Jos 9 | KSD | STEP | Ma ra lavur king nina dia ga ki ta go ra papar a Iordan, ta ra lualuana, ta ra gunan i tamataman, ma ara ra valian pire ra ngala na ta ta ra luaina mata i Lebanon, a tarai Ket, a tarai Amor, a tarai Kanaan, a tarai Peres, a tarai Kivi, ma ra tarai Iebus, ba dia ga valongore go,

‏ Joshua 9

A mangana vartuam kai ra tarai Gibeon

1 Ma ra lavur king nina dia ga ki ta go ra papar a Iordan, ta ra lualuana, ta ra gunan i tamataman, ma ara ra valian pire ra ngala na ta ta ra luaina mata i Lebanon, a tarai Ket, a tarai Amor, a tarai Kanaan, a tarai Peres, a tarai Kivi, ma ra tarai Iebus, ba dia ga valongore go, 2 dia ga vana varurung upi diat a varubu ma Iosua ma ra tarai Israel, ma i ga kopono ko ra nuknuk i diat.

3 Ma ba ra tarai Gibeon dia ga valongore ra magit Iosua i ga pait ia tai Ieriko ma Ai, 4 dia ga pait ra mangamangana vartuam bula, ma dia ga vaninare ra adia magit, ma dia ga vako ra lavur maulana kakakap ta kadia umana as, ma ra umana paura na vain, a umana maulana ma ra umana tarada ma nina dia ga kubu bonot mule diat, 5 damana i ga maulana ra pal a kau i diat ma di ga mal bonot diat, ma dia ga mal ma ra maulana mal; ma ra adia gem i ga biu ma i ga kungal.

6 Ma dia ga vana tadav Iosua ta ra gunan kai ra tarai aro Gilgal, ma dia ga biti tana ma ta ra tarai Israel: Ave vut maro ra gunan i tur vailik; boina ba dat a pait ra kunubu. 7 Ma ra tarai Israel dia ga biti ta ra tarai Kivi: Kan ava ki livuan ta vevet. Dat a pait davatane ra kunubu ma avat? 8 Ma dia ga biti tai Iosua: Avet kaum umana tultul. Ma Iosua i ga biti ta diat: To ia avat? Ma avat mamave? 9 Ma dia ga biti tana: Kaum umana tultul dia vut maro ra gunan vailik ure ra iang i ra Luluai kaum God; tago ave ga valongore ra enana varvai ure, ma ra lavur magit i ga pait ia aro Aigipto, 10 ma ure ra lavur magit i ga pait ia ta ra ura king kai ra tarai Amor ta ra papar a Iordan maro, tai Sikon a king Kesbon ma Og a king Basan nina i ga ki Astarot. 11 Ma kaveve umana patuana ma ra tarai ta kaveve gunan par dia ga biti ta vevet dari: Avat a kap ra magit na nian ure ra vinavana, ma avat a vana barat diat, ma avat a biti ta diat: Avet kaum umana tultul; ma go i boina ba dat a pait ra kunubu na bartalaina. 12 Go ra gem ave ga kap ia upi ra aveve nian i ga malamalapang boko ta nam ra bung ave ga vana kan ra kubakuba i vevet upi avet a tadav avat; ma go, gire, i tar biu ma i kungal; 13 ma go ra umana paura na vain dia ga kalamana ba ave ga vabuka diat; ma go dia tarada; ma go kaveve umana mal ma ra umana pal a kau i vevet dia tar maulana ta ra ngala na vinavana.

14 Ma ra tarai dia ga tatak ta kadia magit na nian, ma pa dia ga matoto ta ra ngie i ra Luluai. 15 Ma Iosua i ga tata na malmal pire diat, ma i ga vatur ra kunubu pire diat upi diat a laun; ma ra umana luluai kai ra tarai dia ga vavalima pire diat.

16 Ma ba di ga tar pait ra kunubu pire diat, ma i ga par a utul a bung taun ia, dia ga valongore ba dia ki maravai ka, ma ba dia ki livuan ta diat. 17 Ma ra tarai Israel dia ga vanavana mulai, ma ta ra vautuluna bung dia ga tadav kadia umana pia na pal. Ma go kadia umana pia na pal: Gibeon, Kepira, Berot, ma Kiriat-Iearim. 18 Ma ra tarai Israel pa dia ga ubu diat, tago ra umana luluai kai ra tarai dia ga vavalima pire diat tai ra Luluai ra God kai Israel. Ma ra tarai par dia ga tata mukumuk ure ra umana luluai.

19 Ma ra umana luluai dia ga biti ta ra tarai par dari: Ave tar vavalima pire diat tai ra Luluai ra God kai Israel, kari i dekdek upi dat a bili vakaina diat. 20 Dat a pait go ra magit pire diat, dat a nur vue diat upi diat a laun, kan ra kankan na tup avet, tago ave ga vavalima pire diat. 21 Ma ra umana luluai dia ga biti ta diat: Avat a nur vue diat upi diat a laun. Damana dia ga tena kita davai ma tena kulupe tava kai ra tarai par, da ra umana luluai dia ga vatang ia ure diat.

22 Ma Iosua i ga oro pa diat, ma i ga biti ta diat dari: Ta ra ava ava ga tuam pa avet, ma ava ga biti, Ave ki vailik kan avat, ma go ava ki ka livuan ta vevet? 23 Io, avat a kakaina ka, ma avat a ki na vilavilau vatikai, a umana tena kita davai ma ra umana tena kulupe tava ta ra kuba i kaugu God. 24 Ma dia ga tata bali Iosua, ma dia ga biti: Tago a dovotina di ga ve kaum umana tultul ba ra Luluai kaum God i ga ve Moses kana tultul ba na tul tar go ra gunan parika ta vavat, ma ba na vamutue ra tarai par dia ki tana ta ra luaina mata i vavat; kari ave ga burut na kaia ta vavat ure kaveve nilaun, ma ave ga pait go ra magit. 25 Ma go a varkurai ure avet i tur piram; ba u nuk pa ta magit i boina ma i takodo upi da pait ia ta vevet, una pait ia ka. 26 Ma i ga pait ia damana pire diat, ma i ga valaun diat kan ra lima i ra tarai Israel, ma pa dia ga doko diat. 27 Ma Iosua i ga vaki diat upi diat a kita davai ma diat a kulupe tava ure ra tarai ma ure ra uguugu na vartabar kai ra Luluai bula, tuk tar ta ra bung gori, ta nam ra gunan ba na ga pilak pa ia boko.