tarai Amor ta ra papar a Iordan maro, Sikon ma Og, nina ava ga ubu vakakit vue dir. 11 Ma ta nam ra bung ave ga valongore tana a bala i vevet i ga bilua tuna, ma pa ta niongor mulai ta ra nuknuk i ta tikai, ure ke avat; tago ra Luluai kavava God ia ra God arama ra bala na bakut ma ati ra pia bula. 12 Io, go iau lul amur upi amur a vavalima piragu tai ra Luluai, tago iau tar pait ra varmari ta mumur, ba amur a pait ra varmari ta ra kuba i tamagu bula, ma amur a tul tar ra dovot na vakilang tagu, 13 ma avat a valaun tamagu ma nagu, ma ra umana taigu, ma ra umana tana vavigu, ma kadia tabarikik par, ma avat a valaun avet kan ra vinirua. 14 Ma ra ura tutana dir ga biti tana: Kamimir nilaun na tur ure kavavat, ona pa avat a vaarike ra vuna ta go kamimir vinavana; ma ba ra Luluai i tul tar ra gunan ta vevet, avet a pait ra varmari ma ra dovotina piram.

15 Ma i ga valure vaba dir ta ra mata na kalangar ma ra vinau, tago ra kubana i ga tur ta ra ul a liplip na vat, ma i ga ki ta ra liplip na vat. 16 Ma i ga biti ta dir: Amur a lop upi ra lualuana, kan ra umana tena varkorot diat a tadav amur; ma amur a parau abara ta utul a bung tuk tar ta ra bung ba ra umana tena varkorot dia tar lilikun mulai, ma namur amur a vana. 17 Ma ra ura tutana dir ga biti tana dari: Amir mainge ba amir a langalanga ta ra vavalima nina amir ga pait ia tam. 18 Ea, ba avet a olo ta go ra gunan, una kubue go ra meme na vinau nina u ga valure vaba amir me ta ra mata na kalangar; ma una agure varurue tamam ma nam, ma ra umana taim, ma diat par ta ra kuba i tamam, tar ta ra pal piram. 19 Ma nina i irop ta ra matakilalat i ra kubam upi na vana ra pia, a gapuna na ki ta ra uluna iat, ma amir a langalanga; ma ona di bili vakaina ta tikai ta diat ara na pal piram, a gapuna na ki ta ra ulu i mimir. 20 Ma ona u vaarike ra vuna ta go kamimir vinavana, io, amir a langalanga kan go ra vavalima amir tar vavalima me piram. 21 Ma i ga biti: Da pait ia da kamumur tinata iat. Ma i ga tul vue dir, ma dir ga vana; ma i ga kubue ra meme na vinau ta ra mata na kalangar.

22 Ma dir ga vana, ma dir ga tadav ra gunan i lualuana, ma dir ga ki ie a utul a bung, tuk tar ta ra bung ba ra umana tena varkorot dia tar lilikun mulai; ma ra umana tena varkorot dia ga tikatikan upi dir ta ra lavur nga, ma pa dia ga tadav dir. 23 Io, a ura tutana dir ga talil, ma dir ga vana ba ta ra luana, ma dir ga bolo lake, ma dir ga tadav Iosua natu i Nun; ma dir ga ve ta ra lavur magit i ga tadav dir. 24 Ma dir ga biti tai Iosua: A dovotina ra Luluai i tar tul tar ra gunan parika ta ra lima i dat; ma go bula, a tarai par dia ki ta nam ra gunan i bilua ra bala i diat ure dat.