‏ Psalms 18

A kakailai na niuvia kai David

(2 Sam 22:1-51)

Kai nina i lue ra kakailai; kai David a tultul kai ra Luluai, nina i ga tatike ra lavur tinata ta go ra kakailai pire ra Luluai, ta nam ra bung ba ra Luluai i ga valaun ia tana kan ra lima i kana umana ebar ma kan ra lima i Saul, ma i biti:

1Luluai, ra dedekigu, iau mari u.
2Ra Luluai ia kaugu vat i ta, kaugu pal na bakbakit, ma kaugu tena valaun;
Kaugu God, kaugu padikat na vat i ta, ina rivarivan tana.
Kaugu ramravit, ma ra dekdek iau lalaun tana, kaugu pal na rivarivan i manga tuluai urama.
3Ina kail tadav ra Luluai, nina i topa ia ba da pite pa ia,
Ina laun kan kaugu lavur ebar.

4A umana vinau na minat dia ga rau kikil iau,
Ma iau ga burut ta ra varpiam i da ra lovon ta.
5A umana vinau na ruarua na tulungen dia ga viviai tagu,
A lavur kun na minat dia ga tadav iau.

6Iau ga kail tadav ra Luluai ba iau ga ki na malari,
Ma iau ga tangi tadav kaugu God;
I ga valongore ra nilaigu ta kana pal tabu,
Ma kaugu tinangi ta ra luaina matana i ga ruk ra talingana.

7A rakarakan a gunagunan i ga dadar ma i ga guria,
A vunapai ra lualuana bula i takari ma i dadar, tago i ga kankan.
8A mi i tubang rikai ta kana kankan,
Ma ra iap ta ra ngiene i ga vavaimur;
A umana lakit dia ioaio tana.
9I ga lele ra bakut bula ura ra pia, ma i ga kuba;
A ngala na bingnimuna i tur ta ra vavai ra kauna.

10Ma i ki ra ul a angelo, ma i pururung;
Maia pa, i pururung lulut ta ra ul a bebea i ra vuvu.
11I ga paraparau ta ra bobotoi, nam kana bakbakit kikil ia;
A umana korong na bakut, a umana ivarat arama ra maup.
12A bata na vatvat ma ra lakit
I irop kan ra talapar ta ra luaina matana.
Ma i bura doladolo kana lavur ivarat;
13Ra Luluai i ga pangpagur bula arama ra bala na bakut,
Ma ra Ngala Kakit i tata;
A bata na vatvat ma ra lakit.
14I ga tulue kana umana pu, ma i korot varbaiane diat;
Maia pa, mangoro na meme, ma i ubu vapurpuruan pa diat.
15A bala na ta i vana rikai
Ta kaum varpit ma ta ra vuvu na bilaum;
Dir ga vaarike bula ra vunapai ra rakarakan a gunagunan.

16I tulue ra limana marama, ma i vatur iau;
I al vairop iau kan ra do na tava.
17I valangalanga iau kan kaugu dekdek na ebar,
Ma kan diat dia milmilikuane iau,
Tago dia ga manga dekdek ta vevet.
18Dia ga tadav iau ta ra bung iau ki na malari tana,
Ma ra Luluai i ga tukal iau.
19I ben pa iau ta ra pakana gunan i maup;
I valangalanga iau, tago i manga gugu tagu.

20Ra Luluai i vapuak iau da i topa kaugu mangamangana takodo;
I babali piragu da i topa ra gomgom na limagu.
21Tago iau tar mur ra nga kai ra Luluai,
Ma pa iau vana rara kan kaugu God.
22Tago kana lavur varkurai dia ga tur ta ra luaina matagu,
Ma pa iau ga vue kana lavur togotogo kan iau.
23Iau ga ko vurakit bula pirana,
Ma iau ga balaure bat iau kan ra varpiam.
24Kari ra Luluai i tar vapuak iau varogop ma kaugu mangamangana takodo,
Varogop ma ra gomgom na limagu ta ra luaina matana.
25Una ga vaarike kaum varmari pire diat dia varmari,
Una ga ko vurakit tadav diat dia ko vurakit;
26Una ga gomgom vurakit pire diat dia gomgom,
Ma una ga turtur bat diat dia bilak.
27Tago una ga valaun ra tarai dia malari;
Ma diat dia malamala ngala ka, una ga vaikilik pa diat.
28Tago una ga valiting kaugu lamp;
Ra. Luluai kaugu God na vakapa kaugu bobotoi.
29Tago ba dor ma u, ina korot mur a loko na tarai na vinarubu,
Ma ona amir ma kaugu God ina pil lake ra liplip.
30Ma ure God, kana nga i ko vurakit;
A tinata kai ra Luluai i dovot;
Ra Luluai a ramravit kadiat par dia nurnur tana.
31Tago ia God? la kaka ra Luluai.
Ma to ia ra vat i ta? Kada God kakika.
32Nam ra God i vi pit iau ma ra dekdek,
Ma i mal kaugu nga upi na ko vurakit.
33I mal ra kaugu upi na varogop ma ra kau i ra me,
Ma i vaki iau ta kaugu kiki liu.
34I tovo ra limagu ure ra vinarubu,
Upi ra limagu na lele valar pa ra panak na palariam gobol.
35U tar tul tar tagu bula ra ramravit nina ba kaum valavalaun;
Ma ra limam tuna i maravut iau,
Ma kaum varmari i pait vangala pa iau.
36U tar valangalanga ra pakana gunan iau vanavana tana,
Ma ra ura kaugu pa dir tamagaga.
37Ina korot mur kaugu umana ebar, ma ina tadav diat;
Ma pa ina lilikun mulai tuk ta nam ba dia tar virua.
38Ina go vakakit diat upi koko diat a tut mulai.
Diat a bura ta ra vavai ra ura kaugu.
39Tago u tar vi pit iau ma ra dekdek upi ra vinarubu;
U tar vamolo tar diat i tagu, diat dia ga tut na vinarubu ure iau.
40U tar pukue vatalil kaugu umana ebar,
Ma ure diat dia milmilikuane iau, iau tar ubu vue diat.
41Dia ga tangi ma pa ta na i valaun diat,
Dia tangi tadav ra Luluai iat, ma pa i torom ta diat.
42Ma iau ga ubu. pamar gigi diat; dia da ra tobon a vuvu i kap vue;
Iau vue pikire vue diat da ra pikai ta ra nga.

43U tar valaun iau kan ra varngangar kai ra tarai;
U tar vaki iau upi iau ra lualua ta ra umana Tematana;
A tarai ba pa iau ga nunure diat dia tar torom tagu.
44Ba dia valongore ra tinata ure iau diat a torom vuavuai tagu,
A umana vaira diat a ongo tagu.
45A umana vaira diat a bilua vanavana,
Ma diat a vana rikai ma ra nidadar kan kadia lavur pal na bakbakit.

46Ra Luluai i laun, ma da pite pa kaugu vat i ta,
Ma da manga pite pa God kaugu tena valaun,
47Maia pa, nam ra God ba na pait ra varobo ure iau,
Ma i vamolo tar ra tarai tagu.
48I valaun iau kan kaugu umana ebar,
Maia pa, u vaki iau urama kan diat dia tut na vinarubu ure iau,
U valaun iau kan ra tena vakavakaina.

49Kari, Luluai, ina tul tar ra pite varpa tam pire ra umana Tematana,
Ma ina kakailai na pite varpa tadav iangim.
Ra Luluai i tul tar ra ngala na valavalaun ta kana king,
Ma i vaarike tar ra varmari tai nina i ga pilak pa ia,
Tai David ma kana tarai namur ma pa na mutu.
50