‏ Luke 3

Ioanes ra Tena Baptaiso i varvai

(Mat 3:1-12; Mar 1:1-8; Ioa 1:19-28)

1Ba Kaisar Tiberio i tar varkurai a vinun ma a ilima na kilala, ma Pontio Pilato i tena varkurai na gunan aro Iudaia, ma Erodes i luluai aro Galilaia, ma turana Pilipo i luluai ta ra gunagunan Ituraia ma Trakoniti, ma Lisanio ia ra luluai Abilene, 2ma ba Anas ma Kaiapas dir ra ura tena tinabar lualua, a tinata kai God i tadav Ioanes, natu i Sakaria ara ra bil. 3Ma i vana ta ra gunagunan par maravai Iordan, i varvarvai ta ra baptaiso na nukpuku upi ra punpun vue ai ra lavur varpiam, 4da di ga tumu ia ta ra buk na tinata kai Iesaia ra propet, dari:

“A nilai tikai i oraoro ara ra bil ba:
Avat a mal are ra nga kai ra Luluai,
Avat a pait kodo kana lavur nga.
5Da punang ra lavur male par,
Ma da ap ra lavur lualuana par,
A magit i gegagege na takodo,
Ma nina i tung pitipit na tamataman;
6Ma ra lavur tarai ta ra rakarakan a gunagunan parika diat a gire ra varvalaun kai God.”
7I tatike dari tai ra lavur kor dia vanavana tadav ia upi na baptaiso diat: Avat a umana bul mur ta ra umana vui, to ia i ga vaale avat upi avat a lop kan ra kankan namur? 8Avat a vuai ra vuai vavat ba na topa ra nukpuku, ma koko avat a nuk ia ta ra bala i vavat dari: Ave tamana ma Abaraam; tago iau tatike ta vavat ba, God na vangala ra umana bul mur tai Abaraam ta go ra lavur vat. 9Ma go muka di tar vung ra pem pire ra lavur vuna davai, ma ra davai par, ba pa i vuai ra bo na vuaina, da mut vue, ma da vue ta ra iap. 10Ma ra kor na tarai dia tir ia: Ava avet a pait ia? 11Ma i tatike ta diat: Nina ba kana ra ivu olovoi, na tul tar ta tikai tai nina ba pa kana ta na; damana bula ra magit na nian. 12Ma ta umana tena balabalaure totokom dia pot upi ra baptaiso, ma dia biti tana: Tena Vartovo, ava avet a pait ia? 13Ma i tatike ta diat: Koko avat a.vaongo ure ra totokom upi na ngala tai nina di ga kure tar ia ta vavat. 14Ma ra umana tena vinarubu dia tir ia: Ma avet, ava avet a pait ia? Ma i biti ta diat: Koko avat a vakaina ta tikai; koko avat a vartakun vavaongo; avat a lagar ta kavava vapuak.

15Ma tago ra tarai dia nuknuk ung pa ra Kristo, ma ra tarai par dia nununuk ta ra bala i diat ure Ioanes, ba ia ra Kristo bar, 16Ioanes i tatike ta diat par: Iau baptaiso avat ma ra tava ka, ma tikai na murmur boko, i dekdek ta mimir, ma iau, pa iau ko upi ina pala ra kuara na pal a kauna, nina na baptaiso avat ma ra Takodo na Tulungen, ma ra iap. 17Ma i vatur kana vuavue vit, ma na vagomgom muka kana vuvuvung na vit, ma na vung varurue ra vit ta kana pal na vuvuvung ma na tun vue ra palina ma ra iap ba pa da pun ia muka.

18Ma mangoro bula ra tinata na vargat i varve ra bo na varvai me ta diat. 19Ma tago i pit Erodes ra luluai ure Erodias, ra taulai kai turana, ma ure ra lavur varpiam i ga pait ia, 20Erodes i varuk Ioanes ta ra pal na banubat ma i ga vot mule kana mangamangana me.

Ioanes i baptaiso Iesu

(Mat 3:13-17; Mar 1:9-11)

21Ba di tar baptaiso ra tarai par, di tar baptaiso Iesu bula, ma ba i araring, a bakut i taprei, 22ma ra Takodo na Tulungen i vana ba taun ia, ma i vung ra pal a pakana da ra uka, ma ra nilai tikai i arikai marama ra bala na bakut dari: U natugu, a bul na vakak, iau gugu muka tam.

Ra niluluk na vuna tarai kai Iesu

(Mat 1:1-17)

23Ba Iesu i tur pa ra vartovo, i ga laun vue ra utul a vinun na kilakilala bar, ma ia natu i Iosep (di biti ka damana) natu i Eli, 24natu i Matat, natu i Levi, natu i Melki, natu i Iana, natu i Iosep, 25natu i Matatio, natu i Amos, natu i Naum, natu i Esli, natu i Nagai, 26natu i Mat, natu i Matatio, natu i Semei, natu i Iosek, natu i Ioda, 27natu i Ioanan, natu i Resa, natu i Serubabel, natu i Salatiel, natu i Neri, 28natu i Melki, natu i Adi, natu i Kosam, natu i Elmadam, natu i Er, 29natu i Iosua, natu i Elieser, natu i Iorim, natu i Matat, natu i Levi, 30natu i Simeon, natu i Iuda, natu i Iosep, natu i Ionam, natu i Eliakim, 31natu i Melea, natu i Mena, natu i Matata, natu i Natan, natu i David, 32natu i Iese, natu i Obed, natu i Boas, natu i Sala, natu i Nason, 33natu i Aminadab, natu i Admin, natu i Ami, natu i Esrom, natu i Pares, natu i Iuda, 34natu i Iakob, natu i Isak, natu i Abaraam, natu i Tara, natu i Nakor, 35natu i Seruk, natu i Raga, natu i Pelek, natu i Eber, natu i Sala, 36natu i Kainan, natu i Apakad, natu i Sem, natu i Noa, natu i Lamek, 37natu i Matusala, natu i Enok, natu i Iared, natu i Maleleel, natu i Kainan, 38natu i Enos, natu i Set, natu i Adam, natu i God.