‏ Luke 4

Satan i valar Iesu

(Mat 4:1-11; Mar 1:12-13)

1Iesu i buka ma ra Takodo na Tulungen, ma i talil maro ra Iordan, ma ra Tulungen i agure ura ra bil, 2i ki tana a ivat na vinun na bung, ma Satan i valavalam ia. Pa i en ta magit ta nam ra lavur bung; ma ba dia tar par, i mulmulum muka. 3Ma Satan i tatike tana: Ba u natu i God, una kure go ra vat upi na gem. 4Iesu i biti tana: Di ga tumu ia ba: “A tarai pa dia laun ta ra kinanang na gem uka.” 5Ma i agure urama, i ve tar tana ra lavur kiki na varkurai ta ra rakarakan a gunagunan parika ta ra ik a ngungu pakana bung uka. 6Ma Satan i tatike tana: Ina tabar iu ma go ra varkurai parika ma ra minamar bula tana, tago di ga tul tar ia tagu, ma ina tabar nina me ba iau mainge. 7Ona una lotu tagu, kaum parika. 8Iesu i biti tana: Di ga tumu ia: “Una lotu tadav ra Luluai kaum God, ma una torom tana ka.” 9Ma i agure urama Ierusalem, ma i vaki ia liu ta ra bur na pal na vartabar, ma i biti tana: Ba u natu i God, una pil ba mamati; 10tago di ga tumu ia:

“Na tul tar kana umana angelo tam, diat a balaure u. 11Ma go bula:
“Diat a puak vatur u ma ra lima i diat, kan una tuke ra kaum ta ra vat.”
12Iesu i tatike tana: Di ga tatike: “Koko una valar ra tuluai kaum God.”

13Ba Satan i tar valam ia ma ra lavur varilam parika i vana papa kan ia.

Iesu i tur pa kana papalum aro Galilaia

(Mat 4:12-17; Mar 1:14-15)

14Iesu i talil ma ra dekdek i ra Tulungen urama Galilaia, ma i rarang vanavana ta ra lavur gunagunan. 15Ma i vartovo ta kadia lavur pal na lotu, ma diat par dia pite pa ia.

Di okole vue Iesu aro Nasaret

(Mat 13:53-58; Mar 6:1-6)

16Ma i pot Nasaret, nam i ga tavua tana; i ruk ta ra pal na lotu ta ra Bung Sabat, da kana mangamangana iat, ma i tur upi na luluk. 17Ma di tul tar tana ra buk kai ra propet Iesaia. Ma i pelegi ra buk, ma i na tadav ra pakana di ga tumu ia tana dari:

18“A Tulungea i ra Luluai i ki tagu,
Tago i tar tap iau upi ina varve ra bo na varvai tadav ra lavur luveana;
I tar tulue iau upi ina varvai dari: Da papa vue diat di ga banubat diat,
Ma ra lavur pula diat a nana mulai;
Upi ina pala vue diat dia dala,
19Ma upi ina varvai ure ra e na varvalaun kai ra Luluai.”
20Ma i paum ra buk, i tul tar ia mulai tai ra tultul, ma i ki ra pia, ma ra tarai par ta ra pal na lotu dia bobobe. 21Ma i tatike ta diat: Gori di tar pait ot pa go ra tutumu ta ra talinga i vavat. 22Ma dia mulaot par tana, ma dia kaian ta ra ko na tinata i tatike; ma dia titir ure ba: Go laka natu i Iosep? 23Ma i tatike ta diat: Kan avat a tatike go ra tinata valavalar tagu: Tena valagar, una valagar iu mulai; nam par ave valongore ba u ga pait ia arama Kapernaum, una pait ia bula ati ta kaum gunan iat. 24Ma i biti: A dovot go iau tatike ta vavat: Pa ta propet ba di ru ia ta kana gunan. 25A dovot go iau tatike ta vavat ba: Mangoro na ua na vavina dia ga ki Israel ta ra kilala i Elias, ba di babat ra lavur bakut a utul a kilala ma ra laptikai na gai, ma ra ngala na mulmulum i tup ra gunagunan parika; 26ma pa di ga tulue Elias tadav diat, tadav uka ra ua na vavina ta ra pia na pal Sarepta ta ra gunan Sidon. 27Ma mangoro na vukavuka dia ga ki Israel ta ra kilala kai Elisa ra propet, ma pa di vagomgom ta na ta diat, ia kaka Naaman a te Siria. 28Ma diat par dia ki ra pal na lotu, dia kankan ba dia valongore go ra lavur tinata; 29ma dia tut, ma dia okole vue kan kadia pia na pal, ma dia ben ia ta ra papar a tavarat ta nam ra luana di ga pait kadia pia na pal tana, upi diat a vue valilie vaba ia. 30Ma i vana ka livuan kan diat.

Ra tutana ba ra tabaran i ovai tana

(Mar 1:21-28)

31Ma i vana Kapernaum, a pia na pal Galilaia. Ma i tovo diat ta ra Bung Sabat 32ma dia kaian ta kana vartovo, tago kana tinata i dekdek. 33Tika na tutana ta ra pal na lotu, a dur na tabaran i ovai tana, ma i oraoro mat dari: 34Dor dave ma u, u Iesu a te Nasaret? U tar vut laka upi una ubu vue avet? Iau nunure u, u a Tena Gomgom kai God. 35Iesu i bor bat ia, i biti: Una ki mut, ma una irop kan ia. Ba ra tabaran i tar pul vabura vue uro ra pia livuan ta diat, i irop kan ia, ma pa i ga vakaina. 36Ma i tup diat par ra bunurut, ma dia titir vargiliane diat dari: A tinata ava go? Tago i kure vadekdek ra umana dur na tabaran, ma i tulue diat ma dia irop uka. 37Ma ra varvai ure i vana vurvurbit ta ra lavur gunagunan.

Iesu i valagar pa mangoro na minait

(Mat 8:14-17; Mar 1:29-34)

38Ma i tut, i vana kan ra pal na lotu, i ruk ta ra kuba i Simon. Ma nimu i Simon i tup ia muka ra malamalapang, ma dia lul ia ure. 39I tur pa pirana, ma i tigal ra malamalapang, ma i oton muka; ma i tut, ma i kudakudar ta diat.

40Ba ra keake i vana ba, diat par ba ra umana niuru i diat dia mait ma ra. lavur mangamangana minait, dia kap diat pirana, ma i vung ra ura limana ta diat par, ma i valagar diat parika. 41Ma ra umana tabaran dia irop kan ra mangoro, ma dia oro dari: U Natu i God. Ma i bor bat diat, pa i nur tar diat upi diat a tata, tago dia nunure ba ia ra Kristo.

Iesu i varvai ta ra lavur pal na lotu Galilaia

(Mar 1:35-39)

42Ba i tar keake, i irop, ma i vana ta ra pakana pui, ma ra kor na tarai dia tikan mur ia, ma dia tadav ia upi diat a tigal vake, pi koko na vana kan diat. 43Ma i biti ta diat: Ina varve ra lavur bo na varvai ure ra varkurai kai God ta ra lavur enana pia na pal bula; ure go di ga tulue iau. 44Ma i varvai ta ra lavur pal na lotu Galilaia.