‏ Psalms 25

A niaring upi ra varvateten ma ra varbalaurai

Kai David.

1Luluai, a mamainga kai ra tulungeagu i tur piram.
2Kaugu God iau tar nurnur tam,
Koko ina vavirvir;
Koko kaugu lavur ebar diat a gugu ma iau.
3Maia, pa ta tikai ta diat dia nurnur tam na vavirvir;
Diat ika dia pait ra vavagu vakuku diat a vavirvir.

4Luluai, una vateten tar kaum lavur mangamangana tagu;
Una tovo tar kaum lavur nga tagu.
5Una rap lue iau ta kaum dovot na mangamangana, ma una tovo iau;
Tago u God, kaugu tena valaun,
Iau kiki ung up u ta ra bung parika.

6Luluai, una nuk pa kaum bala na varmari ma kaum lavur varmari;
Tago dia tur papa amana iat.
7Koko una nuk pa kaugu lavur nirara, ba iau ga barmana, ma koko una nuk pa kaugu lavur mangana varpiam;
Luluai, una nuk pa iau vardada ma kaum varmari;
Ma ure kaum bo na mangamangana una nuk pa iau, Luluai.
8Ra Luluai i boina ma i dovot,
Kari na tovo ra umana tena varpiam ure ra nga.
9Na rap lue diat i madu ra bala i diat ta ra mangamangana takodo,
Ma na tovo tar kana mangamangana ta diat i madu ra bala i diat.
10A lavur mangamangana kai ra Luluai dia vuna ta ra varmari ma ta ra dovotina
Tadav diat dia mur kana kunubu ma kana lavur vartuluai.

11Luluai, ure ra iangim
Una nur vue kaugu varpiam, tago i ngala.
12To ia i ru ra Luluai?
Ra Luluai na tova ure ra nga, nina ba na pilak pa ia. 13la iat na ki mamal,
Ma ra umana bul mur tana diat a kale ra gunan.
14A magit na pidik kai ra Luluai i kapa pire diat dia ru ia,
Ma na vateten tar kana kunubu ta diat.
15A matagu i gigira vatikai upi ra Luluai;
Tago ia iat na pala vue ra kaugu ta ra kun.
16Una tur likun upi iau, ma una mari iau;
Tago iau ki varkolono ma i tup iau.
17Una valangalanga ra nuknukigu,
Una ben vairop iau kan ra lavur magit i monong iau.
18Una nuk pa ra mangamangana i tup iau ma kaugu kinadik;
Ma una nur vue kaugu lavur nirara.

19Una nuk pa kaugu lavur ebar, tago a peal diat;
Ma dia milikuane iau ma ra milmilikuan i ngangar.
20Uria vaale vake kaugu nilaun, ma una valaun iau;
Koko ina vavirvir, tago iau rivarivan tam.
21Boina ba ra dovotina ma ra mangamangana takodo dir a mataure iau,
Tago iau ki nunur tam.

God, una valaun Israel kan kana lavur varmonong.
22